Binagbinaga ang Pulong ni Jehova Kada Adlaw!

¹ Ang tagsa ka adlaw nagahatag sing bag-o nga mga hangkat sa imo pagtuo. Ayhan ginaipit ka sang imo kalibutanon nga kakilala nga mag-date. Luyag sang imo manunudlo nga magkuha ka sing kalibutanon nga karera, ukon luyag sang imo amo nga magtrabaho ka sing mas malawig nga mga oras. Ang imo pisikal nga panglawas mahimo nagaluya. Bisan pa ini nga mga pagtilaw magaabot sa imo sa bisan ano nga tion, wala ka nagaisahanon. Handa si Jehova sa paghatag sa imo sing kaalam nga kinahanglan agod malandas ini. Ang pagbinagbinag sa teksto sang Biblia kag komento sa Pag-usisa sa Kasulatan isa ka paagi nga sa sini matigayon mo sing tayuyon ang Pulong ni Jehova. Ginahimuslan mo bala ining aman?

² Matigayon ang Bulig: Ginalaragway sang Isaias 30:​20 si Jehova subong ang “Dakung Instruktor” nga mapangayuan sing bulig sang katawhan sang Dios. Ginaaman niya sa imo kon ano gid ang imo ginakinahanglan agod maatubang ang mga hangkat sa imo pagtuo. Paano? Ang masunod nga bersikulo nagapaathag: “Ang imo mga dulunggan makabati sing pulong sa likod nimo nga nagasiling: ‘Amo ini ang dalan. Lakat sa sini.’” Sa karon, ginahatag ni Jehova ang iya “pulong” paagi sa Kasulatan kag sa mga publikasyon sang ‘matutom nga ulipon.’ (Mat. 24:45) May yara isa ka manggad sang kaalam sa nagligad lamang nga mga artikulo sang Lalantawan, may kaangtanan sa halos tanan nga bahin sang Cristianong pagkabuhi. Ang pagrepaso sa mga ginbalikwat sa Pag-usisa sa Kasulatan nagabulig sa imo sa pagtukod sing isa ka bodega sang ihibalo nga mapuslanon sa pag-atubang sa tanan nga sahi sang pagtilaw.​—⁠Isa. 48:⁠17.

³ Magtalana sing Tion Para sa Sini: Bisan pa ang mga aga masako nga tion, ginapanikasugan sang isa ka iloy nga mabasa kag mabinagbinag ang teksto kag mga komento upod sa iya anak nga lalaki samtang nagapamahaw sia. Ining mga pulong lakip na ang pangamuyo amo ang katapusan nga mga pulong nga mabatian niya kada aga antes maglakat pakadto sa eskwelahan. Nagpabakod ini sa iya nga batuan ang seksuwal nga mga pagsulay, indi magkompromiso sa atubangan sang nasyonalismo, kag magpanaksi sing maisugon sa mga estudyante kag mga manunudlo man. Bisan pa nga sia lamang anay ang Saksi sa eskwelahan, wala gid sia magbatyag nga nagaisahanon.

⁴ Magdangop kay Jehova kag sa iya Pulong para sa panuytoy kag giya. Kon himuon mo ini, mangin matuod sia sa imo, kaangay sang isa ka masaligan nga abyan. Magdangop sa iya kada adlaw! Upod sa minilyon pa sa bug-os nga kalibutan nga nagakonsulta adlaw-adlaw sa Pulong sang Dios, kabay nga masapwan mo ang imo mga mata nga mangin “mga mata nga makakita sa imo Dakung Instruktor.”