Iskedyul sang Pamilya—Ang Matag-adlaw nga Teksto
1 Ginapanikasugan gid kada adlaw sang mahigugmaon nga mga ginikanan nga ihanda ang makapapagros nga pagkaon para sa ila kabataan. Ang pag-aman sa ila sing espirituwal nga pagkaon gikan sa Pulong sang Dios mas importante pa gid. (Mat. 4:4) Ang isa ka paagi nga mapalambo sang kabataan ang gana sa espirituwal nga pagkaon kag ‘magatubo sa kaluwasan’ amo ang paghatag sing tion nga binagbinagon ang matag-adlaw nga teksto kag mga komento subong isa ka pamilya. (1 Ped. 2:2) San-o mo ini ilakip sa iskedyul sang pamilya?
2 Sa Tigkalaon: Ang pagsugod sang imo adlaw paagi sa pagbinagbinag sang teksto makabulig sa imo pamilya nga madumduman si Jehova sa bug-os nga adlaw. (Sal. 16:8) Ang isa ka iloy namat-od nga basahon kag binagbinagon ang teksto kag mga komento upod sa iya anak nga lalaki samtang nagapamahaw sila kag mangamuyo upod niya antes magkadto sa eskwelahan. Nagpalig-on ini sa bata nga indi magkompromiso sa nasyonalismo, nga batuan ang imoral nga mga pagsulay, kag manaksi sing masidla sa mga estudyante kag mga manunudlo. Bisan isa lang sia nga Saksi sa eskwelahan, wala sia magbatyag nga nagaisahanon.
3 Kon indi praktikal nga hinun-anunan ang teksto sa aga, sarang ninyo ini mabinagbinag subong pamilya sa hapon, ayhan sa panihapon. Ang iban nagasugid man sang mga eksperiensia gikan sa ministeryo sa latagon kag mga punto nga ila naluyagan sa ila personal nga pagbasa sang Biblia. Madamo ang nahamuot nga maghinumdom sang mga okasyon samtang nagapanihapon sila subong isa sa labing makalilipay nga tion nga ginhinguyang nila sing tingob subong pamilya.
4 Sa Gab-i: Sa pila ka pamilya, ang pagbinagbinag sang matag-adlaw nga teksto antes magtulog amo ang labing maayo nga tion. Mangin maayo man ini nga tion sa pagpangamuyo sing tingob. Samtang mabatian kada adlaw sang imo kabataan ang paghambal mo tuhoy kay Jehova kag pagpangamuyo sa iya, mangin matuod nga persona si Jehova sa ila.
5 Kabay nga pakamaayuhon ni Jehova ang imo mga panikasog nga ipatudok ang kamatuoran sa imo kabataan samtang ginagamit mo sing maayo ang Pag-usisa sa Kasulatan sa Adlaw-adlaw.