‘Magpamati kag Magkuha sing Dugang Pa nga Pagtudlo’

¹ Ginalaragway sang tulun-an sang Hulubaton ang kaalam nga nagasiling: “Pamati, kay nagapamulong ako tuhoy sa panguna nga mga butang, kag ang akon mga bibig nagabungat tuhoy sa pagkatadlong. Ako may laygay kag praktikal nga kaalam. . . . Pamati sa akon; huo, malipayon ang mga nagasubay sang akon mga dalanon. Kay ang isa nga makakita sa akon pat-od nga makakita sing kabuhi, kag makaagom sing maayong kabubut-on gikan kay Jehova.” (Hulu. 8:​6, 14, 32, 35) Ini nga mga pulong nagakaigo nga nagalaragway sa pagtudlo nga nagahulat sa aton sa “Mga Manunudlo Sang Pulong Sang Dios” nga Distrito nga Kombension.

² Ang mga kinahanglanon sang bug-os kalibutan nga paghiliutod ginbinagbinag sing maayo, kag ang programa sa kombension ginhanda agod talupangdon ini nga mga kinahanglanon. Ang espirituwal nga pagtudlo kag praktikal nga mga panugda nga ihatag, kon iaplikar, makabulig sa aton nga mangin malipayon, mahuptan ang maayo nga kaangtanan kay Jehova, kag magpabilin sa dalan padulong sa kabuhi nga walay katapusan. Pat-od nga may rason gid kita sa ‘pagpamati kag sa pagkuha sing dugang pa nga pagtudlo.’​—⁠Hulu. 1:5.

³ Antes sang Programa: Agod makabenepisyo sing bug-os gikan sa ginapresentar, dapat nga yara na kita sa aton mga pulungkuan kag may husto nga panghunahuna kon magsugod ang programa. Nagakinahanglan ini sing maayong personal nga organisasyon. Ang isa ka importante nga butang amo ang pagsugod sing temprano. Magtulog sing temprano sa gab-i. Magbugtaw sing temprano agod ang tanan sa imo grupo may nagakaigo nga tion sa paghanda kag sa pagpamahaw. Mag-abot sing temprano sa duog nga ginahiwatan sing kombension agod makakita kamo sing pulungkuan kag maatipan ang kinahanglanon nga mga butang antes magsugod ang programa.

⁴ Sanglit ang panguna nga katuyuan sang pagtilipon amo ang pagdayaw kay Jehova “sa tunga sang nagtipon nga katilingban,” ang tagsa ka sesyon dapat sugdan sa paagi nga nagapadungog sa aton Dios. (Sal. 26:12) Tungod sini, ang tanan ginapalig-on sa paglingkod antes ginapahibalo ang nagabukas nga ambahanon. Nagahisanto ini sa Makasulatanhon nga laygay: “Ang tanan nga butang himuon sing nagakaigo kag suno sa kahimusan.” (1 Cor. 14:40) Ano ang kahulugan sini para sa tagsatagsa sa aton? Kon makita mo ang tsirman nga nagalingkod sa plataporma sa tion nga ginapatokar ang musika antes sang sesyon, magkadto gilayon sa imo pulungkuan. Magahatag ini sa imo sing higayon nga makapakigbahin sing bug-os tagipusuon sa ambahanon nga nagabukas sa tagsa ka sesyon, sa amo nagahatag sing kadayawan kay Jehova.​—⁠Sal. 149:1.

⁵ Sa Tion sang Programa: “Ginhanda ni Esdras ang iya tagipusuon sa pag-usisa sang kasuguan ni Jehova kag sa paghimo sini.” (Esd. 7:10) Paano naton mahanda ang aton tagipusuon sa pagbaton sang pagtudlo nga ginaaman ni Jehova? Samtang ginatan-aw mo ang mga titulo sang nagkalainlain nga mga bahin nga nalista sa naimprinta nga programa, pamangkuta ang imo kaugalingon, ‘Ano ang ginasugid ni Jehova sa akon paagi sa sini nga programa? Paano ko magamit ang impormasyon agod makabenepisyo ako kag ang akon pamilya?’ (Isa. 30:21; Efe. 5:17) Padayon nga ipamangkot ini sa bug-os nga kombension. Isulat ang mga punto nga ginaplano mo nga gamiton. Maghinguyang sing tion nga binagbinagon ini pagkatapos sang sesyon kada adlaw. Magabulig ini sa imo nga madumduman kag maaplikar ang impormasyon.

⁶ Ang pagkonsentrar sa sulod sang pila ka oras sa isa ka tion indi mahapos. Ano ang makabulig sa aton agod mabatuan ang huyog nga maglagaw ang hunahuna? Gamita sing mapuslanon ang ikasarang sang mata. Sa daku nga kasangkaron, kon diin naton ginatuon ang aton mga mata, kuhaon sini ang aton igtalupangod. (Mat. 6:22) Gani, batui ang huyog sa pagliso sang imo ulo sa tanan nga gahod ukon hulag. Hupti ang imo mga mata nga natuon sa humalambal. Sundi sa imo kopya sang Biblia kon ginabasa ang isa ka kasulatan, kag hupti nga bukas ang imo Biblia samtang ginabinagbinag ang teksto.

⁷ Ang Cristianong gugma magapahulag sa aton nga likawan ang pagtublag sa iban samtang may programa. (1 Cor. 13:5) “Tion [ini] sa paghipos” kag sa pagpamati. (Manugw. 3:7) Busa, likawi ang di-kinahanglanon nga pagpakighambal kag paglakatlakat. Buhini ang pagkadto sa kasilyas paagi sa pagplano sing abanse. Indi magkaon ukon mag-inom tubtob sa gintalana nga tion, magluwas kon kinahanglanon bangod sang serioso nga problema sa panglawas. Ang mga cellular phone, pager, camcorder, kag kamera indi dapat paggamiton sa paagi nga makatublag sa iban. Dapat maghisugot ang mga ginikanan nga ang ila bug-os nga pamilya⁠​—⁠pati na ang mga tin-edyer​​—⁠magalingkod sing ululupod agod maatipan nila sing nagakaigo ang ila mga kabataan.​—⁠Hulu. 29:15.

⁸ Sang nagligad nga tuig ang isa ka gulang nga nagatambong sa mga kombension sa sulod sang madamo nga dekada nagkomento: “Para sa akon, ini nga kombension tumalagsahon bangod sa isa ka rason. Ang halos tanan nga tumalambong nagakuha sing mga nota, pati na ang magagmay nga mga kabataan. Makalilipay ini tan-awon. Ang Biblia ginagamit kon ginapangabay sang mga humalambal nga buksan ini sa pila ka teksto.” Ining maukod nga pagpamati dalayawon gid. Wala lamang ini nagahatag sing benepisyo sa aton kag sa aton kaupod nga mga delegado sa kombension kundi labaw sa tanan nagahimaya sa aton Dakung Instruktor, si Jehova nga Dios.​—⁠Isa. 30:20.