Mahuluy-on Ka Bala?

¹ Wala kita nagakatingala kon makakita kita sing isa ka bata nga nagalili sa aton sa likod sang iya iloy ukon amay. Ang pagkamahuluy-on kinaugali sa pagkabata. Bisan sa pagkahamtong, madamo ang medyo mahuluy-on sing kinaugali. Kon naapektuhan sang pagkamahuluy-on ang imo pagpakigbahin sa ministeryo, ano ang sarang mo himuon?

² Paglandas sa Kahuluy-on: Importante nga talupangdon ang “tinago nga pagkatawo sang tagipusuon.” (1 Ped. 3:4) Pabakura ang imo gugma kay Jehova kag sa imo isigkatawo. Makumbinsi sing maayo nga ang pagtuman sa pagbantala nga hilikuton amo ang isa sang labing maayo nga mga paagi sa pagpakita sing nagasakripisyo-sa-kaugalingon nga gugma. Himud-usi ang maayo nga rutina sang personal nga pagtuon kag pagtambong sa mga miting. Tayuyon kag espesipiko nga mangamuyo sing bulig ni Jehova. Ang malig-on nga pagtuo kag pagsalig sa iya magapabakod sang kompiansa kag magahatag sing “labi pa nga kaisog sa paghambal sang pulong sang Dios nga walay kahadlok.”​—⁠Filip. 1:⁠14.

³ Batui ang mga balatyagon nga indi sangkol sa paghimo sing pila ka butang. Ginkinahanglan anay ini nga himuon ni Timoteo. Ginpalig-on ni Pablo si Timoteo nga “indi pagtugutan nga tamayon sang bisan sin-o ang [iya] pagkapamatan-on,” nagpahanumdom sa iya nga “ang Dios wala maghatag sa aton sang espiritu sang katalaw, kundi sang gahom.” (1 Tim. 4:​12; 2 Tim. 1:7) Si Timoteo gingamit anay sing bug-os ni Jehova, nga magagamit man sa imo kon manikasog ka nga mag-uswag nga may bug-os nga pagsalig sa Iya.​—⁠Sal. 56:⁠11.

⁴ Ang pagpamalandong sa teksto sang Biblia, subong sang Mateo 10:​37, nagbulig sa isa ka utod nga babayi nga bangod sang iya pagkamahuluy-on, nahadlok sia sa iya nagapamatok nga bana. Bangod sang pagpadayon niya walay sapayan sang pagpamatok, ang ministeryo nangin mas mahapos para sa iya, kag sang ulihi ang iya bana, iloy, kag mga utod nagbaton tanan sang kamatuoran!

⁵ Ang Paghanda Kinahanglanon: Ang imo pagsalig labi nga magadugang kon ginahandaan mo sing maayo ang ministeryo. Magpili sing isa ka simple nga presentasyon gikan sa Reasoning nga libro ukon sa nagligad nga mga guwa sang Ang Aton Ministeryo sa Ginharian, tun-i ini, kag ensayuha. Sa baylo nga pamensaron ang di-kinahanglanon nga kabalaka, maghunahuna sing positibo. Magkuha sing kaisog paagi sa pagpangabudlay sing suod sa iban. Dumduma nga madamo sang mga tawo nga masugilanon mo sa mga ganhaan ang mahuluy-on, kaangay mo. Ang tanan nagakinahanglan sang mensahe sang Ginharian.

⁶ Kon mahuluy-on ka, indi madulai sing paglaum. Samtang nagapangabudlay ka, si Jehova magabulig sa imo nga mangin isa ka epektibo nga manugbantala sing maayong balita. Nian magakalipay ka sa imo ministeryo.​—⁠Hulu. 10:⁠22.