Bag-ong Programa sa Sirkito nga Asambleya

Nahibaluan naton nga si Jehova nga Dios takus sang aton gugma kag sang aton eksklusibo nga debosyon. Apang, ang kalibutan nagatinguha sa pagsulay sa aton agod indi naton mahuptan ang aton suod nga kaangtanan sa iya. (Juan 17:14) Agod papag-unon ang aton gugma kay Jehova kag agod pabakuron kita nga batuan ang mga butang sang kalibutan nga nagabutang sa katalagman sang aton espirituwalidad, ang tema sang bag-ong programa sa sirkito nga asambleya para sa 2001 amo ang “Higugmaa ang Dios​—⁠Indi ang mga Butang Sang Kalibutan.”​—⁠1 Juan 2:​15-17.

Ang tudok nga gugma kay Jehova nagapahulag sa aton sa pagpanaksi tuhoy sa iya. Walay sapayan sina, ang pag-alagad sa latagon indi mahapos para sa madamo nga katawhan sang Dios. Sa bahin nga “Ang Gugma sa Dios Nagapahulag sa Aton sa Ministeryo Naton,” hibalua kon paano nalandas sang madamo ang pagkamahuluy-on kag ang iban pa nga mga balagbag agod makapakigbahin sing bug-os sa sining hilikuton.

Paano kita naimpluwensiahan sang nagausmod nga mga talaksan sang kalibutan? Ang mga buhat nga ginkabig anay nga malaut ginatawag na karon subong normal nga paggawi. Ang pamulongpulong nga “Ang mga Nagahigugma kay Jehova Nagadumot Sang Malain” kag ang simposium nga “Mga Butang sa Kalibutan​—⁠Paano Naton Ini Ginatamod?” magapalig-on sang aton determinasyon nga pangindian ang sayop nga mga kailigbon.

Ang modelo nga Teokratikong Eskwelahan sa Pagministro kag Miting sa Serbisyo ilakip sa programa, subong man ang sumaryo sang pagtuon sa artikulo sang Lalantawan para sa semana. Ang pamulongpulong publiko, “Kon Paano Ginadaug Sang Gugma kag Pagtuo ang Kalibutan,” magapalig-on sa aton nga ilugon si Jesus sa pagbato sa kalibutanon nga mga pag-ipit. (Juan 16:33) Pat-ura nga agdahon ang inyo mga estudyante sang Biblia sa pagtambong. Ang bisan sin-o nga luyag magpabawtismo dapat magpahibalo sa gilayon sa nagadumala nga manugtatap agod ang kinahanglanon nga mga kahimusan sarang mahimo.

Ining sirkito nga asambleya magatuon sang aton igtalupangod sa kon diin gid dapat isentro ang aton gugma agod maagom ang bugana nga mga pagpakamaayo ni Jehova. Tambungi ini tanan!