Hupti ang Maayo nga Paggawi nga Nagahimaya sa Dios
1 Bisan diin man kita, ang aton paggawi, pamayo, kag pamustura nagapanaksi tuhoy sa aton kag sa Dios nga ginasimba naton. Makita ini ilabi na sa dalagku nga mga pagtinipon sang katawhan sang Dios, diin madamo nga tawo ang nagatan-aw sa aton. Kon huwaran kita, ang ngalan ni Jehova ginahimaya. (1 Ped. 2:12) Apang, ang indi maayo nga paggawi ukon di-mapatugsilingon nga mga buhat sa bahin sang pila lamang makahatag sing pasipala sa ngalan sang Dios kag sa iya katawhan. (Manugw. 9:18b) Ang pagdumdom nga paagi sa aton paggawi ginahukman sang mga tagaguwa ang aton organisasyon kag ang Dios nga aton ginasimba dapat magpahulag sa aton nga mangin mahunahunaon ‘sa paghimo sang tanan nga butang sa kahimayaan sang Dios.’—1 Cor. 10:31.
2 Nagakaigo nga Hitsura sa Kombension: Bisan ano man nga sahi sang pasilidad ang ginagamit, dapat ini tamdon subong isa ka daku nga Kingdom Hall sa tion sang kombension. Ang nagakaigo nga pamayo kag pamustura dapat makita subong sang kon nagatambong kita sa mga miting sa aton lokal nga kongregasyon. Sa tion kag pagkatapos sang mga sesyon sang kombension, dapat likawan sang mga kauturan ang pagsuksok sang di-maugdang ukon sunod-sa-moda nga mga panapton, nga nagapabanaag sang espiritu sang kalibutan kag nagapabudlay sa aton nga makilal-an subong tuhay sa maayo nga paagi. Ang mga sister dapat maghalong nga ang estilo kag kalabaon sang ila mga palda kag mga bayo nagakaigo nga maugdang. (1 Tim. 2:9, 10) Nagatambong man sa kombension, nagadayon sa otel, nagakaon sa restawran, ukon nagapamalaklon sa isa ka balaligyaan, dapat naton pirme ipabanaag nga mga ministro kita sang Dios, nga wala nagahatag sing kabangdanan para sa kasandaran.—2 Cor. 6:3.
3 Ang bawtismo himuon sa Sabado sang aga sa kombension. Ginalaragway sang Abril 1, 1995, Lalantawan, pahina 30, ang panimuot nga dapat naton ipakita sa sina nga okasyon. Ini nagasiling nga ‘dapat naton tamdon ang bawtismo upod ang nagakaigo nga pagkaserioso. Indi ini tion sang magahod nga mga pagpabutyag sing emosyon, sang sinalusalo, ukon sang kinasadya. Apang indi man ini tion sang pagkasubo.’ Indi gid nagakaigo para sa mga bawtismuhan nga magsuksok sing malip-ot kaayo ukon indi desente nga inugpaligo, babayi man ukon lalaki. Gani, dapat ipakita sang tanan ang pagkaserioso kag kalipay sang Cristianong bawtismo.
4 Magbalon sing Pagkaon sa Kombension: Ang Sosiedad nagapangabay nga magbalon kita tanan sang aton kaugalingon nga panyaga sa tagsa ka adlaw sang kombension. Ginsunod sang kalabanan nga mga kauturan ini nga instruksion kag nakita nila nga pagkatapos sang sesyon sa udto, makalingkod sila upod sa ila pamilya kag makakaon sang ila balon sa sina nga adlaw. Madamo ang nagkomento nga ang higayon nga makapahunayhunay sa udto kag makahinguyang sing dugang pa nga tion upod sa ila mga kauturan nangin makalilipay. Ang isa ka rason kon ngaa ginsulit ini nga instruksion amo nga natalupangdan namon nga ang pila ka kauturan nagabiya sa awditoryum sa pagbakal sing pagkaon sa mga manugbaligya sa higad-dalan kag sa malapit nga fast-food nga mga establisamento. Kon ang tanan nga kauturan magbalon sa baylo nga magbakal sa mga manugbaligya sa guwa, ini nga mga manugbaligya indi na magatipon sa palibot sang mga ganhaan sang pasilidad sang kombension, nga nangin kabangdanan sang pagginutok kag indi ini maayo tan-awon.
5 Indi Tion sa Pagnegosyo: Sanglit ang lugar nga ginahiwatan sang kombension nangin isa ka daku nga Kingdom Hall sa sulod sang tatlo ka adlaw, ang bisan sin-o nga nagatambong indi dapat magnegosyo. Indi nagakaigo para kay bisan sin-o nga utod nga hingalitan ang kombension agod itanyag ang iya negosyo, ukon magbaligya sing mga butang, subong sang mga panghapin sang libro ukon kamiseta, kuyab, ukon kalendaryo nga naimprintahan sang ngalan sang kombension.
6 Paghupot nga Matinlo sang Ginahiwatan sang Kombension: Kon ang tagsa ka utod maghaboy sang iya mismo basura sa nagakaigo nga mga basurahan ukon magdala sini sa balay, mahapos huptan nga matinlo ang pasilidad sang kombension. Kon may nakita ka nga sagbot sa duta, pudyuta ini dayon. Dapat hanason sang mga ginikanan ang ila mga kabataan nga indi maghaboy sing sagbot sa salog kundi sa paghaboy sini sing nagakaigo. Kon makaboluntaryo ka sa makadali sa pagbulig sa pagtinlo sang pasilidad pagkatapos sang mga sesyon kada adlaw, ginapasalamatan gid ini.
7 Si Pedro nagapahanumdom sa aton ‘kon ano bala nga sahi sang mga tawo dapat mangin amo kita sa balaan nga paggawi kag sa mga buhat sang diosnon nga debosyon.’ (2 Ped. 3:11) Kabay nga ang aton mga pulong kag mga buhat sa “Mga Manugtuman Sang Pulong Sang Dios” nga Distrito nga Kombension magabulig sa bunayag-sing-tagipusuon nga mga manugpanilag nga hibaluon kag simbahon ang aton daku nga Dios, nga takus sang tanan nga kadungganan kag himaya.—1 Cor. 14:24, 25.