United by Divine Teaching—Isa ka Pagtan-aw sa Matuod nga Paghiusa sang mga Kauturan
Isa ka manugtatap sa sirkito ang nagtambong sa pagtuon sa Biblia sang isa ka babayi nga wala pa nagatambong sa mga miting sang kongregasyon. Gin-agda niya sia sa pagtan-aw sing video nga United by Divine Teaching. Sadto nga semana nagtambong sia sa miting kag nagsiling sia nga nalipay gid sia nga nakakadto sia didto. Ngaa nakatigayon sing madasig nga resulta ining video? Nagdayaw sia sa paglaragway sini sang aton hamili nga utudnon nga paghiusa sa tunga sang masingki, madinumtanon nga kalibutan.—Juan 13:35.
Tan-awa ining video agod makita kag mabatyagan ang paghidait kag gugma nga ginaagom sang mga Saksi ni Jehova sa bug-os nga duta. Nian pamalandungi ining mga pamangkot:
(1) Ngaa ang “Divine Teaching” isa ka nagakaigo nga tema para sa 1993-94 nga mga kombension?—Miq. 4:2.
(2) Ano ang kahulugan sang kamatuoran sang Biblia sa iban nga mga pamilya? Ano ang kahulugan sini sa imo pamilya?
(3) Ngaa importante nga matudluan ni Jehova?—Sal. 143:10.
(4) Ano nga sahi sang mga hangkat ang dapat atubangon sa paghanda para sa dalagku nga internasyonal nga mga kombension?
(5) Paano mo nakita ang katumanan sang Salmo 133:1 kag Mateo 5:3 sa Cristianong mga kombension nga natambungan mo?
(6) Ano ang dayag nga pamatuod sang daku nga mga epekto sang panudlo sang Dios?—Bug. 7:9.
(7) Ano ang pinakamadamo nga pagbawtismo sa matuod nga mga Cristiano?
(8) Ano nga mga pulong nanday Miqueas, Pedro, kag Jesus ang natuman sa mga Saksi ni Jehova?
(9) Ano ang pamatuod nga ang isa ka malipayon kag nahiusa nga pamilya indi lamang isa ka dalamguhanon para sa imo?
(10) Kay sin-o mo ipatan-aw ining video, kag ngaa?
Sa tapos matan-aw ining video, matahom ini nga ginsumaryo sang isa ka utod nga babayi: “Ang video magabulig gid sa akon agod dumdumon pirme nga tuman kadamo nga Cristianong kauturan sa bug-os nga kalibutan ang mainunungon nga nagaalagad kay Jehova sini gid nga tion. . . . Daw ano gid ka hamili ang aton utudnon nga paghiliusa!”—Efe. 4:3.