“Mangin Manggaranon sa Maayong mga Buhat”

¹ Sa hingapusan nga mga tuig sang iya makugi nga ministeryo, suod nga nanghikot si apostol Pablo upod kanday Timoteo kag Tito. Sa kada isa sa ila, nagsulat sia sing magkaanggid nga mga pulong sang pagpalig-on. Ginsilingan niya si Tito nga “ang nagatuo sa Dios” dapat “magpatuhoy sang ila painuino sa paghimo sing maayong mga buhat.” (Tito 3:⁠8) Ginsugiran niya si Timoteo nga ang mga nagalaum sa Dios dapat “mangin manggaranon sa maayong mga buhat.” (1 Tim. 6:​17, 18) Maayo gid ini nga laygay para sa aton tanan! Apang ano ang magapahulag sa aton sa paghimo sing maayong mga buhat sa aton kabuhi? Kag anong espesipiko nga mga hilikuton ang mahimo naton sa maabot nga mga inadlaw?

² Ang motibasyon nga mangin manggaranon sa matarong nga mga buhat nagagikan sa aton pagtuo kag gugma kay Jehova kag gikan sa matahom nga paglaum nga ginahatag niya sa aton. (1 Tim. 6:​19; Tito 2:11) Ilabi na sa sini nga tion sang tuig, ginapahanumdom kita nga ginpadala ni Jehova ang iya Anak sa duta agod nga mabindikar ni Jesus ang iya Amay kag mabuksan ang dalan padulong sa kabuhi nga walay katapusan sa takus nga mga tawo. (Mat. 20:28; Juan 3:16) Ipaathag gid ini sing maayo sa pagsaulog sang Memoryal sang kamatayon ni Cristo sa Marso 28. Bilang balos sa aton paglaum nga matigayon ang kabuhi nga walay katapusan, wala bala kita napahulag sa paghimo sang aton bug-os nga masarangan nga “mangin manggaranon sa maayong mga buhat”? Sa pagkamatuod napahulag gid kita! Anong mga hilikuton ang mahimo naton karon?

³ Maayong mga Buhat nga Pagahimuon sa Marso kag sa Palaabuton: Pat-od nga matambong kita sa Memoryal​​—⁠ang pinakaimportante nga okasyon sang tuig para sa mga Saksi ni Jehova sa bug-os nga kalibutan. (Luc. 22:19) Apang luyag naton ipaambit ang kalipay sini nga okasyon upod sa pinakamadamo nga tawo kon mahimo. Tan-awa ang report sa pag-alagad sa 2002 Yearbook, kag makita mo nga sang nagligad nga tuig sa madamo nga kadutaan sa bug-os nga duta, ang nagtambong sa Memoryal tatlo, apat, lima, ukon kapin pa ka pilo sa kadamuon sang mga manugbantala. Pat-od nga nangin mapisan gid ang tanan nga katapo sang mga kongregasyon sa pagpanagtag sing mga imbitasyon para sa Memoryal sa bug-os nila nga teritoryo. Busa, luyag naton maghinguyang sing madamo nga tion kutob karon tubtob sa Marso 28 sa pag-agda sa mga tawo sa Memoryal, sa amo mabuligan sila nga makatuon tuhoy sa ginalauman nga kaluwasan.

⁴ Masami nga maayo ang tiempo kon Abril kag bakasyon ini sang mga nagaeskwela. Paano naton mapanginpuslan ining kahigayunan agod “mangin manggaranon sa maayong mga buhat”? Paagi sa mapagsik nga pagpakigbahin sa pagbantala sing maayong balita, sa amo “makugi sa maayong mga buhat.” (Tito 2:​14; Mat. 24:14) Kon wala ka maka-auxiliary payunir sang Marso, puwede ka bala sa Abril kag/ukon Mayo? Kon payunir ka na sa Marso, makapadayon ka bala?

⁵ Natalupangdan sang pila nga nagatrabaho nga makahinguyang sila sing isa ka oras ukon kapin pa pakadto sa ulubrahan, nga nagapanaksi sa higad-dalan ukon nagaduaw sa mga tawo nga nagatrabaho sa mga lugar sang negosyo nga bukas na sa kaagahon. Ginagamit sang iban ang bahin sang ila oras sa tigpalanyaga sa pagpanaksi. Nahimo sang iban nga maghiwat sing pagtuon sa Biblia upod sa kaupod sa trabaho sa sini nga inoras. Madamong kauturan nga mga ginang sang puluy-an ang nagapain sing tion para sa pag-alagad sa latagon samtang yara sa eskwelahan ang ila kabataan. Paagi sa pagbugtaw sing mas temprano sa mga pila ka adlaw agod sa paghimo sang mga buluhaton sa balay, may kapin sila nga tion sa adlaw para sa pagbantala kag pagtudlo nga hilikuton.​​—⁠Efe. 5:​15, 16.

⁶ Bisan pa wala ka sa kahimtangan nga maka-auxiliary payunir, ayhan makahimo ka sing personal nga iskedyul agod nga makapakigbahin ka sa ministeryo sing dugang pa, nga ginahimo ang imo bug-os nga masarangan “nga maghimo sing maayo, nga mangin manggaranon sa maayong mga buhat, nga mangin maalwan, handa sa pagpaambit” sang kamatuoran sa iban.​​—⁠1 Tim. 6:⁠18.

⁷ Dumduma ang Maayo nga Hilikuton nga Paghimo sing Disipulo: Kada tuig may interesado nga mga tawo nga nagatambong sa Memoryal. Posible bala nga hatagan sing igtalupangod sang pila sa kongregasyon ang makatambong nga wala pa nagatuon? Sarang bala sila maduaw agod buligan sila nga mag-uswag sa espirituwal? Mahimo nga ang pila sa sining tumalambong sa Memoryal mga paryente sang mga Saksi. Ang iban mahimo nga mga indibiduwal nga nakatuon na sang una kag kinahanglan lamang palig-unon agod padayunon liwat ang pagtuon kag magtambong sa mga miting sing regular. Makalilipay gid nga makita sila nga mangin aktibo nga mga alagad ni Jehova kaupod naton!

⁸ Bangod sang kapin nga pagpakigbahin sa ministeryo sa Marso kag sa palaabuton, mahimo gid nga mas madamo nga interesado nga tawo ang aton maduaw liwat. Tinguhai nga bilinan sila sang isa ka pamangkot. Nian pasaliga sila nga sabton mo ini sa masunod nga pagduaw. Kon himuon naton ini, ang dalan mahanda para sa pagduaw liwat. Mas maayo kon indi naton pagpadugayon ang pagduaw liwat. Kon indi kita makasugod sing pagtuon sa una nga pagduaw, dapat naton tinguhaan nga makasugod sa masunod nga pagduaw kon mahimo.

⁹ Kon nagapanaksi kita sa higad-dalan, dapat tinguhaan gid naton nga masugilanon ang mga tawo. Madamo nga manugbantala ang ginhatagan sing mga ngalan, direksion, kag numero sang telepono sang mga tawo nga ila nasumalang sa pagpanaksi sa kalye. Kon ang imo nasugilanon wala nagapuyo sa inyo teritoryo, magkuha sang pormas nga Please Follow Up (S-43) sa Kingdom Hall, sulatan ini, kag ihatag ini sa sekretaryo sang kongregasyon, nga amo ang magapadala sini sa kongregasyon nga nagasakop sang teritoryo nga ginaistaran sang interesado. Kon indi ini mahimo sang sekretaryo, ipadala niya ining pormas sa sanga talatapan agod atipanon ini. Sa sining paagi, mapalambo ang interes.

¹⁰ Kon numero lamang sang telepono ang natigayon, maghimo sing isa ka pagduaw liwat paagi sa pagtelepono sa indibiduwal. Ihanda sing abanse kon ano ang luyag mo nga hambalan ninyo. Ihanda ang imo Reasoning nga libro para sa madasig nga reperensia. Ang iban nangin madinalag-on sa pagtuon sa mga indibiduwal paagi sa telepono, lakip na yadtong mabudlay maabtan sa ila puluy-an. Isa ka utod nga babayi ang nagsugod sa pagpangayo sing mga numero sang telepono sang interesado nga mga babayi nga iya nasumalang sa pamalaybalay, kag subong resulta nakasugod sia sing duha ka pagtuon sa Biblia.

¹¹ Magkooperar sa mga Gulang sa Pagbulig sa mga Di-aktibo: Interesado gid ang mga gulang sa paghatag sing mahigugmaon nga atension sa mga di-aktibo. Ang pila sa ila, kinabubut-on nga nagtambong na liwat sa mga miting sa kongregasyon. Narealisar nila nga dapat sila makig-upod sing suod sa organisasyon ni Jehova agod nga matigayon ang kalig-unan sa espirituwal nga ginalaragway sa Salmo 91. Ang pila sini sa ila handa na liwat sa pag-alagad sa latagon. Kon ang iban nga di-aktibo matambong sa Memoryal sini nga bulan, mahimo nila batunon ang personal nga pagtuon sa Biblia. Kon amo sini ang matabo, ang mga gulang magahimo sing kahimusan nga may isa nga magtuon sa luyag magpabulig. Kon ginapangabay ka nga magbulig sa sini nga paagi, pabaloran gid ang imo kooperasyon.​​—⁠Roma 15:​1, 2.

¹² Padayuna ang “Paghimo sing Maayong mga Buhat”: Madamo sa mga nakaauxiliary payunir sa isa ka bulan ukon kapin pa ang nakamutik nga nag-uswag pa ang ila pagpanghikot sa mga nagsunod nga binulan. Nasalapuan nila ang interesado nga mga tawo nga sa pamatyag nila dapat balikan. Nagpahulag ini sa ila nga maghimo sing kapin pa nga panikasog sa pagguwa sa latagon sing mas masunson agod maduaw liwat ang mga interesado. Ang iban nakasugod sa pagtuon, kag nakabulig ini sa ila nga madugangan pa ang pagpakigbahin sa ministeryo.

¹³ Ang iban pa nakasapo sing daku gid nga kalipay sa pagbantala kag paghimo sing disipulo nga hilikuton amo nga napahulag sila nga binagbinagon kon ano ang ila mga prioridad. Subong resulta, ginbuhinan sang pila ang ila oras sa sekular nga trabaho kag nangin dalayon nga auxiliary payunir. Ang iban nakasulod sa regular payunir nga pag-alagad. Ginpahamtang nila ang ila paglaum sing bug-os sa Dios kag indi sa mga butang nga mahatag sang kalibutan. Nasapwan nila nga ang “mangin maalwan, handa sa pagpaambit,” nagaresulta sa bugana nga pagpakamaayo ni Jehova kag nagapalig-on sang ila paglaum nga matigayon ang “matuod nga kabuhi.” (1 Tim. 6:​18, 19) Sa pagkamatuod, samtang nagadamo ang nagapayunir, ang bug-os nga kongregasyon nagabenepisyo. Ang mga payunir masami nagasugid sang ila mga eksperiensia kag nagaagda sa iban sa pag-upod sa ila sa ministeryo, kag nagatuga ini sang maayong espirituwal nga kahimtangan sa kongregasyon.

¹⁴ Kabay nga tanan kita “mangin manggaranon sa maayong mga buhat” sa sining panahon sang Memoryal kag sa palaabuton pa paagi sa pagdugang sang aton pagpakigbahin sa Cristianong ministeryo. Ipakita naton ang aton pagkamapinasalamaton sa ginhimo ni Jehova sa aton nga naghatag sa aton sing paglaum nga magkabuhi sing dayon sa isa ka matarong nga bag-ong duta.​​—⁠2 Ped. 3:⁠13.