“Magbuhat Kita sing Maayo sa Tanan”

¹ “Ibantala Sing Bug-os ang Pulong Sang Dios” kag “Mangin Manggaranon sa Maayong mga Buhat” amo ini ang mga tema nga gingamit sa Pebrero kag Marso 2002 nga mga suplemento sang Ang Aton Ministeryo sa Ginharian. (Col. 1:​25; 1 Tim. 6:​18) Ginpalig-on kita sadtong mga isyu nga maghimo sing dugang pa nga panikasog sa pagbulig sa mga interesado nga magtambong sa Memoryal, sa pagbulig sa mga di-aktibo nga makig-upod liwat sa kongregasyon, kag sa pagbulig sa aton mga kabataan kag sa kuwalipikado nga mga estudyante sa Biblia nga mag-umpisa sa pagbantala sing maayong balita. Walay duhaduha nga nangin madinalag-on kita bangod sang aton mapisan nga pagpanikasog. Karon, “samtang may kahigayunan kita sa sini, magbuhat kita sing maayo sa tanan” sing padayon.​—Gal. 6:​10.

² Agdaha Sila nga Magtambong Liwat: Sa Pilipinas, ang kapin sa 280,000 nga nagatambong sa Memoryal kada tuig indi mga manugbantala sang maayong balita. Bisan pa nga ang ila pagtambong nagapakita nga may interes sila, ano ang dapat naton himuon agod nga mapahulag ang mga “husto nga napahamtang para sa kabuhi nga walay katapusan” nga mangin “mga tumuluo”? (Binu. 13:48) Palig-unon sila nga magtambong gilayon sa mga miting sang kongregasyon.

³ Ngaa indi mo agdahon ang isa ka interesado nga tawo nga magtambong sa Pagtinuon Sang Kongregasyon sa Libro agod makapakigbahin sa makapainteres nga paghinun-anon sang tagna ni Isaias? Kon ang interesado paryente mo ukon kakilala kag may nakaiskedyul ka nga bahin sa palaabuton nga Teokratikong Eskwelahan Para sa Ministeryo, puwede mo sia agdahon sa pagtambong agod mapamatian ang imo bahin. Sugiri sia sang mga tema sang mga pamulongpulong publiko nga ihatag sa masunod nga mga semana. (Ang suno-sa-tion nga iskedyul dapat itapik sa information board.) Mangita sing kahigayunan nga mapukaw ang handum sining tawo nga simbahon si Jehova. Kag sa pagkamatuod, kon wala pa sing nagatuon sing Biblia upod sa iya, puwede mo sia agdahon nga magtuon.

⁴ Padayon nga Palig-una ang mga Di-aktibo: Madamo sa mga nagatambong sa Memoryal ang nakadedikar na kay Jehova. Apang, sa pila ka kabangdanan nag-untat sila sa aktibo nga pagbantala sang maayong balita. Sa pihak nga bahin, ginlaygayan kita ni Pablo nga ‘magbuhat sing maayo sa mga may labot sa aton sa pagtuo.’ (Gal. 6:​10) Busa, ang dapat naton panguna nga kabalak-an amo ang mga di-aktibo.

⁵ Ayhan ang iban nakigbahin na liwat sa ministeryo bangod sang pagpalig-on sang mga gulang kag sang iban pa. Kon gintangduan ka sang mga gulang nga manghikot upod sa ginpaaktibo liwat nga manugbantala, dumduma nga ang imo gugma kay Jehova kag sa ministeryo sa latagon amo ang magapabakod sang iya kompiansa. Ipakita sa iya kon paano ka nagapanghikot sa nanuhaytuhay nga bahin sang ministeryo nga sa amo magkalipay man sia sa sini, magpadayon sa pagbantala nga hilikuton, kag makabaton man sing mga pagpakamaayo ni Jehova.

⁶ Hatagi ang Bag-o nga mga Manugbantala sing Isa ka Maayong Panugod: Sang marealisar sang bag-o lang nangin interesado nga babayi nga nasapwan niya ang matuod nga organisasyon sang Dios, luyag niya magsugod gilayon sa pag-alagad. Matapos matun-an ang ginapatuman sa iya, nagsiling sia: “Luyag ko na magsugod gilayon.” Kon ang isa sang imo ginatun-an sa Biblia naaprobahan na sa pagpakigbahin sa pag-alagad sa latagon, buligi sia nga makita ang pagkinahanglan nga “magsugod gilayon,” kag sa amo mahatagan ang bag-ong manugbantala sing maayong panugod. Buligi sia sa pagpalambo sing isa ka rutina sang paghanda kag sa pagpakigbahin sing regular sa ministeryo sa latagon kada semana.

⁷ Kon anak mo ang nangin bag-ong di-bawtismado nga manugbantala, manghikot upod sa iya agod mag-uswag nahisuno sa iya edad kag ikasarang. Kag sa diutay mo nga bulig, mahimo nga masorpresa ka niya kon paano sia makapakigsugilanon sing madinalag-on sa iban, makabasa gikan sa Biblia, kag makatanyag sing literatura. Kon may makita sia nga interesado, hanasa sia sa pagduaw liwat kag sa pagtatap sing interes.

⁸ Pasangkara ang Imo Kaugalingon nga Ministeryo: Ginapahanugutan bala sang imo kahimtangan nga madugangan pa ang imo pagpakigbahin sa pag-ebanghelyo nga hilikuton bisan pa pagkatapos sang panahon sang Memoryal? Madugangan mo bala sing isa ukon duha ka oras kada semana ang imo naandan nga ginahinguyang sa pag-alagad? Nagatan-aw ka bala sing abanse sa kalendaryo kon san-o ka naman makaauxiliary payunir liwat? Ukon mabag-o mo bala ang imo estilo sang pagkabuhi agod makasulod ka sa bug-os tion nga ministeryo? Ang tanan naton nga panikasog sa ministeryo mahimo magbulig sa iban nga batunon ang kamatuoran! (Binu. 8:​26-​39) Samtang ginapaabot naton ang masunod nga mga inadlaw, “himuon [naton] pirme ang maayo sa isa kag isa kag sa tanan.”​—1 Tes. 5:​15.

[Kahon sa pahina 3]

Padayon nga Buligan:

□✔ Ang mga nagtambong sa Memoryal

□✔ Ang ginpaaktibo liwat nga mga manugbantala

□✔ Ang bag-ong di-bawtismado nga mga manugbantala