Paayawi ang Imo Espirituwal nga Kinahanglanon
1 Ang aton nagapakari nga “Makugi nga mga Manugbantala Sang Ginharian” Distrito nga Kombension nagahatag sa aton sing isa ka tumalagsahon nga kahigayunan agod mapaayawan ang aton espirituwal nga kinahanglanon. Kaangay sang makapapagros nga pisikal nga pagkaon, pat-od gid nga ang programa makapapagros sa aton sa espirituwal paagi sa “mga pulong sang pagtuo.” (1 Tim. 4:6) Magapasuod pa gid ini sa aton kay Jehova. Kag makabaton kita sing laygay kag pagpalig-on nga magabulig sa aton nga mabatas ang mga pagtilaw sa aton kabuhi. Si Jehova nagapasalig sa aton: “Hatagan ko ikaw sing paghantop kag tudluan ikaw sa dalanon nga dapat mo laktan. Laygayan ko ikaw nga ang akon mata nagatulok sa imo.” (Sal. 32:8) Malipayon gid kita nga ginatuytuyan niya kita sing mahigugmaon! Binagbinaga ang pila ka praktikal nga mga tikang agod labi nga makabenepisyo kita gikan sa mga programa sang kombension.
2 Kinahanglan nga Ihanda Naton ang Aton Tagipusuon: Tanan kita may responsabilidad nga amligan ang aton malaragwayon nga tagipusuon. (Hulu. 4:23) Nagakinahanglan ini nga disiplinahon naton ang aton kaugalingon kag dapat mangin bunayag sa aton ginabatyag. Ang kombension isa ka tion nga mapamalandungan naton ang aton kaangtanan kay Jehova, isa ka tion sa ‘pagtan-aw sa himpit nga kasuguan nga natungod sa kahilwayan.’ Agod mahanda ang aton tagipusuon sa ‘pagbaton sang pagpatudok sang pulong,’ dapat makiluoy kita kay Jehova nga usisaon kita, nga ipakita sa aton ang bisan ano nga “makasakit nga dalanon” nga nagakinahanglan sing pagtadlong, kag nagatuytoy sa aton sa “dalan sang tion nga walay latid.”—Sant. 1:21, 25; Sal. 139:23, 24.
3 Mamati kag Magpamalandong: Gindayaw ni Jesus si Maria bangod namati sia sing maayo sa iya ginhambal, nga nagasiling: “Ginpili ni Maria ang maayo nga bahin, kag indi ini pagkuhaon sa iya.” (Luc. 10:39, 42) Kon may kaanggid kita nga panghunahuna, indi naton pagtugutan ang diutay nga mga butang nga magtublag sa aton. Pat-uron naton nga magapungko kita kag mamati sa bug-os nga programa. Likawan naton nga makigsugilanon ukon maglakatlakat nga indi kinahanglanon kag maghalong nga indi matublag ang iban sang mga cellular phone, pager, kamera, kag mga camcorder.
4 Kon nagapamati sa mga pamulongpulong, maayo nga magkuha kita sing malip-ot nga mga nota agod mabuligan kita sa pag-analisar kon paano ginapaathag ang topiko. Dapat naton iangot ang aton nabatian sa aton na nahibaluan. Magabulig ini sa aton nga mahangpan kag madumduman ang materyal. Kon nagarepaso sang mga nota, kinahanglan himuon naton ini sa tuyo nga iaplikar ang materyal. Tagsa sa aton makapamangkot: ‘Ano ang epekto sini sa akon kaangtanan kay Jehova? Ano nga mga pagbag-o ang akon kinahanglan nga himuon sa akon kabuhi? Paano ko maaplikar ini nga impormasyon sa akon mga pagpakig-angot sa iban? Paano ko ini magamit sa akon ministeryo?’ Hambali upod sa iban ang mga punto nga aton naluyagan. Ang paghimo sini nga mga butang magabulig sa aton nga mahuptan ang mga pinamulong ni Jehova sa ‘tunga sang aton tagipusuon.’—Hulu. 4:20, 21.
5 Iaplikar Naton ang Aton Natun-an: Pagkatapos makatambong sa isa ka distrito nga kombension, ang isa ka delegado nagsiling: “Ang programa naaplikar gid sa personal nga kabuhi sang isa, nga nagapahulag sa iya nga usisaon ang kahimtangan sang iya tagipusuon kag sang iya pamilya, kag maghatag sing mahigugmaon nga Makasulatanhon nga bulig kon kinahanglanon. Labi pa nga narealisar ko ang akon obligasyon nga buligan pa gid ang kongregasyon.” Mahimo nga amo man sini ang ginbatyag sang madamo sa aton. Apang indi pa bastante nga napalig-on kag napaumpawan kita. Si Jesus nagsiling: “Kon nahibaluan ninyo ini nga mga butang, malipayon kamo kon himuon ninyo ini.” (Juan 13:17) Dapat naton himuon ang mga punto nga naaplikar sa aton. (Fil. 4:9) Amo ini ang yabi nga mapaayawan naton ang aton espirituwal nga kinahanglanon.
[Kahon sa pahina 5]
Magpamalandong sa Imo Nabatian:
■ Ano ang epekto sini sa akon kaangtanan kay Jehova?
■ Paano sini naapektuhan ang akon mga pagpakig-angot sa iban?
■ Paano ko ini maaplikar sa akon kabuhi kag sa akon ministeryo?