Daku Bala ang Teritoryo sang Inyo Kongregasyon?
1 Gikan sa mga siudad sa Judea tubtob sa mga kaumhan sang Galilea, nagpanaksi si Jesus sing maid-id sa malapad nga teritoryo sang dumaan nga Israel. (Mar. 1:38, 39; Luc. 23:5) Dapat man naton ipakigsugilanon ang maayong balita sa pinakamadamo nga tawo nga masarangan naton. (Mar. 13:10) Apang, indi ini mahapos. Ngaa?
2 Madamo nga kongregasyon sa Pilipinas ang may teritoryo nga nagalinapta sa malapad nga mga duog, ang kalabanan sini mga bukid kag mabudlay lab-uton. Ano ang sarang naton mahimo agod mabuligan ang mga tawo nga nagapuyo sa sining malapad nga mga teritoryo nga makatuon sang kamatuoran tuhoy kay Jehova, kay Jesus, kag sa Ginharian?
3 Magplano sing Maayo: Dapat dumalahan sang manugtatap sang pag-alagad kag sang nagatatap sa teritoryo ang panikasog sang kongregasyon agod mahimo ang pinakamaayo. Ayhan maiskedyul ang pinasahi nga mga Sabado sa diin ang kalabanan makahinguyang sing isa ka bug-os nga adlaw nga pagpanghikot. Kon nagapanghikot sa malayo nga mga teritoryo, planuha nga magpadugay sa pag-alagad sa latagon kon posible, nga nagabalon sing palanyagahon. Mahimo kamo magtipon sa pag-alagad sing temprano sangsa kinaandan agod may bastante nga tion para sa paglakbay sa teritoryo ukon hiwaton ang miting sa pag-alagad sa duog nga mas malapit sa teritoryo. Maghimo sing kahimusan nga magpanghikot sa mga kaumhan sa panahon nga mas maayo ang tiempo kag maayo ang dalan.
4 Kon may nahibaluan ang mga gulang nga malapit nga kongregasyon nga masami nagatuptop sang ila teritoryo, mahimo nila sila agdahon nga mag-upod sa inyo sa pagpanghikot sa malayo nga mga teritoryo, ilabi na sa panahon sing tingadlaw. Ining kooperasyon mahimo mangin makalilipay kag mabungahon.
5 Pat-ura nga magdala sing supisyente nga literatura. Kon talagsa lang ginatuptupan ang teritoryo, nagakaigo nga bilinan sing isa ka tract ukon isa ka daan nga magasin ang mga balay nga wala sing tawo. Hatagi sing tract nga Luyag Mo Bala Madugangan ang Imo Nahibaluan sa Biblia? ang tanan mo nga masumalang.
6 Magkooperar sing Bug-os: Ang pagpanghikot sa daku nga teritoryo nagakinahanglan sing kooperasyon sang bug-os nga kongregasyon. Kon kinahanglanon ang malayo nga paglakbay, mahimo mag-inamutay sa gasolina. Kinahanglan ang paghantop kon makasapo ikaw sing tagbalay nga maluyag makigsugilanon sing malawig. Dapat dumdumon mo pirme nga ang tanan sa teritoryo dapat malab-ot, kag dapat ka maghatag sing konsiderasyon sa mga nagahulat sa imo grupo. Kon luyag mo nga padayunon ang pagpakigsugilanon sa isa ka interesado sing malawig, puwede ayhan maghimo sing kahimusan nga ang iban indi na kinahanglan maghulat?
7 Maghimo sing mga kahimusan nga matatap ang mga nagpakita sing interes. Isulat ang direksion agod nga makapadayon ka sa pagpanaksi paagi sa sulat. Kon ang dalan sa uma wala sing ngalan ukon ang mga balay wala sing numero, magdrowing sang isa ka mapa ukon palatandaan kon paano makita ang interesado nga tawo sa pagduaw liwat.
8 Daw ano ka hamili ang aton pribilehiyo nga tumanon ang instruksion ni Jesus: “Bisan diin nga siudad ukon minuro nga inyo sudlan, pangitaa ninyo kon sin-o didto ang takus”! (Mat. 10:11) Sigurado gid nga padyaan ni Jehova ang imo panikasog samtang kinabubut-on mo nga ginahatag ang imo kaugalingon sa sining labing makapaladya nga hilikuton!