Kon ang mga Tawo Wala sa Ila Balay
1. Ano ang kinaandan nga hangkat sa pamalaybalay nga ministeryo?
1 Sa madamong duog nangin mas mabudlay nga maabtan ang mga tawo sa ila balay. Sa sining “makahalanguyos nga mga tion,” madamo ang napilitan nga magtrabaho sing malawig nga oras agod matigayon ang panguna nga mga kinahanglanon. (2 Tim. 3:1) Ang iban wala sa ila balay bangod nagapamalaklon ukon nagalingawlingaw. Paano naton masugiran sing maayong balita ini nga mga tawo?
2. Paano naton mapat-od nga matatap ang mga balay nga wala sing tawo?
2 Maghupot sing Maayong mga Rekord: Ang una nga tikang amo ang paglista sang mga balay nga wala sing tawo. Importante gid ini kon pirme kamo nagapanghikot sa inyo teritoryo. Ginalista mo bala ang ngalan sang kalye, imo ngalan, kag ang petsa? Mahimo ka magsulat sing dugang pa nga impormasyon kon ikaw ukon ang iban nga manugbantala magabalik sa pagbantala sa mga balay nga wala sing tawo. Pagkatapos sang pagpanaksi, ihatag gid ang rekord sa utod nga nagaatipan sang teritoryo, luwas kon magsugot sia nga panghikutan mo ang mga balay nga wala sing tawo. Maggamit sing tuhay nga listahan sa pagrekord sang bisan anong interes nga imo masapwan agod nga imo ini maduaw liwat.
3. Ano ang pila ka panugda agod masugilanon ang mga tawo nga wala sa ila balay?
3 Tilawi ang Iban nga Tion: Ayhan ang iban nga wala sa adlaw sang ila trabaho mahimo nga yara sa ila balay kon gab-i ukon sa mga talipuspusan sang semana. Mahimo mo bala mapahisuno ang imo iskedyul agod makabalik sa mas nagakaigo nga tion? (1 Cor. 10:24) Kon indi, mahimo mo ihatag ang imo listahan sang mga balay nga wala sing tawo sa isa ka manugbantala nga sarang makaduaw sa iban nga tion. Ukon, mahimo mo sulatan ukon teleponohan ang mga tawo nga wala sa ila balay. Ang mga manugbantala nga nalimitehan sa pagpakigbahin sa pamalaybalay nga hilikuton bangod sang di-maayo nga panglawas mahimo nga malipay sa pagbulig sa imo sa sini nga paagi.
4. Ano ang nagapakita nga importante gid ang pagbalik sa mga balay nga wala sing tawo?
4 Ang isa ka kahimtangan nagapakita nga importante gid ang pagpanikasog nga masugilanon ang mga tawo nga wala sa balay. Pagligad sang tatlo ka tuig nga pagbalikbalik sang mga manugbantala sa isa ka balay, nasugilanon gid man ang tagbalay. Nahibaluan nga nagahulat man sia sa amo sina kalawig nga tion sang isa ka Saksi nga magaduaw agod mapadayon niya ang iya pagtuon sa Biblia sang una antes sia magsaylo sa sina nga duog.
5. San-o makabig nga natapos na ang isa ka teritoryo?
5 Tapusa ang Teritoryo: San-o makabig nga natapos na ang teritoryo? Sa kinaandan, natapos na ini kon ginhimo na ang nagakaigo nga panikasog agod masugilanon ang isa ka tawo sa kada balay. Mahimo nga nagakaigo nga magbilin sang tract ukon daan nga magasin nga indi makita sang mga nagalabay sa mga balay nga wala sing tawo, ilabi na sa mga teritoryo nga talagsa ginapanghikutan. Dapat matapos ang teritoryo sa sulod sang apat ka bulan. Nian ilista ini agod mabag-o sang alagad sang teritoryo ang iya mga rekord.
6. Ngaa dapat naton panikasugan nga masugiran sang maayong balita ang tanan sa aton teritoryo?
6 Luyag gid naton nga mahatagan sing kahigayunan nga makatuon sa pagtawag sa ngalan ni Jehova kag maluwas ang madamo nga tawo. (Roma 10:13, 14) Lakip ini sa mga natabuan nga wala sa ila balay sa tion sang aton pamalaybalay. Kaangay ni apostol Pablo, handuma gid nga “magpanaksi sing maid-id sa maayong balita tuhoy sa di-bagay nga kaayo sang Dios.”—Binu. 20:24.