Bag-ong Programa Para sa Pinasahi nga Adlaw nga Asambleya
1 Samtang ginahimaya sang media kag sang sekular nga mga edukador ang materyal nga manggad, ginapalig-on kita sang Pulong sang Dios nga “Mangin Manggaranon sa Maayong mga Buhat.” (1 Tim. 6:18) Amo ini ang tema sang programa para sa pinasahi nga adlaw nga asambleya sugod sa Pebrero 2003. Ano nga pagpalig-on ang mabaton naton sa sini nga asambleya?
2 Binagbinagon sang manugtatap sa sirkito kon ano ang buot silingon sang “Mangin Manggaranon sa Pagtamod Sang Dios,” kag interbyuhon niya ang pila nga nagapanikasog sa pagtigayon sing espirituwal nga mga manggad. Sa iya una nga pamulongpulong, ang nagaduaw nga humalambal magapakita kon paano ang katawhan sang Dios nagahimo sing “Maayong mga Buhat sa Sining Tion Sang Tig-alani.” Tanan kita palig-unon nga binagbinagon kon paano kita makapakigbahin sing labi pa sa hatag-Dios nga hilikuton nga pagpangani nga ginahimo karon.
3 Nalipay gid kita kon makita naton ang Cristianong mga pamatan-on nga nagatinguha sang espirituwal nga mga manggad! Nagahimaya ini kay Jehova kag nagabulig sa mga pamatan-on nga makapahamtang sing maayo nga pundasyon para sa mga pribilehiyo sa pag-alagad sa palaabuton. Ang bahin nga “Pagdayaw sa mga Pamatan-on Tungod Sang Maayong mga Buhat sa Pagdayaw kay Jehova” magapadaku sa maayong mga buhat sang lamharon nga mga Cristiano sa ila duog.
4 Ano ang mga resulta sang pagtinguha sa maayong mga buhat? Binagbinagon ini sang nagaduaw nga humalambal sa iya katapusan nga pamulongpulong, “Magpadayon sa Maayong mga Buhat kag Aniha ang mga Pagpakamaayo ni Jehova.” Binagbinagon niya ang apat ka bahin diin nagaani kita sing bugana nga mga pagpakamaayo: (1) subong mga indibiduwal, (2) subong mga pamilya, (3) subong isa ka kongregasyon, kag (4) subong isa ka bug-os kalibutan nga organisasyon.
5 Ang mga nagdedikar na kay Jehova may kahigayunan nga mabawtismuhan. Kon handa ka na sa paghimo sini nga tikang, pahibalua gilayon ang nagadumala nga manugtatap.
6 Kon mapahibalo na ang petsa sang inyo asambleya, planuha gilayon ang pagtambong. Panikasugi nga mag-abot sing temprano agod makapakigbahin sa nagabukas nga ambahanon kag pangamuyo. Ang pagtambong kag pagpamati sa bug-os nga programa sang pinasahi nga adlaw nga asambleya magapalig-on sa aton nga magpadayon sa pagtinguha sing isa ka dalanon nga magapamanggaranon gid sa aton gikan sa pagtamod sang aton Dios, si Jehova.