Ang Pagtinuon sang Kongregasyon sa Libro—Kon Ngaa Kinahanglan Naton Ini
1. Paano nagsugod ang kahimusan sa Pagtinuon Sang Kongregasyon sa Libro?
1 Sang 1895, ang mga grupo sang pagtinuon sang mga Estudyante sa Biblia, subong amo ang pagtawag sa mga Saksi ni Jehova sadto, nakilal-an nga Dawn Circles for Bible Study. Gingamit ang mga tomo sang Millennial Dawn subong basihan sa pagtuon. Sang ulihi ining mga miting gintawag nga Berean Circles for Bible Study. (Bin. 17:11) Masami nga nagatipon ang diutay nga grupo sa pribado nga puluy-an sa isa ka gab-i nga kombeniente sa grupo. Ining mga miting amo ang ginsugdan sang Pagtinuon Sang Kongregasyon sa Libro.
2. Paano kita makaamot sa “pagbayluhanay sing pagpalig-on” sa pagtinuon sa libro?
2 Pagpalig-on kag Bulig: Bangod hungod nga ginapagamay ang mga grupo sa pagtinuon sa libro, may daku nga kahigayunan nga mapabutyag sing dayag sang mga nagatambong ang ila pagtuo paagi sa ila mga komento. Ang resulta amo ang “pagbayluhanay sing pagpalig-on . . . , ang kada isa paagi sa pagtuo sang iban.”—Roma 1:12.
3, 4. Paano makabulig sa aton ang kahimusan sa pagtinuon sa libro agod matuman ang aton ministeryo?
3 Ang pagpanilag sa paagi sang pagpanudlo sang manugtatap sa pagtinuon sa libro makabulig sa aton nga ‘magamit sing matadlong ang pulong sang kamatuoran.’ (2 Tim. 2:15) Talupangda kon paano niya ginapadaku ang Kasulatan nga ginbasihan sang materyal. Kon nagakaigo sa publikasyon nga ginabinagbinag, mahimo nga ipadaku ang yabi nga mga punto paagi sa paghimo sing nagatakop nga repaso, nga nagagamit lamang sing Biblia. Ang iya maayo nga halimbawa makabulig sa aton nga mapauswag ang aton pagpanudlo sa Cristianong ministeryo.—1 Cor. 11:1.
4 Dugang pa sa pagdumala sing pagtinuon kada semana, ang manugtatap sa pagtinuon sa libro nagapanguna sa pagbantala. Nagakooperar sa manugtatap sa pag-alagad, nagahimo sia sing nagakaigo nga mga kahimusan sa pag-alagad sa latagon. Ginatinguhaan niya nga buligan ang tanan sa grupo nga matuman ang ila Cristianong responsabilidad nga magbantala sing maayong balita kag maghimo sing mga disipulo.—Mat. 28:19, 20; 1 Cor. 9:16.
5. Ano nga personal nga bulig ang sarang matigayon gikan sa pagtinuon sa libro?
5 Ang manugtatap sa pagtinuon sa libro interesado sa espirituwal nga kaayuhan sang kada isa sa grupo. Ginapakita niya ining interes sa mga miting sa kongregasyon kag samtang nagapangabudlay sia upod sa iban sa pag-alagad sa latagon. Ginapanginpuslan man niya ang mga higayon kon nagaduaw sa mga kauturan sa ila puluy-an agod maghatag sing espirituwal nga pagpalig-on. Indi dapat mangalag-ag ang tanan sa pagpalapit sa manugtatap sa pagtinuon sa libro kon nagakinahanglan sila sing bulig sa espirituwal.—Isa. 32:1, 2.
6. (a) Paano napalig-on sang pagtipon sa magagmay nga mga grupo ang aton mga kauturan sa pila ka duog? (b) Paano ka mismo nakabenepisyo sa kahimusan sang pagtinuon sa libro?
6 Magpalig-unay sa Isa kag Isa: Sa mga duog nga ginadumilian ang hilikuton sang katawhan sang Dios, ang mga kauturan masami nga nagatipon sa magagmay nga mga grupo. Ang isa ka utod naghinumdom: “Bisan pa nga gindumilian ang amon Cristianong hilikuton, kon posible ginahiwat namon ang amon semanal nga mga miting sa mga grupo nga nagadamo sing mga 10 tubtob 15. Natigayon namon ang espirituwal nga kusog gikan sa mga miting, sa amon pagtuon sa Biblia kag sa amon pagpakig-upod pagkatapos sang pagtuon. Ginakomparar namon ang amon mga eksperiensia, kag nagbulig ini sa amon nga marealisar nga pareho gali ang amon kabudlayan.” (1 Ped. 5:9) Kabay nga kita man magapalig-unay sa isa kag isa paagi sa pagsakdag sing bug-os sa kahimusan sang Pagtinuon Sang Kongregasyon sa Libro.—Efe. 4:16.