Bulig sa Husto nga Tion

¹ Sang nakita ni apostol Pedro nga kinahanglan pabakuron ang mga masigkatumuluo, ginpahulag sia sang kabalaka agod hatagan sila sing mahigugmaon nga mga pahanumdom kag pagpalig-on. (2 Ped. 1:​12, 13; 3:⁠1) Ginpalig-on niya ‘yadtong may pagtuo’ nga padayunon nila ang pagpalambo sang ila espirituwal nga mga kinaiya agod indi mangin “di-aktibo ukon di-mabungahon may kaangtanan sa sibu nga ihibalo tuhoy sa aton Ginuong Jesucristo.” (2 Ped. 1:​1, 5-8) Tuyo ni Pedro nga buligan sila nga mangin pat-od ang pagtawag kag pagpili sa ila ni Jehova, agod ‘sa katapusan masapwan niya sila nga walay dagta kag walay kasawayan kag sa paghidait.’ (2 Ped. 1:​10, 11; 3:14) Para sa madamo, ang iya pagpalig-on isa ka bulig sa nagakaigo nga tion.

² Sa karon, may amo man nga kabalaka ang Cristianong mga manugtatap sa katawhan sang Dios. Sa sining “makahalanguyos nga mga tion nga mabudlay pakigbagayan,” madamo sang mga alagad ni Jehova ang dapat magbatas sang mabudlay nga mga kahimtangan. (2 Tim. 3:⁠1) Bangod sang mga problema sa pinansial, pamilya, ukon personal, ang iban mahimo magbatyag subong ni David: “Ginpalibutan ako sang mga kalamidad tubtob nga indi na ini maisip. Naabtan ako sang madamo pa nga mga sayop ko nga kapin pa sangsa makita ko; nangin madamo pa sila sa mga buhok sang akon ulo, kag ginbiyaan ako sang akon tagipusuon.” (Sal. 40:12) Ining mga pag-ipit mahimo nga mangin mabug-at gid amo nga mahimo pasapayanan nila ang importante nga espirituwal nga mga butang kag mag-untat sa pagpakigbahin sa Cristianong ministeryo. Apang, walay sapayan sang ila mga kabudlayan, ‘wala nila ginkalimtan ang mga sugo ni Jehova.’ (Sal. 119:176) Karon na ang husto nga tion nga dapat buligan sila sang mga gulang.​​—⁠Isa. 32:​1, 2.

³ Agod mahatag ining kinahanglanon, ginapalig-on ang mga gulang nga maghimo sing pinasahi nga panikasog agod buligan yadtong wala na nagapakigbahin sa pagbantala. Ang daku nga panikasog agod himuon ini nasugdan na kag magapadayon tubtob sa bulan sang Marso. Ang mga manugtatap sang Pagtinuon sa Libro ginapangabay nga duawon ang mga di-aktibo agod buligan sila sa espirituwal nga padayunon liwat ang pagpanghikot nila upod sa kongregasyon. Kon kinahanglan, tun-an sila sa Biblia. Ang iban nga mga manugbantala mahimo pangabayon nga magbulig. Kon ginapangabay ikaw nga himuon ini, mangin mapuslanon gid ang imo mga panikasog, ilabi na gid kon ang imo pagpalig-on ihatag sing mainayuhon kag mahinangpanon.

⁴ May rason nga magkalipay ang tanan kon may isa nga magpadayon liwat sa pagpanghikot upod sa kongregasyon. (Luc. 15:⁠6) Ang aton mga panikasog nga palig-unon ang mga di-aktibo mahimo gid nga mangin “pulong nga napamulong sa husto nga tion.”​​—⁠Hulu. 25:11.