Si Jehova Takus Gid nga Dayawon
Ang Panihapon sang Ginuo Saulugon sa Abril 16
1 Nagadugang ang aton kalangkag samtang nagahilapit ang Abril 16, 2003. Sa sina nga gab-i dumdumon naton ang kamatayon ni Jesus, upod sa minilyon ka masigkasumilimba sa bug-os nga duta agod himayaon ang ngalan ni Jehova. Takus si Jehova sang aton tanan nga pagdayaw bangod sining makalilipay nga aman nga gawad. Paagi sa sini, ihatag niya ang makalilipay nga mga pagpakamaayo sa tanan nga matinumanon nga katawhan. Bug-os tagipusuon nga nagabuylog kita sa salmista sa pagsinggit: “Daku si Jehova kag takus gid nga dayawon.”—Sal. 145:3.
2 Tion ini sa pagpamalandong sa kaayo sang Dios kag sa kadakuon sang aton pagpasalamat kay Jehova sa pagpadala sang “iya bugtong nga Anak sa kalibutan agod maagom naton ang kabuhi paagi sa iya.” (1 Juan 4:9, 10) Ang matinumanon nga pagsaulog sa Panihapon sang Ginuo nagapatudok sa aton tagipusuon nga “si Jehova mainayuhon kag maluluy-on . . . kag daku sa mahigugmaon nga kaayo.” (Sal. 145:8) Sa pagkamatuod, ang gawad amo ang labing daku nga pagpakita ni Jehova sing gugma para sa tanan nga katawhan. (Juan 3:16) Kon ginapamalandungan naton ang gugma sang Dios kag ginahunahuna ang malig-on nga integridad ni Jesus, mapahulag kita nga dayawon si Jehova. Tubtob sa walay katubtuban, dayawon naton sia bangod sang iya wala latid nga gugma nga ginpakita paagi sa paghimo nga mangin posible para sa aton ang kabuhi nga wala sing katapusan.—Sal. 145:1, 2.
3 Buligi ang Iban nga Madayaw si Jehova: Ang apresasyon sa superlatibo nga dulot sang Dios nga gawad nagapahulag sa aton nga agdahon ang iban nga magbuylog sa aton sa pagdayaw kay Jehova. Ang salmista gin-inspirar sa pagsulat: “Sa pagsambit sang imo bugana nga pagkaayo makunyag sila sa paghambal, kag bangod sang imo pagkamatarong magahugyaw sila sa kalipay.” (Sal. 145:7) Sang nagligad nga tuig lamang, ang mga Saksi ni Jehova sa bug-os nga duta nakahinguyang sing kapin sa isa ka bilyon ka oras sa pagbantala nga hilikuton. Ano ang resulta sang ila pagpanikasog? Kada semana, may promedyo nga kapin sa 5,100 ka indibiduwal ang nabawtismuhan bilang simbulo sang ila dedikasyon kay Jehova. Bangod may kabug-usan nga 15,597,746 ang nagtambong sa Memoryal, lakip ang kapin sa 9 milyones nga wala pa makasugod sa pagdayaw kay Jehova subong mga manugbantala sang maayong balita, may daku gid nga posibilidad sa pag-uswag! Subong mga manugbantala sang Ginharian, ginapakabahandi naton ang aton pribilehiyo sa pagbantala sing maayong balita kag sa pagpaliso sa tagipusuon sang iban kay Jehova, sa iya Anak, kag sa Ginharian.
4 Ang isa ka maayo nga paagi nga mapalig-on ang iban sa pagpadungog kay Jehova amo ang pag-agda sa ila nga magbuylog sa aton sa pagsaulog sang Panihapon sang Ginuo. Nalista mo na bala ang luyag mo agdahon kag ang iban pa nga kinahanglan pahanumdumon sang petsa kag oras? Naagda mo na bala ang tanan nga yara sa imo listahan? Kon wala pa, panikasugi nga maagda sila samtang may tion pa. Pahangpa sila sang katuyuan sang pagsaulog. Samtang yara sa duog nga ginahiwatan sini, mangin alisto sa pagtamyaw sa mga bisita. Pabatyaga sila nga ginaabiabi, ipakilala sila sa iban, kag hatagi sila sing komendasyon bangod sang ila pagtambong.
5 Mahimo mapahulag ang mga bag-uhan nga mag-uswag sa espirituwal kon magtambong sila sa Memoryal. Ang isa ka estudyante sa Biblia nga may post-traumatic stress disorder, nga mabudlay gid para sa iya nga makig-upod sa kadam-an, nagtambong sa Memoryal. Sang ginpamangkot kon ano ang iya masiling sa miting, sia nagsiling: “Balaan gid yadto nga gab-i, kag nakatambong ako.” Sugod sadto, nagtambong na sia sa mga miting.
6 Pagkatapos Sang Memoryal: Paano mabuligan ining mga interesado agod mangin mga dumalayaw ni Jehova? Dapat tatapon sang mga gulang ang mga bag-uhan nga nagtambong sa Memoryal kag maghimo sing mga kahimusan para sa kalipikado nga mga manugbantala nga magduaw sa ila pagkatapos sang Memoryal agod repasuhon ang mga butang nga ila natun-an kag napanilagan. Ang pila basi maluyag sang isa ka pagtuon sa Biblia sa ila puluy-an. Dapat man sila agdahon nga magtambong sa tanan semanal nga mga miting sa kongregasyon, bangod ang regular nga pagtambong makadugang sang ila ihibalo sa Biblia.
7 May mga kahimusan nga ginahimo agod palig-unon ang tanan nga indi regular kag mga di-aktibo sa pagtambong sa mga miting sing regular. Kon ginpangabay ka sang mga gulang nga buligan ang di-aktibo nga makaguwa liwat sa latagon, mangin handa sa pagbaton. Ang pagpakita sinang mahigugmaon nga kabalaka sa aton mga kauturan nahisuno sa laygay ni apostol Pablo: “Samtang may kahigayunan kita sa sini, magbuhat kita sing maayo sa tanan, apang labi na gid sa mga may labot sa aton sa pagtuo.”—Gal. 6:10.
8 Kabay nga tanan kita magapanikasog gid nga makatambong sa Memoryal sa Abril 16. Indi naton luyag nga mawasi ining labing balaan nga okasyon agod dayawon si Jehova. Huo, karon kag tubtob sa walay katubtuban, dayawon naton si Jehova bangod sang iya daku nga mga buhat!—Sal. 145:21.