‘Nagasiga Subong mga Sulo’
1 Sa tunga sang kadulom sa espirituwal kag moral sang sistema sang mga butang karon, mga anom ka milyon nga mga sumilimba sang matuod nga Dios, nga si Jehova, ang ‘nagasiga subong mga sulo’ sa 234 ka kadutaan sa bug-os nga kalibutan. (Fil. 2:15) Amo kon ngaa madali kita matalupangdan. Paano naton ginapabanaag ang hamili nga kapawa sang kamatuoran nga naghalin kay Jehova?—2 Cor. 3:18.
2 Ang Aton mga Buhat: Madali matalupangdan sang mga tawo ang aton paggawi. (1 Ped. 2:12) Ang isa ka babayi nagsiling nga ang iya kaupod sa trabaho nga Saksi mabuot kag mabinuligon kag wala nagapamuyayaw ukon nagakadlaw sa bastos nga mga lahog. Sang gintinguhaan sang pila nga paakigon ang Saksi paagi sa pagpamuyayaw sa atubangan niya, nagpabilin sia nga kalma apang malig-on sa kon ano ang husto. Ano ang epekto sini sa babayi? Sia naghinumdom: “Nagdayaw gid ako sa iya paggawi amo kon ngaa nagsugod ako sa pagpamangkot tuhoy sa Biblia. Nagtuon ako sa Biblia kag sang ulihi nabawtismuhan.” Sia nagdugang: “Ang iya paggawi amo ang nagbuyok sa akon nga usisaon ang ginapatihan sang mga Saksi ni Jehova.”
3 Bangod sang aton panimuot sa awtoridad, sang aton pagtamod sa kalibutanon nga mga buhat, kag sang aton makapalig-on nga hambal, nangin talalupangdon gid ang mga Saksi ni Jehova subong katawhan nga nagakabuhi suno sa mataas nga talaksan sang Biblia. Ining maayo nga mga buhat nagahimaya kay Jehova kag nagaganyat sa iban agod simbahon sia.
4 Ang Aton mga Pulong: Sa pagkamatuod, yadtong makakita sa aton maayo nga paggawi mahimo nga wala makahibalo kon ngaa tuhay kita magluwas kon ihambal naton sa ila ang aton mga pagpati. Nahibaluan bala sang imo mga kaupod sa trabaho ukon mga kabutho nga isa ikaw sang mga Saksi ni Jehova? Ginahimuslan mo bala ang kahigayunan nga makapanaksi bisan sa ordinaryo nga paghambalanay? Handum mo gid bala nga ‘paiwagon ang imo kapawa sa atubangan sang mga tawo’ sa tagsa ka nagakaigo nga okasyon?—Mat. 5:14-16.
5 Ang pagtuman sang aton komisyon subong mga manugdala sang kapawa nagakinahanglan sang pagkamasinakripisyuhon. Ang bug-os kalag nga panimuot magapahulag sa aton nga ipaiway ang indi tanto ka importante nga mga butang agod makapakigbahin kita, tubtob sa aton masarangan, sa nagaluwas kabuhi nga hilikuton nga pagbantala kag paghimo sing disipulo.—2 Cor. 12:15.
6 Paagi sa aton mga buhat kag mga pulong, kabay nga magpadayon kita sa pagsiga subong mga sulo. Kon himuon naton ini, mahimo mapahulag ang iban nga magbuylog sa aton agod dayawon si Jehova.