Mangin Halimbawa sa Maayong mga Buhat
1. Ngaa dapat gid kita mabalaka sa aton paggawi sa distrito nga kombension?
1 Kon magtipon kita sing tigdamo sa mga distrito nga kombension, labi nga matalupangdan ang aton paggawi kag ang aton pagtratar sa iban nga tawo. Busa, dapat gid talupangdon sang kada isa sa aton ang laygay sang Biblia: ‘Magpugong sa kaugalingon, sa tanan nga bagay magpakita ka sing huwaran sang maayong mga buhat.’ (Tito 2:6, 7) Ang ekstra nga panikasog mahimo kinahanglan agod ‘dili magtamod ang tagsa sa iya kaugalingon lamang nga mga butang, kundi man sa mga butang sang iban.’ (Filip. 2:4) Binagbinagon naton ang pila ka bahin nga sarang naton maaplikar ini sa aton nagapakari nga “Himayaa ang Dios” Distrito nga Kombension.
2. Ano dapat ang aton dumdumon kon tuhoy sa pagkaon?
2 Mga Kahimusan sa Pagkaon: Ginapakita naton ang maayo nga mga buhat kon magbalon kita sing simple nga panyaga kag indi pagtublagon ang aton mga tupad sa pulungkuan kon nagapanyaga. Pagpakita sing konsiderasyon kon likawan naton nga maula ang tubig ukon juice samtang nagakaon kag, kon nahimo ini sing di-hungod, dapat tinluan gilayon ini. Antes maghalin, dapat wala kita sing mabilin nga higko sa aton mga pulungkuan, subong sang pag-abot naton sa tilipunan sang aga.
3. Paano kita ‘makabuhat sing maayo ayon sa tanan nga tawo’ paagi sa pagkooperar sa mga attendant?
3 Palarkingan kag mga Attendant: Kon may salakyan ka, sunda gid ang mga attendant sa palarkingan, nagatuman sang ila mga instruksion kon diin iparking ang salakyan, bisan pa nga indi ini kombeniente sa imo. Sunda ang instruksion sang mga attendant kon tuhoy sa pulungkuan, nagadumdom nga ang pila ka pulungkuan ginapain para sa mga tigulang kag sa mga may kasablagan. Subong man, kon nagakuha sing bag-o ginpagua nga mga publikasyon, likawi nga magdaguso antes matapos ang sesyon agod mangin una sa linya, kundi hulata sing mapailubon nga matapos ang sesyon kag nian sunda ang mga instruksion sang tsirman sang sesyon kag mga attendant. Sa sining mga paagi ‘nagabuhat kita sing maayo ayon sa tanan nga tawo.’—Gal. 6:10.
4, 5. Paano madayaw sang kabataan si Jehova, kag ano ang responsabilidad sang mga ginikanan?
4 Mga Ginikanan kag Kabataan: Sa isa ka kalibutan nga madamo gid sing di-matinahuron nga mga pamatan-on, talalupangdon nga tuhay ang aton kabataan, kag ini nagadala sing kadayawan kay Jehova kag sa iya organisasyon. Apang, kon kaisa, nagautwas ang mga problema kon indi mabantayan sing maayo ang mga kabataan. (Hulu. 29:15) Indi dapat pagpabay-an sang mga ginikanan ang ila kabataan sa tion sang mga intermisyon.
5 Antes sang kombension nasapwan sang pila ka ginikanan nga mabuligon ang pagrepaso upod sa ila kabataan sang mga paggawi nga ginapaabot sa ila. (Efe. 6:4) Ginapahangop nila sa ila kabataan nga ang matuod nga Cristianong gugma ‘wala nagagawi sing di-nagakaigo’ ukon “wala nagapangita sang iya kaugalingon” nga kaayuhan. (1 Cor. 13:5) Ang distrito nga kombension isa ka tion nga ginpain agod tudluan kita ni Jehova, kag sarang mapakita sang kabataan kag mga adulto ang pagtahod sa sini nga kahimusan paagi sa ila paggawi sa duog nga ginahiwatan sang kombension kag bisan diin.—Isa. 54:13.
6. Ano ang epekto sang aton maayo nga paggawi sa iban?
6 Ang aton maayo nga paggawi makabulig gid nga madula ang sayop nga mga impresyon kag makabuyok sa mga tawo sa matuod nga pagsimba. (Mat. 5:16; 1 Ped. 2:12) Kabay nga ang tanan nga mapakig-angutan naton sa aton distrito nga kombension mapanaksihan sing paborable paagi sa aton paggawi kag pagpakig-angot sa ila. Sa sini ‘mapakita naton ang aton huwaran sang maayong mga buhat’ kag mahimaya si Jehova.—Tito 2:7.
[Kahon sa pahina 4]
Mangin Mapatugsilingon sa Iban
▪ Tinlui ang imo duog nga ginalingkuran antes maghalin
▪ Mangin mapailubon kon nagakuha sing bag-o ginpagua nga mga publikasyon
▪ Magkooperar sa mga attendant
▪ Bantayi sing maayo ang imo kabataan