Mangin Balaan sa Tanan Ninyo nga Paggawi
1. Ngaa importante gid nga mangin balaan sa tanan naton nga paggawi?
1 Subong mga alagad sang balaan nga Dios, si Jehova, ginatinguhaan naton nga mangin balaan sa tanan naton nga paggawi. (1 Ped. 1:15, 16) Nagakahulugan ini nga ginapanikasugan gid naton nga sundon pirme ang mga talaksan ni Jehova sa tanan nga bahin sang aton kabuhi. Nagahatag sing pinasahi nga kahigayunan ang distrito nga kombension sa sini nga tuig agod ipakita naton ang balaan nga paggawi.
2. Ngaa dapat naton talupangdon ang aton panagway kon nagahanda sa pagtambong sa distrito nga kombension?
2 Matinlo nga Panagway: “Pinakamaayo gid ang mga Saksi ni Jehova! Mainayuhon gid kag nakapanapot sing mahipid ang inyo mga katapo, kag ginapakita nila ang tudok nga pagtahod.” Amo sini ang ginsiling sang isa ka representante sang hotel sa isa ka distrito nga kombension sang nagligad nga tuig. Sa isa pa ka kombension, ang isa ka empleyado sang hotel nagsiling: “Maathag gid nga ang inyo mga katapo nagapanapot para sa Dios.” Huo, matalupangdan gid sang iban ang mga delegado sang kombension. Busa luyag naton magpanapot sa “paagi nga takus sa maayong balita.”—Fil. 1:27.
3. Ngaa isa gid ka hangkat ang pagpanapot kag ang pagpamustura sing matinlo?
3 Ang pagpakita sang katinlo sa aton panagway mahimo nga isa ka hangkat. Ginaimpluwensiahan sang imoral nga kalibutan ni Satanas ang katawhan agod mangin di-maugdang, maulag, kag mangin malaw-ay ang ila estilo sang panapton. (1 Juan 2:15-17) Gani, sa aton pagpanapot kinahanglan naton “sikwayon ang pagkadidiosnon kag kalibutanon nga mga handum kag magkabuhi nga may kaligdong sa hunahuna . . . sa tunga sining karon nga sistema sang mga butang.” (Tito 2:12) Indi gid naton luyag nga matublag ang iban bangod sang aton panagway, mga utod man naton sila, mga empleyado sang hotel ukon restawran, ukon iban nga mga tawo.—1 Cor. 10:32, 33.
4. Ano nga mga pamangkot ang makabulig sa aton nga mausisa ang aton panagway?
4 Maugdang, Mahipid nga Panapot: Kon nagahanda para sa kombension, pamangkuta ang imo kaugalingon: ‘Maugdang bala ang akon panapot, ukon makatublag bala ini sa iban? Nagapakita bala ini sang pagtahod sa balatyagon sang iban? Ang akon bala blusa wawa sa dughan ukon tuman kalip-ot? Nagahurma bala ukon pikit ang akon mga bayo? Nagakabagay bala ang akon panapton subong isa ka delegado sang kombension nga may badge card? Mahuya bala ako kon manaksi sing di-pormal bangod sang bayo nga akon ginasuksok kon nagalagawlagaw?’—Roma 15:2, 3; 1 Tim. 2:9.
5. Paano ang iban makabulig sa aton agod mangin putli ang aton panagway?
5 Makabenepisyo kita sa mga obserbasyon sang hamtong nga mga Cristiano. Dapat mamangkot ang mga asawa sa ila mga bana kon ano ang ila hitsura sa panan-aw sang iban. Ang diosnon nga mga ginikanan makabulig sa ila tin-edyer nga mga anak tuhoy sa sini. Dugang pa, ang matutom nga mga tigulang nga utod nga babayi sarang ‘makapahanumdom sa pamatan-on nga mga babayi nga mangin maligdong sing panghunahuna kag putli’ sa ila panagway “agod ang pulong sang Dios indi mapasipalahan.” (Tito 2:3-5) Ang aton mga publikasyon may mga retrato nga nagapakita sing panapton nga maugdang kag mahipid.
6. Ano ang nalakip sa maayong paggawi sa duog sang kombension?
6 Magmapatugsilingon sa Iban: Dapat nga mas maayo pa gid ang aton paggawi sa duog sang kombension. Palihug magkooperar sa panuytoy sang mga attendant, sa palarkingan man kag sa awditoryum. (Heb. 13:17) Dapat tingob ang pulungkuan sang mga pamilya sa baylo nga tugutan ang ila mga kabataan, lakip ang mga tin-edyer, nga magpungko sing silahanon lamang nga mga pamatan-on. Wala sing mga kagamitan sa pagrekord ang iangot sa mga pasilidad sang kombension kag sarang lamang ini gamiton nga wala nagatublag sa iban. Kon luyag mo magkuha sing retrato sa tion sang sesyon, dapat wala sing flash ang kamera. Ang mga pager kag cellphone dapat indi makatublag.
7. Paano makahimaya sa Dios ang aton paggawi sa mga kombension?
7 Ang aton paggawi nagapatuhay sa aton sa iban kag nagahimaya sa Dios. (1 Ped. 2:12) Sa kombension, makita sing maathag ang mga pagpanghikot sang mga Saksi ni Jehova. Busa, mangin determinado nga mangin balaan sa tanan ninyo nga paggawi.
[Retrato sa pahina 5]
Ipakita ang Balaan nga Paggawi
◼ Magsuksok sing bayo nga nagakabagay sa isa ka Saksi
◼ Bantayi sing maayo ang kabataan
◼ Magmapatugsilingon sa iban