Makasulod Ka Bala sa “Isa ka Daku nga Ganhaan nga Nagadul-ong sa Hilikuton”?

1. Anong “daku nga ganhaan nga nagadul-ong sa hilikuton” ang bukas para sa aton?

¹ Sang ang “isa ka daku nga ganhaan nga nagadul-ong sa hilikuton” nabuksan kay apostol Pablo, malangkagon nga ginkalitan gid niya ang kahigayunan agod mapalapnag ang mga intereses sang Ginharian bisan pa madamo sing manugpamatok. (1 Cor. 16:9) Sa karon, mga 642,000 na ka manugbantala sang Ginharian sa bug-os nga kalibutan ang nagsulod sa daku nga ganhaan sang hilikuton paagi sa pagregular payunir.

2. Ngaa maayo nga usisaon naton ang aton kahimtangan sa pulupanag-on?

² Pagbag-o Sang mga Kahimtangan: Bisan pa ginapunggan kita sa pagpanghikot sing kapin bangod sang aton mga kahimtangan karon, nagabag-o ang mga kahimtangan. Busa, maayo gid nga usisaon naton ang aton sitwasyon sa pulupanag-on kag indi maghulat nga mangin matawhay gid ang aton mga kahimtangan. (Man. 11:4) Isa bala ikaw ka pamatan-on nga bag-o lang naggradwar sa hayskul? Ang imo bala mga kabataan magaeskwela na? Manugretiro ka na bala sa imo sekular nga trabaho? Ini nga mga pagbag-o mahimo nga magatugot sa imo nga makatigayon sing bakante nga tion kag sa amo makaregular payunir. Ang isa ka utod nga babayi nga nakaagi sing balatian nagdesisyon nga magpayunir sa edad nga 89 anyos. Ngaa? Bangod kapin na sa isa ka tuig nga wala sia naospital, amo nga nagbatyag sia nga masarangan na sang iya panglawas nga magpayunir.

3. Paano naghimo sing mga pagbag-o ang pila agod makaregular payunir?

³ Sa kahimtangan ni Pablo, ang iya orihinal nga katuyuan kuntani amo ang pagduaw sa iya mga utod sa Corinto. Apang, ginbag-o niya ang iya mga plano tungod sa maayong balita. Madamo nga mga regular payunir karon ang naghimo sing pila ka mga pagbag-o agod nga makapayunir. Ginpasimple sang pila ang ila kabuhi, sa amo masakdag na nila ang ila mga kinahanglanon bisan pa part-time lang ang ila trabaho. Nalipay gid sila sa ila pribilehiyo sa pag-alagad. (1 Tim. 6:6-8) Ang pila ka magtiayon naghimo sing mga pagbag-o sa ila estilo sang kabuhi agod nga ang bana lamang ang magatrabaho, kag busa makapayunir ang asawa.

4. Ano ang himuon naton kon nagapangduhaduha kita nga indi naton malab-ot ang ginakinahanglan nga oras?

⁴ Indi gilayon pag-isikway ang handum nga magpayunir bangod sang kabalaka nga indi mo malab-ot ang ginakinahanglan nga oras. Kapin lang sa duha ka oras ang ginakinahanglan mo kada adlaw. Kon nagapangduhaduha ka nga indi mo ini masarangan, tilawi nga mag-auxiliary payunir sing isa ukon duha ka bulan kag himuon nga personal nga tulumuron ang paglab-ot sing 70 ka oras. Magatugot ini sa imo nga maeksperiensiahan ang kalipay sa pagpayunir. (Sal. 34:8) Makigsugilanon sa mga payunir. Mahimo nga nalandas nila ang mga kabudlayan nga kaanggid sa imo kabudlayan. (Hulu. 15:22) Pangabaya si Jehova nga pakamaayuhon ang imo mga panikasog sa pagpasangkad sang imo ministeryo.—1 Juan 5:14.

5. Ngaa ang pagregular payunir mapuslanon gid nga hilikuton?

⁵ Isa ka Mapuslanon nga Hilikuton: Madamo sing mga pagpakamaayo sa pagregular payunir. Magatugot ini sa imo nga maeksperiensiahan ang mas daku nga kalipay nga naggikan sa dugang pa nga paghatag. (Binu. 20:35) Ginapauswag sang pagpayunir ang imo ikasarang sa paggamit sing husto sang Pulong sang Dios. (2 Tim. 2:15) Madugangan ang imo mga kahigayunan nga maeksperiensiahan ang pagsakdag ni Jehova sa imo. (Binu. 11:21; Fil. 4:11-13) Mabuligan ka man sang pagpayunir nga mapalambo ang espirituwal nga mga kinaiya, subong sang pagbatas, kag mangin mas suod ka pa gid kay Jehova. (Sant. 4:8) Makasulod ka bala sa sining daku nga ganhaan sang hilikuton kag mangin regular payunir?