Ang Grupo nga Pagpanaksi Nagadala sing Kalipay
1 Sang ginpadala ang 70 ka disipulo sa pagbantala, gintudluan sila ni Jesus kon ano ang isiling, gin-organisar sila sa tigduha, kag ginhatagan sila sing teritoryo nga ila tuptupan. Nakaamot ini sa kalipay nga ila naeksperiensiahan. (Luc. 10:1-17) Sing kaanggid, ang grupo nga pagpanaksi karon nagabulig man nga masangkapan, maorganisar, kag mapalig-on ang katawhan sang Dios sa pagbantala nga hilikuton.
2 Ang mga Gulang Nagapanguna: Ang mga gulang may importante nga papel sa pagbulig sa tanan nga makapakigbahin sing regular sa pagbantala nga hilikuton. Ang manugtatap sa pag-alagad amo ang nagapanguna sa paghimo sing mga kahimusan para sa pagbantala sa tungatunga sang semana. Ang tagsa ka manugtatap sa pagtinuon sa libro amo ang responsable sa pag-organisar sa hilikuton sang iya grupo, ilabi na sa talipuspusan sang semana. Sa mga okasyon nga ang bug-os nga kongregasyon nagatipon para sa pag-alagad sa latagon, subong sang pagkatapos sang Pagtinuon sa Ang Lalantawan, ang tagsa ka manugtatap sa pagtinuon sa libro dapat mag-atipan sa mga kinahanglanon sang iya grupo.
3 “Nagakaigo kag Suno sa Kahimusan”: Ang isa nga gintangduan nga magdumala sang miting sa pag-alagad sa latagon dapat magsugod sing eksakto sa tion kag limitehan ang miting sa 10 ukon 15 minutos. Dapat organisahon niya ang mga grupo sa pagpanaksi kag mag-asayn sing teritoryo (magluwas kon ang mga manugtatap sang pagtinuon sa libro amo ang magaatipan sini, subong sang ginsambit kaina) antes sang nagatakop nga pangamuyo. Malikawan sini nga magtinumpok ang mga manugbantala sa teritoryo, nga nagapanubo sa dignidad sang aton hilikuton. Nahisuno man ini sa laygay ni Pablo: “Ang tanan nga butang himuon sing nagakaigo kag suno sa kahimusan.” (1 Cor. 14:40) Ang tanan nga nagatambong sa sining mga miting makabulig sa kadalag-an sini nga kahimusan paagi sa pag-abot sing temprano, pagkooperar sing bug-os sa isa nga nagapanguna, kag pagkadto gilayon sa teritoryo kon matapos na ang miting sa pag-alagad.
4 Nagasuod nga May Paghiusa: Ang mga kahimusan sa grupo nga pagpanaksi nagahatag sing isa ka ekselente nga kahigayunan nga makilala pa naton ang iban sa kongregasyon. Samtang indi malain kon may nakontrata ka na nga daan nga updan, makapaladya man kon magtambong kita sa mga miting sa pag-alagad sa latagon nga wala sing abanse nga mga kahimusan. Basi iasayn kita nga mag-upod sa isa nga wala naton makilala sing maayo, sa amo ‘mapasangkad’ naton ang aton gugma.—2 Cor. 6:11-13.
5 Ang grupo nga pagpanaksi nagapalig-on sa aton kag nagapasuod sa aton subong ‘mga masigkamanugpangabudlay sa kamatuoran.’ (3 Juan 8) Kabay nga makigbahin kita sing bug-os sa sini!