Bag-ong Programa sang Pinasahi nga Adlaw nga Asambleya
Sa karon, madamo gid nga impormasyon ang sarang matigayon agod mahuptan nga maayo ang kahimtangan sang aton literal nga tagipusuon agod mangin makalilipay kag maglawig ang aton kabuhi. Apang labi pa gid ka importante ang kahimtangan sang aton malaragwayon nga tagipusuon. Busa, sibu gid ang tema sang programa sang pinasahi nga adlaw nga asambleya nga magasugod sa Pebrero 2004: ‘Pag-alagad kay Jehova nga May Himpit nga Tagipusuon.’ (1 Cron. 28:9, NW) Ano ang mapaabot naton nga matun-an?
Binagbinagon sang manugtatap sang sirkito ang “Pagbulig sa Iban nga Alagaron si Jehova Upod ang Malipayon nga Kalag.” Ipadaku sang mga interbyu ang kalipay nga resulta sang pagpalambo sing interes kag pagdumala sing mga pagtuon sa Biblia. Wala sing duhaduha nga ang tanan nga tumalambong malugpayan kag mapalig-on sa una nga pamulongpulong sang nagaduaw nga humalambal, nga “Pag-amlig sa Aton Tagipusuon sa Puno Sing Problema nga Kalibutan.” Tapuson ang sesyon sa aga paagi sa pamulongpulong sa bawtismo.
Sa hapon, ang bahin nga “Paghatag Sing Bulig” magabinagbinag kon paano naton mabuligan ang iban. Ano ang sarang mahimo sang mga ginikanan agod amligan ang tagipusuon sang ila mga anak gikan sa malain nga mga impluwensia kag mabuligan sila nga mangin suod kay Jehova? Ang bahin nga “Buligi ang Imo Kabataan nga Magkalipay kay Jehova” magaaman sing praktikal nga mga panugda kag magapasundayag kon paano ini himuon.
Ginahimuslan bala naton ang tagsa ka aman ni Jehova agod mahuptan naton nga mapagros kag mabakod ang aton malaragwayon nga tagipusuon? Ang katapusan nga pamulongpulong sang nagaduaw nga humalambal, nga “Hupti ang Himpit nga Tagipusuon sa Pag-alagad kay Jehova,” magapatalupangod sang apat ka importante nga bahin sang aton rutina, nga magahupot sang aton espirituwalidad. Daw ano kadamo nga tion kag panikasog ang aton ginahinguyang sa hanuot nga pangamuyo, sa pagtuon sa Pulong sang Dios, sa makugi nga pagbantala, kag sa pagpakig-upod sa iban nga mga Cristiano? Sarang bala kita mag-uswag sa bisan diin sini nga bahin?
Si Jehova nagapangagda: “Ituhoy ang imo tagipusuon sa pagtudlo kag ang imo mga igdulungog sa mga pulong sang ihibalo.” (Hulu. 23:12) Planuha karon ang pagtambong sa sining mapuslanon nga adlaw sang pagpanudlo sang Kasulatan. Ang paghimo sini magapalig-on sa imo nga padayon nga maalagad si Jehova upod ang himpit nga tagipusuon.