Pagtinuon sa Simbaha ang Dios nga Libro

Ang Simbaha ang Lamang Matuod nga Dios gindesinyo nga pagatun-an sang mga bag-uhan kon matapos na nila ang pagtuon sa Ihibalo nga libro. Ang pagbinagbinag naton sini nga publikasyon sa Pagtinuon Sang Kongregasyon sa Libro magasangkap sa aton nga gamiton ining libro sa ministeryo kag magabulig sa aton nga mapadalom pa ang aton gugma kag apresasyon kay Jehova kag sa iya organisasyon. Paano kita makabenepisyo sing bug-os gikan sa aton pagtuon sa Simbaha ang Dios nga libro?

Pagdumala sa Pagtuon: Bangod tun-an naton ang bilog nga kapitulo kada semana, kinahanglan maalamon nga tungatungaon sang mga manugtatap sang pagtinuon sa libro ang tion. Dapat indi sila magpadugay sa paghinun-anon sa nahauna nga mga parapo agod mahatagan sing dugang nga tion ang mas mabug-at nga materyal, nga sa masami yara sa naulihi nga bahin sang kapitulo. Ang malip-ot nga paghinun-anon sang kahon para sa repaso sa katapusan sang kada pagtinuon magabulig sa mga tumalambong nga madumduman ang yabi nga mga punto.

Ang indented ukon ginpasulod diutay nga mga pamangkot para pamalandungan kag hinun-anunan makita sa halos katunga nga bahin sang mga kapitulo sang Simbaha ang Dios nga libro. Ang isa ka halimbawa masapwan sa pahina 48-9. Indi na kinahanglan nga ilakip ini nga mga pamangkot sa pagbasa sa mga parapo. Kon nagabinagbinag sini upod sa grupo, dapat ipabasa sang manugtatap ang ginsambit nga mga kasulatan kag hinun-anunan ini kon ginatugot sang tion.

Abanse nga Paghanda: Ang paghanda sing maayo para sa pagtinuon wala lamang nagadalahig sang pagkurit sa mga sabat. Ang mapinangamuyuon nga pagpamalandong sa ginsambit nga mga teksto makabulig sa aton nga makahanda indi lamang sang aton mga komento kundi, sing mas importante, sang aton tagipusuon. (Esd. 7:10) Kita tanan makaamot sa pagbayluhanay sing pagpalig-on paagi sa maugdang nga paghatag sang aton mga komento.​​—⁠Roma 1:​11, 12.

Ang pagtinuon naton sa Simbaha ang Dios nga libro magabulig sa aton nga mangin suod kay Jehova kag magasangkap sa aton nga mabuligan ang mga bunayag sing tagipusuon nga magbuylog sa aton sa pagsimba sa iya. (Sal. 95:⁠6; Sant. 4:8) Kabay nga kita tanan makabenepisyo sing bug-os gikan sa sining maayo nga aman sa espirituwal.