Espirituwal nga Pagkaon sa Nagakaigo nga Tion
1. Paano karon nagakatuman ang Ezequiel 36:29?
1 “Tawgon ko ang uyas kag pabuganaon ini, kag indi ko kamo pagpagutuman,” siling sang Soberanong Ginuong Jehova. (Ezeq. 36:29) Ining matagnaon nga mga pinamulong naaplikar sa katawhan sang Dios karon. Sa simbuliko nga paagi, ginpatubo sing bugana ni Jehova ang nagasakdag-kabuhi nga uyas para sa iya katawhan. Maathag nga matuod ini bangod sang suno sa tion nga espirituwal nga pagkaon nga gin-aman paagi sa aton mga distrito nga kombension.
2. Paano gingamit ni Jehova ang mga distrito nga kombension sa paghatag sang espirituwal nga pagkaon sa nagakaigo nga tion?
2 Sa kombension nga ginhiwat sa Columbus, Ohio, sang 1931, gintuytuyan ni Jehova ang iya mga sumilimba nga maggamit sing bag-o nga ngalan—mga Saksi ni Jehova. (Isa. 43:10-12) Sang 1935 ang dakung kadam-an sa Bugna 7:9-17 sibu nga nakilala. Sang 1942, si Utod Knorr naghatag sing diskurso nga “Paghidait—Magapadayon Bala Ini?” Yadto nga pamulongpulong nagpabaskog sang bug-os kalibutan nga hilikuton sa pagbantala kag nagresulta sa pagtukod sang Watchtower Bible School of Gilead. Bisan pa nga ang pila ka kombension indi gid malipatan, ang kada isa sini kaangay sang bugana nga lamesa sang makapapagros nga pagkaon sa espirituwal nga gin-aman sa nagakaigo nga tion.—Sal. 23:5; Mat. 24:45.
3. Ano ang dapat naton himuon agod makabenepisyo sa espirituwal nga bangkete sa aton distrito nga kombension?
3 Nabusog Ka Bala? Bisan bugana ang pagkaon, posible nga mangin di-mapagros kita kon indi kita magkaon. (Hulu. 26:15) Matuod man ini sa espirituwal nga kahulugan. Sa pila ka kombension, madamo ang nakita nga nagalagawlagaw sing di-kinahanglanon ukon nagasugilanunay sa tion sang programa. Bisan pa importante nga bahin sang kombension ang makapalig-on nga pagsugilanunay, dapat himuon ini antes kag pagkatapos sang sesyon. (Man. 3:1, 7) Kon wala kita nagapamati sing maayo, mahimo nga mawasi naton ang importante nga punto. Ang mga manugtatap sa mga departamento sa kombension kag ang mga utod nga may mga katungdanan kinahanglan kon kaisa nga maghambalanay nahanungod sa kombension samtang nagasesyon. Kon wala, dapat ipakita nila ang maayong halimbawa sa pagpamati sa programa. Wala kita sing dapat mawasi sa gin-aman nga espirituwal nga pagkaon.—1 Cor. 10:12; Fil. 2:12.
4. Paano kita makapasalamat sa bugana nga aman ni Jehova?
4 Malipayon gid kita sa bugana nga espirituwal nga mga kamatuoran nga ginaaman ni Jehova, nga kabaliskaran sa wala sing sustansia nga butig nga mga doktrina sang Cristiandad! (Isa. 65:13, 14) Ang isa ka paagi nga ‘mapakita naton ang pagkamapinasalamaton’ amo ang pagtamod sa kombension subong isa ka kahigayunan nga magpatudlo kay Jehova. (Col. 3:15) Pamatii sing maayo ang pamulongpulong, kag tamda ini nga mensahe subong halin sa aton “Dakung Instruktor.” (Isa. 30:20, 21; 54:13) Magpamati gid sing maayo. Isulat ang yabi nga mga punto. Repasuha ang panguna nga mga punto sang programa kada gab-i. Iaplikar ang imo natun-an.
5. Ngaa malipay kita sa aton mga distrito nga kombension?
5 Antes sang Armagedon, ang kada kombension nga ginahiwat, sa kampo sang refugee man ini, sa magamo man nga duog, ukon sa mas dalagku kag mahidaiton nga duog, isa ka kadalag-an batok kay Satanas! Ginapakabahandi naton ang mga kahigayunan nga magtipon sa mga distrito nga kombension subong nahiusa nga mag-ulutod. (Ezeq. 36:38) Makasalig gid kita nga sa liwat mahigugmaon nga amanan kita ni Jehova sing “pagkaon sa nagakaigo nga tion.”—Luc. 12:42.
[Kahon sa pahina 4]
Pag-apresyar sa Latok ni Jehova
◼ Magpamati sing maayo
◼ Isulat ang yabi nga mga punto
◼ Repasuha ang panguna nga mga punto sang programa kada gab-i
◼ Iaplikar ang imo natun-an