Makapaumpaw nga Ambahanon
1 Ang pag-amba kag musika importante nga bahin sang matuod nga pagsimba. Sa dumaan nga Israel, si Asaf kag ang iya mga kauturan nag-amba: “Pasalamat kamo sa GINUO. . . . Amba kamo sa iya, amba sing mga pagdayaw sa iya, hambal kamo sang tanan niya nga makatilingala nga mga binuhatan!” (1 Cron. 16:8, 9) Sa karon nagaamba kita kay Jehova sa aton semanal nga mga miting sa kongregasyon. (Efe. 5:19) Mahimayaon gid ini nga kahigayunan nga dayawon ang iya ngalan!—Sal. 69:30.
2 Ang pagpamati sa Kingdom Melodies, mga rekord sang mga ambahon sang Ginharian nga gintokar sang orkestra, makapuno sang aton hunahuna sing espirituwal nga mga butang. “Samtang nagatokar ang melodiya, madumduman ko ang mga liriko,” paathag sang isa ka utod nga babayi. “Maayo gid ini nga paagi sa pagdumdom kay Jehova samtang nagapamati sang musika!”—Fil. 4:8.
3 Mga Kahigayunan nga Mapamatian Ini: Ang pagpatokar sang Kingdom Melodies sa puluy-an nagatuga sang isa ka maalikaya, espirituwal nga kahimtangan nga nagaamot sa kalinong sang pamilya. “Ginapatokar namon sing sulitsulit ini [nga musika] sa amon puluy-an kag sa salakyan kag wala gid natak-i sang nanuhaytuhay nga melodiya,” sulat sang isa ka pamilya. “Masami nga nagapatawhay sang panghunahuna ang Kingdom Melodies kon nagahanda para sa Cristianong mga miting ukon kon nagalakbay pakadto sa asambleya.” Ang isa ka utod nga babayi nagsiling: “Makapapagsik gid ini kon nagaobra ako sa balay—sin-o ang maghunahuna nga malipayon ako samtang nagapami-od sang mga linabhan? Ginapatokar ko ini nga musika kon ginasubuan ako. Makapapagsik gid ini! . . . Ang tagsa ka ambahanon makalilipay.” May mga higayon bala nga ining makapaumpaw nga musika makapaayo sa imo?
4 Ang kalabanan nga musika karon nagapabanaag sang espiritu sang kalibutan. Sarang mabuligan sang mga ginikanan ang ila mga kabataan agod makapalambo sang gana sa makapalig-on nga mga musika paagi sa pagpatokar pirme sang mga rekord sang Kingdom Melodies. Madamo nga mga estudyante sang Biblia kag mga interesado ang malipay man kon mahibaluan nila ining matahom nga mga musika, nga nagahimaya kay Jehova kag nagapasadya sa isa.—Sal. 47:1, 2, 6, 7.