Ginakinahanglan ang Imo Bulig
1 “Salamat gid sa inyo nabulig sa amon. Nakabenepisyo gid kami sini.” Napabutyag gid sining komento ang aton pagpasalamat sa aton mga gulang kag mga ministeryal nga alagad. Samtang nagauswag ang organisasyon sang Dios, nagakinahanglan man sang hamtong nga mga lalaki sa pag-alagad sa halos 100,000 ka kongregasyon sa bug-os nga kalibutan. Kon bawtismado ka nga utod nga lalaki, ginakinahanglan ang imo bulig.
2 ‘Lab-uta’: Paano mo malab-ot ang dugang pa nga pribilehiyo sa pag-alagad? (1 Tim. 3:1) Una, paagi sa pagpakita sing maayong halimbawa sa tanan nga bahin sang imo kabuhi. (1 Tim. 4:12; Tito 2:6-8; 1 Ped. 5:3) Makigbahin sing bug-os sa pagbantala nga hilikuton, kag magbulig sa iban sa paghimo sini. (2 Tim. 4:5) Mangin interesado gid sa kaayuhan sang mga masigkatumuluo. (Roma 12:13) Mangin maukod nga estudyante sang Pulong sang Dios, kag palambua ang “arte sa pagpanudlo.” (Tito 1:9; 1 Tim. 4:13) Tatapa sing maayo ang mga hilikuton nga gintugyan sa imo sang mga gulang. (1 Tim. 3:10) Kon ulo ka sang pamilya, ‘dumalahi ang imo kaugalingon nga panimalay sa maayo nga paagi.’—1 Tim. 3:4, 5, 12.
3 Ang katungdanan subong gulang ukon ministeryal nga alagad nagalakip sang pagpangabudlay kag nagakinahanglan sing pagkamasinakripisyuhon. (1 Tim. 5:17) Busa, kon ginatinguhaan mo nga malab-ot ini, panikasugi sing mapainubuson nga alagaran ang iban. (Mat. 20:25-28; Juan 13:3-5, 12-17) Pamalandungi ang panimuot ni Timoteo, kag tinguhai nga iluga ini. (Fil. 2:20-22) Kaangay niya, tuguti ang imo maayo nga paggawi nga magrekomendar sa imo. (Bin. 16:1, 2) Kon ginapalambo mo ang espirituwal nga mga kinaiya nga ginakinahanglan sa pag-uyat sang dugang pa nga mga pribilehiyo kag nagasunod sang nagapalig-on nga laygay nga imo nabaton, “ang imo pag-uswag madayag sa tanan nga tawo.”—1 Tim. 4:15.
4 Mga Ginikanan, Hanasa ang Kabataan nga Magbulig: Matun-an sang mga kabataan ang pagbulig sa linghod pa nga edad. Hanasa sila nga mamati sing maayo sa mga miting, sa pagbantala, kag mangin huwaran sa paggawi sa Kingdom Hall kag eskwelahan. Hanasa sila sa pagbulig sa iban, subong sang pagpaninlo sa Kingdom Hall, pagbulig sa mga tigulang, kag iban pa. Tuguti sila nga makaeksperiensia sing kalipay gikan sa paghatag. (Bin. 20:35) Ina nga paghanas makabulig sa ila nga mangin mga payunir, mga ministeryal nga alagad, kag mga gulang sa palaabuton.