Padayon Kamo nga Magpalig-unanay
1 Ginhimo ni apostol Pablo ang iya bug-os nga masarangan agod palig-unon ang iya mga masigkatumuluo. (2 Cor. 11:28, 29) Sing kaanggid, nagakabalaka gid kita kon ginapiutan ang aton mga kauturan, kag luyag naton sila buligan. Ginapakita sang Biblia nga indi lamang mga gulang ang dapat magpakita sing interes sa mga kauturan. (Roma 15:1, 2) Binagbinaga ang duha ka paagi agod masunod naton ang mahigugmaon nga pangabay: “Maglinaygayay kamo kag maglinig-unay kamo subong sang ginahimo ninyo.”—1 Tes. 5:11.
2 Hantupa ang mga Kinahanglanon sang Iban: Ginsiling sang Pulong sang Dios nga si Dorcas “puno sang maayong mga buhat” kag mga dulot sang kaluoy. (Binu. 9:36, 39) Natalupangdan niya ang mga bululigan kag ginbuligan sila. Nagpahamtang gid sia sing maayong halimbawa sa aton! Ayhan may nahibaluan ka nga tigulang nga kinahanglan sugaton agod makatambong sa miting. Ukon may isa ka payunir nga wala sing upod sa pagbantala kon hapon. Kon nahantop mo nga may isa nga nagakinahanglan kag gintanyagan mo sing bulig, hunahunaa lamang kon paano ini magapalig-on sa iya.
3 Paghambalanay Tuhoy sa Espirituwal nga mga Butang: Mapabakod man naton ang iban paagi sa aton ginahambal. (Efe. 4:29) Ang isa ka eksperiensiado nga gulang nagsiling: “Kon luyag mo mangin makapalig-on, maghambal tuhoy sa espirituwal nga mga butang. Agod masugdan mo ang makapalig-on nga paghambalanay, mahimo ka magpautwas sing simple nga mga pamangkot subong sang, ‘Paano mo natun-an ang kamatuoran?’” Magpakita sing sinsero nga interes sa mga pamatan-on sa sulod sang kongregasyon. Magpakita sing interes sa mga naluyahan sing buot kag sa mga mahuluy-on. (Hulu. 12:25) Indi pagtuguti ang mga kalingawan sa kalibutan nga mangibabaw sa maayo nga paghambalanay tuhoy sa espirituwal nga mga butang.—Roma 1:11, 12.
4 Apang, ano ang isiling mo agod mapalig-on ang iban? Sa imo personal nga pagbasa kag pagtuon sing Biblia, nakasapo ka bala sing mga prinsipio nga nagpadalom sang imo apresasyon kay Jehova? Napalig-on ka bala sa imo napamatian sa pamulongpulong publiko ukon sa Pagtinuon sa Ang Lalantawan? Ukon natandog ka bala sa isa ka makapalig-on sing pagtuo nga eksperiensia? Kon pabaloran naton ini tanan, makapaambit gid kita sing makapalig-on nga mga butang.—Hulu. 2:1; Luc. 6:45.
5 Paagi sa pagtanyag sing nagakaigo nga bulig kag maalamon nga paggamit sang aton dila, mahimo kita makapalig-unanay.—Hulu. 12:18.