Maghimo Sing Maayo kag Magpaambit sa Iban

¹ Si Dorcas “puno sang maayong mga buhat kag mga dulot sang kaluoy.” (Binu. 9:36, 39) Bangod sang iya kaalwan ginpalangga sia sang mga tawo nga nakakilala sa iya kag ni Jehova nga Dios. Ang Hebreo 13:16 nagasiling: “Dili malimot sa paghimo sing maayo kag sa pagpaambit sang mga butang sa iban, kay sa amo nga mga halad nahamuot gid ang Dios.” Paano kita makahimo sing maayo kag makapaambit sa iban karon?

² Ang isa ka paagi nga makahimo kita sing maayo sa iban amo ang pagpaambit sang aton “bilidhon nga mga butang.” (Hulu. 3:9) Bangod sang aton mga amot sa bug-os kalibutan nga hilikuton, natukod ang mga Kingdom Hall, mga Assembly Hall, kag mga pasilidad sang sanga sa bug-os nga kalibutan. Ang aton kaalwan nakabulig sa minilyon nga makabenepisyo sa teokratikong pagpanudlo kag makapalig-on nga espirituwal nga pag-updanay.

³ Paglugpay sa Iban: Sa tion sang mga kalamidad, ang katawhan ni Jehova handa nga ‘magbuhat sing maayo’ para sa ila mga masigkatumuluo lakip man sa mga di-tumuluo. (Gal. 6:10) Pagkatapos maglupok ang isa ka planta sang kemikal sa Pransia, isa ka magtiayon nga nagapuyo malapit sa planta ang nagsiling: “Gilayon nga nag-abot ang amon Cristianong mga kauturan sa pagbulig. Gintinluan nila ang amon apartment subong man ang iban pa nga yara sa bilding. Natingala gid ang amon mga kaingod sang nakita ang madamo nga mga tawo nga nagbulig.” Isa pa ka utod nga babayi ang nagdugang: “Ang mga gulang nagbulig sa amon. Nagkari sila agod palig-unon kami. Sa matuod lang, amo gid ini ang amon ginakinahanglan, labaw pa sa materyal nga bulig.”

⁴ Bisan pa may madamong paagi nga makahimo kita sing maayo sa aton mga kaingod, ang pinakamaayo nga paagi agod mabuligan naton sila amo ang pagpaambit sa ila sing bilidhon nga ihibalo sang kamatuoran, nga nagalakip sang “paglaum sa kabuhi nga walay katapusan” nga ginsaad ni Jehova mismo. (Tito 1:1, 2) Ang mensahe sang Biblia nagadala sing matuodtuod nga lugpay sa mga nagapangasubo bangod sa mga kahimtangan sang kalibutan kag sa ila makasasala nga kahimtangan. (Mat. 5:4) Kabay pa nga maghimo kita sing maayo kag magpaambit sa iban kon ini masarangan naton.—⁠Hulu. 3:⁠27.