Isa ka Video nga Nagapatalupangod sa Isa ka Importante nga Pamaagi Sang Pagbulong
Nagabaskog ang pagtalupangod sang mga hukom, abogado kag mga doktor sa pagpati kag kinamatarong sang mga pasyente. Nagresulta ini sang bag-o nga mga pamaagi sang pagbulong sa diin makabenepisyo gid ang mga Saksi ni Jehova. (Binu. 15:28, 29) Amo ina ang topiko sang video nga Transfusion-Alternative Health Care—Meeting Patient Needs and Rights. Tan-awa ini, kag nian repasuha ang imo natun-an.—Patalupangod: Bangod ang video may malip-ot nga mga danyag sang operasyon, dapat mangin maalamon ang mga ginikanan kon nagatan-aw sini upod sa ila magagmay nga kabataan.
(1) Ngaa ang mga doktor nag-usisa liwat sang pagtughong sing dugo sa pagbulong? (2) Ano ang tatlo ka halimbawa sang masibod nga operasyon nga sarang mahimo nga wala sing pagtughong sing dugo? (3) Pila ka doktor kag manug-opera sa bug-os nga kalibutan ang handa sa pagbulong nga wala nagatughong sing dugo? Ngaa handa sila nga himuon ini? (4) Ano ang ginpakita sang mga pagtuon sining karon lang sa ospital tuhoy sa pagtughong sing dugo? (5) Ano nga mga risgo ang naangot sa pagbulong nga nagapatughong sing dugo? (6) Ano ang hinakop sang madamo nga eksperto tuhoy sa kaayuhan sang mga alternatibo sa pagtughong sing dugo? (7) Ano ang gintunaan sang anemia? Tubtob san-o ini maantos sang mga tawo nga indi sila mahalitan? Ano ang himuon agod makapasag-uli sa sini? (8) Paano mapadamo ang pula nga selula sa dugo sang pasyente? (9) Ano ang mga teknik agod mapahaganhagan ang pagdugo sa tion sang operasyon? (10) Ang mga alternatibo bala sa pagpatughong epektibo para sa diutay nga mga bata ukon sa mga tawo nga malubha ang kahimtangan? (11) Ano ang isa sa pinakamaayo nga prinsipio sang pagbulong? (12) Ngaa importante para sa isa ka Cristiano nga abanse nga magpili kon ano nga wala sing dugo nga pagbulong ang iya luyag? Paano naton ini mahimo?
Ang pagbaton sang pila ka pagbulong nga ginpakita sa video isa ka personal nga desisyon sang isa suno sa iya nahanas sa Biblia nga konsiensia. Nakadesisyon ka na bala kon ano nga alternatibo sa dugo ang imo batunon kag sang imo kabataan? Ang di-Saksi nga miembro sang pamilya dapat man pahibaluon sing bug-os tuhoy sa imo desisyon kag sang imo mga rason sa sini.—Tan-awa ang “Mga Pamangkot Gikan sa mga Bumalasa” sa Hunyo 15, 2004, kag sa Oktubre 15, 2000, nga gua sang Ang Lalantawan.