Handa Ka Bala sa Tion sang Emerhensia?

Ang emerhensia mahimo matabo sing hinali kag wala ginapaabot. (Sant. 4:14) Gani, ang isa nga maalam nagahanda sa sini. (Hulu. 22:3) Nakadesisyon ka na bala kon ano nga pamaagi sang pagbulong ang imo batunon, kag nabutang mo na ini sa imo DPA card? Makabulig sa imo ang video nga Transfusion-Alternative Health Care—Meeting Patient Needs and Rights, ang ikaduha nga presentasyon sa DVD nga natig-uluhan Transfusion-Alternatives—Documentary Series. Samtang ginatan-aw mo ini, sabta ang masunod nga mga pamangkot. Ini nga video nagalakip sang mga operasyon, gani dapat mangin mahalungon ang mga ginikanan sa pagtan-aw sini upod sa ila magagmay nga kabataan.

(1) Ngaa ang pila ka doktor nag-usisa liwat tuhoy sa pagpatughong sing dugo? (2) Ano ang tatlo ka halimbawa sang masibod nga operasyon nga sarang mahimo nga wala sing pagtughong sing dugo? (3) Ngaa handa ang madamo nga doktor kag manug-opera sa bug-os nga kalibutan sa pagbulong nga wala nagatughong sing dugo? (4) Ano ang ginapakita sang mga pagtuon sang ospital sining karon lang tuhoy sa pagtughong sing dugo? (5) Ano ang mga risgo sa pagpatughong sing dugo? (6) Ano ang nahinakop sang madamo nga eksperto tuhoy sa kaayuhan sang mga alternatibo sa pagtughong sing dugo? (7) Ano ang ginatunaan sang anemia kag paano ini masolusyunan? (8) Paano mapadamo ang pula nga selula sa dugo sang pasyente? (9) Ano ang mga teknik agod mapahaganhagan ang pagdugo sa tion sang operasyon? (10) Ang mga alternatibo bala sa pagpatughong puede sa mga bata ukon sa mga tawo nga malubha ang kahimtangan? (11) Ano ang isa sa panguna nga moral nga mga prinsipio sang maayo nga pagbulong?

Ang pagbaton sang pila sa mga pagbulong nga ginpakita sa video isa ka butang nga dapat desisyunan sang kada isa suno sa iya nahanas sa Biblia nga konsiensia, gani indi na paghulata ang emerhensia antes ka magdesisyon kon ano ang batunon ukon indi. Makabulig sa imo ang kapitulo 7 sang libro nga “Gugma sang Dios” kag ang ginsambit nga mga reperensia sa suplemento sang Enero 2007 nga Ang Aton Ministeryo sa Ginharian. Dayon kon bawtismado ka, ibutang ang imo mga ginpili sa DPA card nga gin-aman kag dal-a ini pirme.

[Blurb sa pahina 3]

Nakadesisyon ka na bala kon ano nga pamaagi sang pagbulong ang imo batunon kag nabutang mo na ini sa imo DPA card?