Mangita Sing mga Kahigayunan sa Pagbantala

¹ May nanuhaytuhay gid nga kahimtangan ang mga katapo sa Cristianong kongregasyon. Apang, nahiusa kita sa aton determinasyon nga dayawon si Jehova. (Sal. 79:13) Kon ginalimitehan sang balatian ukon sang iban pa nga kabudlayan ang aton pagpakigbahin sa pagbantala sa maayong balita, paano kita makahigayon sa pagbantala?

² Sa Matag-adlaw nga mga Hilikuton: Ginakalitan pirme ni Jesus ang iya matag-adlaw nga pagpakig-angot sa mga tawo agod makapanaksi. Nakighambal sia kay Mateo sang naglabay sia sa buluhisan, kay Zaqueo samtang nagalakbay, kag sa isa ka Samaritana samtang nagapahuway. (Mat. 9:⁠9; Luc. 19:1-5; Juan 4:6-10) Sa aton matag-adlaw nga mga hilikuton, mahimo man naton maliton ang kinaandan nga pagpakigsugilanon sa pagpanaksi. Ang pagdala sing Biblia, kag mga tract ukon brosyur, magabulig sa aton nga mangin handa sa pagsugid sang aton paglaum.—⁠1 Ped. 3:⁠15.

³ Ginalimitehan bala sang imo balatian ang imo pagpakigbahin sa pamalaybalay nga hilikuton? Mangin alisto sa mga kahigayunan sa pagpanaksi sa mga nagaduaw nga mga medical personnel kag iban pa nga imo masugilanon. (Binu. 28:30, 31) Kon indi ka pirme makagua sa balay bangod sang imo kahimtangan, natilawan mo na bala nga manaksi paagi sa telepono ukon sa sulat? Ang isa ka utod nga babayi regular nga nagasulat sa indi Saksi nga mga katapo sang iya pamilya. Ginalakip niya ang makapalig-on nga mga impormasyon sa Biblia kag iya mga eksperiensia sa pagpanaksi.

⁴ Sa Ginatrabahuan Ukon Eskwelahan: Ang aton handum nga dayawon si Jehova magapahulag man sa aton nga magkalit sa pagtanom sang binhi sang kamatuoran sa aton ginatrabahuan ukon sa eskwelahan. Nagpaambit sa iya mga kaklase sa iya nabasahan sa Magmata! tuhoy sa bulan ang otso anyos nga manugbantala. Sang nahibaluan sang iya manunudlo kon sa diin halin ang impormasyon, regular na sia nga nagkuha sing Ang Lalantawan kag Magmata! Sa ginatrabahuan, ang pagbutang lamang sang libro nga Ginatudlo Sang Biblia sa duog nga makita ini sang iban mahimo magtiklod sa ila nga mamangkot kag magadul-ong sa isa ka pagpanaksi.

⁵ May nahunahunaan ka na bala nga mga pamaagi agod makakalit sa pagbantala sa imo matag-adlaw nga mga hilikuton? Paagi sa pagkalit sang aton mga kahimtangan, kabay nga tinguhaan naton kada adlaw ang ‘paghalad pirme sa Dios sing halad sang pagdayaw.’—⁠Heb. 13:15.