Bulig nga Matigayon Gilayon

1. Paano magluya ang espirituwalidad sang isa?

¹ Si Anna, isa ka utod nga may di-tumuluo nga bana kag masako kaayo sa trabaho, nabudlayan gid sa pagtambong sa Cristianong mga miting sing regular, pagpakigbahin sa ministeryo, kag pagtuon sa Pulong sang Dios. Bisan pa nga ginahigugma niya si Jehova, nangin di-aktibo sia. Sing makalilipay, nakatigayon sia sing espirituwal nga bulig gikan sa mabinalak-on nga mga gulang.

2. Sa anong paagi nga ang tanan nga Cristiano mangin isa ka bulig nga matigayon gilayon?

² Ang pagbaton sang espirituwal nga bulig paagi sa Cristianong kongregasyon nagapakita sang aton pagsalig kay Jehova. Sa pag-ilog sang mahigugmaon nga pag-ulikid ni Jesucristo, ang mga gulang sa kongregasyon nagapangita sing kahigayunan nga makahatag sing pagpalig-on kag praktikal nga bulig sa mga ginabudlayan sa espirituwal. (1 Tes. 5:14) Sa masami, ang mainayuhon nga makapalig-on nga pulong nga nagasentro sa Makasulatanhon nga mga pasalig mahimo nga amo lang ang ginakinahanglan. Dapat nga kabalak-an sang tanan nga Cristiano, indi lang sang mga gulang, ang pagtinguha nga mabuligan ang mga medyo nagluya. Walay duhaduha nga naeksperiensiahan naton tanan ang gahom sang nahunahuna sing maayo nga “pulong nga napamulong sa husto nga tion.”—⁠Hulu. 25:11; Isa. 35:3, 4.

3, 4. Ano ang nadalahig sa pagbulig sa iban, kag paano naton ini mahimo?

³ Magmatumato: Ang pagpakita sing mahigugmaon nga interes sa mga bululigan nagakinahanglan sing pagmatumato, patugsiling, kag determinasyon. Sang nabalitaan ni Jonatan ang mapiot nga kahimtangan ni David, ‘nagtindog sia kag nagkadto kay David sa Hores, agod mapalig-on niya ang iya kamot.’ (1 Sam. 23:15, 16) Mangin malulo sa pagbulig sa iban. Ang mga pulong nga napahulag sang tunay nga kabalaka may maayo gid nga mga resulta. Dugang pa, maathag nga ginpakita ni Jesus nga nagalakip ang maukod, matinuyuon nga panikasog sa pagpasag-uli sang espirituwal nga mga kauturan. (Luc. 15:4) Ang tudok nga handum sa pagbulig sa iban magapahulag sa aton nga mangin mapinadayunon sa pagtanyag sang bulig bisan pa indi madasig ang pag-uswag.

⁴ Makapalig-on gid kon magmatumato kita sa pag-agda sa iban, subong sang kaupdanan naton sa pagtuon sa libro, nga mag-upod sa aton sa ministeryo! Samtang ginabuligan naton ang isa ka masigkaalagad kay Jehova sa pagpakigbahin sa ministeryo, kabay nga kalitan naton ang kahigayunan sa pagpalig-on sa ila. Inang malipayon nga higayon nga ginhinguyang ninyo nga duha sa pag-alagad kay Jehova ilabi na nga makapalig-on sa mga nagapanumbalik sa espirituwal.

5. Sa pila ka kahimtangan, ano ang mahimo matanyag nga bulig sang mga gulang?

⁵ Mahigugmaon nga Aman: Ang mga medyo madugay na nga wala nagpakigbahin sa pagbantala nga hilikuton ukon wala na nagapakig-angot sa kongregasyon mahimo nga nagakinahanglan sing dugang nga bulig agod mapabakod ang ila pagtuo. Ang isa ka personal nga pagtuon sa Biblia sa publikasyon kaangay sang Simbaha ang Lamang Matuod nga Dios, Mangin Suod kay Jehova, ukon Ano Gid ang Ginatudlo Sang Biblia? ang mahimo magamit kon kinahanglanon. Sanglit bawtismado na sia, sa kalabanan ang pagtuon indi kinahanglan nga madugay. Ang Komite sang Pag-alagad sang Kongregasyon dapat mangin mabinantayon kon sin-o ang mahimo makabenepisyo sa sining kahimusan.—⁠Tan-awa ang “Pamangkot” sa Nobiembre 1998 kag Nobiembre 2000 nga gua sang Ang Aton Ministeryo sa Ginharian.

6. Paano ang isa ka utod nga babayi nangin mapagros liwat sa espirituwal?

⁶ Si Anna, nga ginsambit kaina, malipayon nga nagbaton sa tanyag sang mga gulang nga tun-an sia sa Biblia sang hamtong sa espirituwal nga utod nga babayi. Apat lang ka beses nga nagtuon kag nabuligan na sia nga mangin suod liwat kay Jehova. Ginapadayon niya ang pagtambong sa mga miting sa kongregasyon kag nanumbalik ang iya handum nga dayawon si Jehova nga Dios sing dayag. Ginbuligan man sia sang hamtong nga utod nga babayi sa ministeryo paagi sa pag-upod sa iya sa iban niya nga mga pagtuon sa Biblia tubtob nga masarangan na niya nga magbantala sa pamalaybalay. Ang mainayuhon nga pagbulig amo ang iya ginakinahanglan agod nga makapanumbalik!

7. Ano ang mga benepisyo sa pagpalig-on sa iban sa espirituwal?

⁷ Ang pagpalig-on sa mga maluya nagaresulta sing mga pagpakamaayo sa tanan. Ang ginabuligan mangin malipayon sa pagpakigsuod kay Jehova kag makapakigbahin sa mga hilikuton sang Iya organisasyon. Malipay gid ang mga gulang nga makita ina nga pag-uswag sa espirituwal. (Luc. 15:5, 6) Mahiusa ang kongregasyon bangod ang tanan nagapakita sing mahigugmaon nga kabalaka sa isa kag isa. (Col. 3:12-14) May maayo gid kita nga rason sa pag-ilog kay Jehova, isa ka bulig nga matigayon gilayon!—⁠Efe. 5:1.