Pagsimba kay Jehova Subong Pamilya
1 Sa tion sang Biblia, madamo nga mga hilikuton ang ginahimo sing tingob sang tanan nga katapo sang pamilya. Ululupod sila nga nagapanghikot sa hilikuton sa balay kag labaw sa tanan sa pagsimba kay Jehova. (Lev. 10:12-14; Deut. 31:12) Sa madamo nga duog karon, pila lamang ka hilikuton ang ginahimo sing tingob subong pamilya. Apang, ginakilala sang mga Cristiano ang kapuslanan sang pagpanghikot subong pamilya, ilabi na kon tuhoy sa pagsimba. Walay duhaduha nga nahamuot gid ang Tagtukod sang pamilya nga makita nga nahiusa ang mga pamilya sa pagsimba sa iya!
2 Magkaupod sa Pagbantala: Ang magkaupod nga pagbantala sing maayong balita nagapabakod sa higot sang pamilya. Busa, dugang pa sa pag-upod sang isa ka gulang sa iban nga katapo sang kongregasyon sa pagbantala, dapat regular man niya nga updan ang iya asawa kag kabataan. (1 Tim. 3:4, 5) Bisan pa sa kasakuon, nagaiskedyul man ang mga nagalakbay nga manugtatap sa pagbantala upod sa ila asawa.
3 Mabuligan sang mga ginikanan ang ila kabataan nga mag-uswag subong ebanghelisador kon ginaupdan nila sila sa pagbantala. Indi lamang maobserbahan sang mga kabataan ang kalipay kag kaayawan sang ila mga ginikanan sa ministeryo kundi makita man nila ang gugma sang ila mga ginikanan kay Jehova kag sa ila mga isigkatawo. (Deut. 6:5-7) Importante gihapon ini bisan pa dalagku na ang mga kabataan. Ginaupdan gihapon sing regular sa pagministeryo sang isa ka mag-asawa ang ila tatlo ka bata nga lalaki nga nagapangidaron sing 15, 18 kag 21. Ang amay nagsiling: “Pirme namon sila ginatudluan sing pila ka butang sa tion sang pagbantala. Kag ginapat-od namon nga mangin makalilipay kag makapalig-on ini nga mga eksperiensia.”
4 Magkaupod sa Paghanda: Nasapwan sang mga pamilya nga mapuslanon nga handaan ang pagministeryo sing magkaupod. Masami nga nalipay ang kabataan sa tion sang mga pag-ensayo upod sa mga katapo sang pamilya nga nagabinuslanay sa paghatag sing presentasyon. Ang iban nagahinguyang sing pila ka minuto sa hingapusan sang pangpamilya nga pagtuon agod mag-ensayo.
5 Nagadugang ang aton kalipay kon nagapakigbahin kita sa isa ka importante kag makalilipay nga mga hilikuton upod sa aton mga hinigugma. Makalilipay gid para sa mga katapo sang pamilya nga magpanghikot sing tingob sa pagbantala sa pamalaybalay subong man sa pagduaw liwat kag pagdumala sing mga pagtuon sa Biblia! Busa samtang nagasimba kamo kay Jehova upod sa inyo pamilya, malipay kamo sa pagsiling: “Apang nahanungod sa akon kag sa akon panimalay, magaalagad kami [“kay Jehova,” NW].”—Jos. 24:15.