Bag-ong Programa sa Adlaw sang Pinasahi nga Asambleya

Ang tema sang aton adlaw sang pinasahi nga asambleya para sa 2008 amo, ‘Kita ang Lunang—Si Jehova ang Aton Maninihon,’ pasad sa Isaias 64:8. Ang Makasulatanhon nga laygay nga ihatag sa sini nga programa magapalambo pa gid sang aton apresasyon sa kaalam, hustisya, gahom, kag gugma ni Jehova subong ang Daku nga Maninihon.

Ipakita sang pamulongpulong sang manugtatap sang sirkito nga, “Pag-alagad Subong Dungganon nga mga Suludlan sa Ministeryo,” kon paano ang nagadamo nga mga tawo nakatigayon sing bugana nga mga pagpakamaayo sa paghibalo sang kamatuoran kag sa pagpaambit sini sa iban. Ang pamulongpulong nga “Ang Pagpamalandong Magaamlig sa Imo” magapadayag kon paano ang serioso nga pagpamalandong sa matarong nga mga prinsipio ni Jehova magaamlig sa aton. Mamulongpulong ang nagaduaw nga humalambal sang tema nga “Dili Kamo Magpauyon sa Sining Kalibutan” kag “Magpadihon sa Daku nga Maninihon.” Ang mga ginikanan kag mga pamatan-on mapalig-on sa bahin nga “Mga Pamatan-on nga Ginagamit ni Jehova” kag “Ang Importante nga Papel Sang mga Ginikanan sa Pagdihon.” Paagi sa mga pasundayag kag mga interbyu, makunyag kita sa pagpamati kag pagtalupangod kon ano ang nahimo sang mga kauturan sa ila ministeryo. Yadtong luyag magsimbulo sang ila dedikasyon sa Dios paagi sa pagpabawtismo dapat magpahibalo gilayon sa ila nagadumala nga manugtatap. Pat-ura ninyo nga madala ninyo ang inyo Ang Lalantawan nga pagatun-an sa semana sang asambleya.

Ginatuman sang Dakung Maninihon ang iya mga katuyuan. Apang depende na sa aton kon mapadihon kita ukon indi. Yadtong maalamon nga nagapasakop sa mga talaksan kag mga pagdihon ni Jehova, kaangay sang daga nga ginadihon sang maninihon, nagabag-o kag nangin mapuslanon nga mga suludlan. Kon magkooperar kita kay Jehova, madayaw naton ang iya pagkasoberano kag makatigayon kita sing madamo nga mga pagpakamaayo.