Kon Paano ang Pagtinuon sang Kongregasyon sa Libro Makabulig sa Aton
1. Paano kita ginabuligan sang lima ka miting kada semana?
1 Nanuhaytuhay ang pagdumala kag katuyuan sang kada miting sa kongregasyon. Apang importante ini tanan sa pagbulig sa aton sa ‘pagpatugsiling kon paano ang pagpukaw sa isa kag isa sa gugma kag maayong mga buhat.’ (Heb. 10:24, 25) Ano ang pila ka kinatuhayan kag kaayuhan nga matigayon sa Pagtinuon sang Kongregasyon sa Libro ukon CBS?
2. Bangod gamay lang ang katapo sang CBS, ano ang mga kaayuhan sini?
2 Nagabulig Agod Mag-uswag Kita sa Espirituwal: Kinaandan na nga gamay lang ang katapo sang CBS kon ipaanggid sa iban nga miting sang kongregasyon. Bangod sini, mangin mas mahapos ang pagpalambo sang pag-abyanay nga amo ang nagapabakod sa aton sa espirituwal. (Hulu. 18:24) Natinguhaan mo na bala nga makilala ang tanan nga katapo sang inyo CBS, ayhan nagapangabay sa kada isa sa ila nga updan ka sa ministeryo? Ang CBS magapaposible man sa manugtatap sang pagtinuon nga mahibaluan ang nanuhaytuhay nga mga kahimtangan sang kada isa sa ila grupo kag makahatag sing personal nga pagpalig-on.—Hulu. 27:23.
3. Ngaa mapalig-on sa pagtambong ang mga estudyante sa Biblia sa CBS, kag ngaa mapalig-on man ang iban nga magkomento sa CBS?
3 Nahagad mo na bala ang imo mga estudyante sa Biblia nga updan ka sa pagtambong sa CBS? Ang mga interesado nga nagapangalag-ag sa pagtambong sa dalagku nga mga pagtilipon mahimo nga indi matahap sa pagtambong sa gamay nga grupo sang pagtinuon sa Biblia, ilabi na kon ginahiwat ini sa pribado nga balay. Bangod sang mainabyanon nga pagtinamdanay, mangin mas mahapos para sa mga pamatan-on kag mga bag-uhan ang pagkomento. Kag sanglit gamay lang ang katapo sang CBS, mas madamo kita sing kahigayunan nga makakomento kag makadayaw kay Jehova.—Sal. 111:1.
4. Sa anong mga paagi kombeniente ang kahimusan sa CBS?
4 Kinaandan na nga ginahiwat ang mga CBS sa teritoryo sang inyo kongregasyon, sa mga duog nga kombeniente sa mga manugbantala. Bisan pa indi posible para sa tanan nga maasayn sa mga CBS nga malapit sa ila, mahimo nga mas malapit ini gihapon sangsa iban nga miting nga ginahiwat sa Kingdom Hall. Mahimo man hiwatan sang miting para sa pag-alagad sa latagon ang duog nga ginahiwatan sang CBS.
5. Sa ano nga paagi makabaton kita sing bulig sa aton pagministeryo gikan sa aton manugtatap sang CBS?
5 Bulig Para sa Pagministeryo: Ang manugtatap sang CBS interesado gid sa pagbulig sa tanan nga mangin regular, mabungahon, kag magmalipayon sa pagministeryo. Busa, ginapanikasugan gid niya nga makapanghikot upod sa tanan nga katapo sang CBS, kag magahatag sa ila sing bulig sa nanuhaytuhay nga bahin sang pagministeryo. Kon may mga bahin sang pagministeryo nga medyo nabudlayan ka, kasubong abi sang pagduaw liwat, ipahibalo ini sa inyo manugtatap sang pagtinuon. Ayhan itangdo niya ang isa ka eksperiensiado nga manugbantala nga katapo sang inyo CBS nga magbulig sa imo. Mapauswag mo ang imo ikasarang sa pagtudlo sa Biblia paagi sa pagpamati sing maayo sa inyo manugtatap sa iya maayong pamaagi sang pagtudlo sa tion sang iya pagdumala sang pagtinuon.—1 Cor. 4:17.
6. Ngaa dapat naton panginpuslan sing bug-os ang CBS?
6 Isa gid ka pagpakamaayo ang CBS! Ining mahigugmaon nga kahimusan, nga naggikan kay Jehova, magabulig gid sa aton agod indi kita malingkang sa sining tion nga madamo sing kabudlayan.—Sal. 26:12.