Paano Naton Buligan ang mga Tumalambong sa Memoryal?
1. Anong tumalagsahon nga panaksi ang pagahimuon sa Marso 22, 2008?
1 Sa Marso 22, 2008, makabati sing tumalagsahon nga panaksi ang minilyon ka tawo sa bug-os nga kalibutan. Mahibaluan sang mga tumalambong sa Memoryal ang tuhoy sa daku nga gugma sang Dios paagi sa pag-aman sang gawad sa katawhan. (Juan 3:16) Matun-an man nila ang tuhoy sa Ginharian kag kon paano ini gamiton ni Jehova agod tumanon ang iya kabubut-on sa duta. (Mat. 6:9, 10) Maeksperiensiahan nila mismo ang gugma, paghiusa, kag pagkamaabiabihon sang katawhan sang Dios.—Sal. 133:1.
2. Paano naton buligan ang mga estudyante sa Biblia nga nagtambong?
2 Mga Estudyante sa Biblia: Ang iban nga tumalambong bag-o pa lang magtuon sa Biblia upod sa aton. Ipakilala sila sa mga kauturan. Sugiri sila tuhoy sa aton mga miting kada semana, kag ilibot sila sing makadali sa Kingdom Hall. Sa tion sang pamulongpulong, palig-unon sila sang humalambal nga padayunon nila ang pag-uswag sa espirituwal. Mahimo mo hinambitan ining mga punto agod palig-unon ang imo mga estudyante sa Biblia.
3. Paano naton mapalig-on ang di-aktibo nga mga manugbantala nga nagtambong?
3 Di-Aktibo: Ang iban nga tumalambong di-aktibo nga mga manugbantala. Abiabiha sila. Likawi ang pagkomento ukon pagpamangkot tuhoy sa personal nga mga butang kay basi mahuy-an sila. Dapat duawon sila sang mga gulang pila ka adlaw pagkatapos sang Memoryal, pasalamatan sila sa ila pagtambong, kag agdahon sa masunod nga miting sang kongregasyon.
4. Paano ang kada isa sa aton makabulig sa mga bisita?
4 Mga Bisita: Ang iban nga tumalambong mga kakilala ukon mga himata nga gin-agda naton. Ang iban naman mahimo nakabaton sing imbitasyon sa tion sang pinasahi nga kampanya. Kon may nagtambong nga indi mo kilala palapiti sila, abiabiha, kag magpakilala sa ila. Mahimo nga amo pa lang sila makatambong sang aton mga miting. Pangayua ang ila adres ukon numero sang telepono. Nian pila ka adlaw pagkatapos sang Memoryal mahimo mo sila duawon ukon tawgan sa telepono kag tanyagan sing pagtuon sa Biblia.
5. Ano ang mahimo naton isiling agod makasugod sing isa ka pagtuon sa Biblia?
5 Sa pagduaw mo sa mga bisita nga nagtambong, mahimo hinambitan mo ang punto nga nabatian nila sa pamulongpulong sa Memoryal kag ipakita ang libro nga Ginatudlo Sang Biblia. Halimbawa, kon ginbasa sang humalambal ang Isaias 65:21-23, sa pagbalik mo, mahimo mo ini hinambitan kag magsiling, “Ipakita ko sa imo kon ano pa ang mga benepisyo sang gawad.” Nian binagbinaga ang pahina 4-5 sang libro nga Ginatudlo Sang Biblia. Ukon mahimo magsiling ka, “Madamo ang nagapamangkot kon san-o matuman ang tagna ni Isaias.” Dayon binagbinaga ang parapo 1-3 sang kapitulo 9. Ang isa pa ka paagi amo nga hinambitan kon ano ang ginsiling sang humalambal, dayon ipakita ang libro nga Ginatudlo Sang Biblia kag ipasundayag kon paano ini tun-an.
6. Ano ang himuon naton bilang pagtuman sa sugo ni Jesus nga saulugon ang iya kamatayon?
6 Kabay nga ang tagsa sa aton mangita sing kahigayunan nga buligan ang mga estudyante sa Biblia, di-aktibo nga mga manugbantala, kag mga bisita nga matambong. (Luc. 22:19) Pakamaayuhon gid ni Jehova ang aton mga panikasog para sa iya Ginharian.