Isa ka Daku nga Panaksi ang Ihatag
1. Luwas sa pamulongpulong, ano pa ang magapalig-on sa mga bisita sa Memoryal? Ipaathag.
1 San-o? Sa gab-i sang Memoryal. Amo nga gintinguhaan gid naton nga maimbitar ang mga tawo nga magtambong sa sini. Indi lamang ang ila mabatian ang magapalig-on sa ila. Sa tapos magtambong sa Memoryal, napalig-on gid ang isa ka babayi sa iya nakit-an—ang pagkamainabyanon sang tanan kag ang matahom kag matinlo nga tilipunan nga gintukod kag ginmentinar sang mga boluntaryo. Gani indi lang ang humalambal, kundi tanan kita makahatag sing panaksi sa pinakaimportante nga okasyon sa sini nga tuig.—Efe. 4:16.
2. Paano kita makapanaksi sa mga bisita?
2 Abiabiha sing Maayo ang mga Bisita: Ang aton yuhum kag pagpangamusta sa mga bisita makahatag sing panaksi. (Juan 13:35) Bisan pa indi mo maistorya ang tanan, puede mo pangilalahon ang mga nagapungko malapit sa imo. (Heb. 13:1, 2) Panilagi ang mga bisita nga daw wala sing kilala. Mahimo nakabaton lang sila sing imbitasyon. Puede mo sila pamangkuton, “Una mo ’ni nga pagtambong?” Hagara sila nga magtupad sa imo kag hambala sila nga handa ka magsabat kon may ara sila pamangkot. Kon kinahanglan ninyo nga maghalin dayon kay may iban pa nga kongregasyon nga magagamit sang tilipunan, mahimo ka magsiling: “Gusto ko mabal-an kon ano ang masiling mo sa programa. Paano ta ka makontak?”
3. Paano naton abiabihon ang mga di-aktibo?
3 Abiabiha ang mga Di-aktibo: Sigurado nga may matambong gid nga mga di-aktibo, lakip na ang iban nga sa Memoryal lang pirme makit-an. Abiabiha sila, kag ipabatyag sa ila nga nalipay ka gid nga makita sila. (Roma 15:7) Pagkatapos sang Memoryal, mahimo sila kadtuan sang mga gulang sa ila balay para palig-unon nga padayon nga makig-upod sa kongregasyon. Ginapangamuyo gid naton nga madamo nga tumalambong ang mapalig-on nga himayaon ang Dios indi lamang bangod sa ila mabatian kundi ‘bangod sang aton maayong mga buhat nga masaksihan mismo nila.’—1 Ped. 2:12.