Abiabiha Sila!
1. Ano nga okasyon ang nagahatag sa aton sing kahigayunan nga makapanaksi, kag ngaa?
1 Ang Memoryal isa ka okasyon nga nagahatag sa aton sing pinasahi nga kahigayunan nga makapanaksi. Binagbinaga ini: Sa sini nga tuig, sobra napulo ka milyon nga bisita ang ginapaabot nga matambong sa Memoryal kag mamati parte sa duha ka gugma nga ginpabutyag paagi sa gawad. (Juan 3:16; 15:13) Matun-an nila ang mga pagpakamaayo nga mahimo nila matigayon paagi sa regalo ni Jehova. (Isa. 65:21-23) Pero, indi lamang ang humalambal ang makapanaksi sa sini nga okasyon. Ang tanan nga tumalambong may kahigayunan nga makapanaksi paagi sa mahigugmaon nga pag-abiabi sa mga bisita.—Roma 15:7.
2. Paano naton maabiabi sing mahigugmaon ang mga bisita?
2 Sa baylo nga mangita lang sing pulungkuan kag hulaton nga magsugod ang programa, ngaa indi pagtinguhai nga kilalahon ang iban? Ang mga bisita mahimo nakulbaan kag wala sing hinalung-ong sa programa. Ang aton mga yuhum kag pag-abiabi makabulig sa ila nga mangin komportable. Para mahibaluan kon bala nakatambong ang bisita bangod sa imbitasyon, mahimo mo sia pamangkuton kon nakatambong na sia sa aton mga miting ukon kon may kilala sia sa kongregasyon. Puede mo sia agdahon nga magtupad sa imo kag ipagamit sa iya ang imo Biblia kag libro sang ambahanon. Kon sa Kingdom Hall hiwaton ang okasyon, mahimo mo man sia i-tour sing makadali. Pagkatapos sang programa, mangin handa nga sabton ang iya mga pamangkot. Kon kinahanglan kamo maggua gilayon bangod magabulos naman ang iban nga kongregasyon, mahimo mo sia silingan: “Gusto ko mahibaluan ang imo masiling parte sa programa. Paano ko ikaw makontak?” Dayon maghimo sing kahimusan nga matatap ang iya interes. Dapat mangin alisto ang mga gulang sa pagpalig-on sa mga di-aktibo nga nagtambong.
3. Ngaa dapat kita mangita sing paagi sa pag-abiabi sa mga bisita sa Memoryal?
3 Para sa kalabanan nga bisita, posible nga amo ini ang una nga higayon nga makita nila ang kalipay, paghidait, kag paghiusa sa espirituwal nga paraiso nga ginaagom naton subong katawhan ni Jehova. (Sal. 29:11; Isa. 11:6-9; 65:13, 14) Ano ayhan ang madumduman sang mga bisita sa ila pagtambong? Nagadepende ini sa kon paano naton sila abiabihon.