Paghanda—Isa ka Yabi sa Epektibo nga Pagduaw-liwat
1. Ngaa magalapnag ang pagministeryo sang una nga mga Cristiano?
1 Ginhanda sing maayo ni Jesus ang iya mga disipulo agod mangin epektibo sila nga mga manugbantala sing “maayong balita sang ginharian.” (Mat. 4:23; 9:35) Ginhanas sila ni Jesus samtang nagabantala sa Palestina lamang. Apang, antes nagkayab si Jesus sa langit, ginpahibalo niya sa iya mga alagad nga magalapnag ang ila ministeryo kay ‘magahimo sila sing mga disipulo sa mga tawo sang tanan nga pungsod.’—Mat. 28:19, 20.
2. Ano ang nalakip sa pagtuman sang sugo ni Jesus nga ‘maghimo sing disipulo’?
2 Nalakip sa sina nga hilikuton ang pagduaw-liwat sa mga tawo nga nagpakita sing interes sa maayong balita sang Ginharian sang Dios kag pagtudlo sa ila nga tumanon ang tanan nga butang nga ginsugo ni Cristo. Agod makahimo sing epektibo nga mga pagduaw-liwat, dapat maghanda kita sing maayo.
3. Paano ka makabukas sing dalan para sa pagduaw-liwat sa una mo nga pagpakigsugilanon?
3 Magplano sing Abanse: Ang ginahimo sang iban nga mga manugbantala amo ang pagbilin sing pamangkot sa tagbalay antes sila maghalin sa una nga pagduaw. Dayon, ginasilingan nila ang tagbalay nga magabalik sila agod sabton ina nga pamangkot. Natalupangdan nila nga ang paggamit sang impormasyon nga makit-an sa Ginatudlo sang Biblia nga libro sa ila pagduaw-liwat nakabulig nga makasugod sila sing pagtuon sa Biblia.
4. Ngaa indi kita kinahanglan maghulat pa sang bag-o nga isyu sang mga magasin antes magduaw-liwat?
4 Bangod isa na lang ka isyu sang magasin ang aton ginabaton kada bulan, indi kinahanglan nga hulaton pa naton ang masunod nga isyu agod magduaw-liwat. Puede naton mapalambo ang interes sang tawo paagi sa pagbinagbinag sang impormasyon sa magasin nga yara na sa ila.
5. Ngaa importante nga may yara ka plano kon ano ang himuon sa pagduaw-liwat?
5 Planuha Kon Ano ang Himuon: Antes magduaw-liwat, hatagi anay sing tion ang pagrepaso sang imo mga rekord kag planuha kon ano ang luyag mo himuon. Halimbawa, puede mo binagbinagon ang isa ka punto gikan sa publikasyon nga imo ginbilin sa tagbalay. Ukon puede mo man sia bilinan sang isa pa ka literatura nga nagahinun-anon sa topiko nga inyo gin-istoryahan sang nagligad. Kon nagbilin ka sing isa ka pamangkot, dapat gid nga sabton mo ini pagbalik mo. Kon luyag mo padakuon ang isa ka teksto nga nagasakdag sa punto nga inyo ginbinagbinag, tinguhai nga basahon ini sing direkta sa Biblia.
6. Ano ang aton tulumuron sa pagduaw-liwat?
6 Ang Aton Tulumuron: Sa pagkamatuod, ang aton tulumuron amo ang pagsugod sing isa ka pagtuon sa Biblia. Ang isa ka utod nga lalaki nagtanyag sing isa ka pagtuon sa Biblia sa iya pagduaw-liwat, apang nagpangindi ang tawo. Ginbalikan sia sang utod dala ang bag-o nga mga magasin kag nagsiling, “Ari kami diri karon bangod luyag namon sabton ang isa ka pamangkot sang mga tawo nga may kaangtanan sa Biblia.” Pagkatapos mapakomento ang tawo, nagbasa ang utod sing isa ka teksto kag sing nagakaigo nga parapo gikan sa publikasyon nga ginagamit sa pagtuon sa Biblia. Nagdul-ong ini sa isa ka regular nga pagtuon sa Biblia.
7. Paano ang paghanda sing maayo makabulig sa imo nga makasugod sing isa ka pagtuon sa Biblia?
7 Mapuslanon gid ang paghinguyang sing tion sa paghanda para sa pagduaw-liwat. Labi kita nga mangin malipayon, kag mahimo kita makapribilehiyo nga mabuligan ang isa nga “husto nga nahuyog” padulong sa kabuhi.—Binu. 13:48.