Buligi Yadtong ‘Husto nga Nahuyog’
1. Sin-o ang ginatipon ni Jehova sa aton adlaw agod mangin iya?
1 Ang kada tawo may huyog nga yara sa iya malaragwayon nga tagipusuon. (Mat. 12:35) Ang Biblia nagahambal tuhoy sa isa nga “ang tagipusuon inaway.” (Sal. 55:21) Ang pila “naakig.” (Hulu. 29:22) Apang may yara man sadtong “husto nga nahuyog sa kabuhi nga walay katapusan.” (Binu. 13:48, NW) Sa aton adlaw, ginatipon ni Jehova ining mga husto nga nahuyog. (Hag. 2:7) Paano naton sila mabuligan nga mangin mga sumilimba ni Jehova?
2. Ano ang nadalahig sa pagtuman sang aton komisyon nga maghimo sing mga disipulo?
2 Mangin Maukod sa Pagduaw Liwat: Importante nga may husto nga pagtamod sa paghimo sing mga pagduaw liwat agod matuman ang aton komisyon nga maghimo sing mga disipulo. (Mat. 28:19, 20) Makugi bala kita sa pagtatap sing interes nga aton masapwan? Nagaduaw bala kita liwat sa tanan nga nagbaton sang literatura ukon nagpakita sing interes sa maayong balita? Nagapanikasog gid bala kita nga buligan sila nga magtubo sa espirituwal? Bangod nadalahig ang kabuhi, dapat naton tinguhaan nga palambuon ang tanan nga interes nga aton masapwan.
3. Ano ang dapat naton himuon pagkatapos nga may nasugilanon kita sa ministeryo?
3 Samtang wala mo pa malipatan ang ginhambalan ninyo sang interesado, maghinguyang sing tion nga isulat ang iya ngalan kag direksion. Isulat ang ginhambalan nga topiko, ang bisan ano nga kasulatan nga ginbasa, kag kon ano nga literatura ang napahamtang. Pagkatapos, pat-ura nga makabalik dayon.
4. Paano naton mahimo ang epektibo nga mga pagduaw liwat?
4 Kon Paano Magduaw Liwat: Kon ikaw nagaduaw liwat, makabulig nga mangin mainit kag mainabyanon kag magpakita sing sinsero kag personal nga interes sa tagbalay. Hupti nga simple kag pasad sa Kasulatan ang paghambalanay. Ihanda ang makawiwili nga topiko sa Biblia nga pagahambalan, kag sa paghingapos sang pagduaw, magpautwas sing isa ka pamangkot nga pagasabton sa masunod nga pagduaw. Mas maayo nga likawan nga magbais sa di-makasulatanhon nga mga pagtamod nga mahimo ipabutyag sang tagbalay. Panikasugi nga mahambalan ang mga butang nga inyo ginaugyunan.—Col. 4:6.
5. Ano nga panikasog ang ginhimo sang isa ka payunir, kag ano ang mga resulta?
5 Ang mga pagduaw liwat nagakinahanglan sing panikasog, apang makaalayaw ang mga padya. Ang isa ka payunir sa Japan nagpahamtang sing tulumuron nga dugangan ang iya mga pagduaw liwat sa tagsa ka bulan. Nagsugod sia sa paghupot sing rekord sang tanan niya nga masugilanon sa pamalaybalay, kag nian sa sulod sang pito ka adlaw, ginaduaw niya sila liwat. Nagahanda gid sia sing maayo sa iya inughambal kag ginahimo ang iya ministeryo nga may bug-os nga pagsalig sa mensahe nga iya ginadala. Sa isa niya ka pagduaw liwat, nakasugod sia sing isa ka pagtuon sa isa ka tawo nga nagsiling: “Wala ko kamo pirme ginabaton. Karon pa lang ako namati.” Ang mahigugmaon nga kaukod sang payunir nagpatubas sing mga resulta. Nakareport sia sing napulo ka pagtuon sa Biblia sa katapusan sang bulan.
6.Ngaa dapat kita magmaukod sa paghimo sing mga pagduaw liwat?
6 Pirme nagabag-o ang mga kahimtangan sang mga tawo. (1 Cor. 7:31) Masami nga nagakinahanglan sing pila ka pagduaw agod masapwan liwat ang interesado sa ila puluy-an. Paagi sa aton maukod nga paghimo sing mga pagduaw liwat, sarang naton mabuligan yadtong husto nga nahuyog nga makalakat sa dalan nga nagapadulong sa kabuhi nga wala sing katapusan.—Mat. 7:13, 14.