Tudlui ang mga Tawo nga Limitado ang Ikasarang sa Pagbasa
1. Ano nga hangkat ang mahimo naton masumalang sa ministeryo?
1 Sa aton pagministeryo, makasumalang kita kon kaisa sang mga hangkat sa pagtudlo sang kamatuoran sa mga tawo nga nabudlayan sa pagbasa. Ano ang himuon naton?
2. Paano kita makapakita sing respeto sa mga tawo nga limitado ang ikasarang sa pagbasa, kag ngaa?
2 Respetuha Sila: Importante kay Jehova kon ano ang yara sa tagipusuon sang isa ka tawo, indi ang iya sekular nga edukasyon. (1 Sam. 16:7; Hulu. 21:2) Gani, wala naton ginapakanubo ang mga tawo nga limitado ang ikasarang sa pagbasa. Mahimo nga batunon gilayon sini nga mga tawo ang aton bulig kon nagapakita kita sing respeto kag pagpailob sa ila. (1 Ped. 3:15) Indi naton sila dapat pagpiliton nga basahon ang isa ka teksto ukon parapo kon magbalibad sila. Samtang nagauswag ang isa ka tawo sa pagtuon sang hamili nga mga kamatuoran sa Biblia, mahimo mapahulag sia nga pauswagon ang iya pagbasa. Sa amo, mabatyagan niya ang kalipay sa pagbasa sang Pulong sang Dios kag ‘mapamalandungan ini sa adlaw kag gab-i.’—Sal. 1:2, 3.
3. Ano nga mga paagi sa pagtudlo ang mahimo gamiton para sa mga tawo nga limitado ang ikasarang sa pagbasa?
3 Mga Pamaagi sang Pagtudlo sa Biblia: Ang mga laragway mapuslanon gid sa pagtudlo. Makabulig ini agod indi malipatan sang isa ang iya natun-an. Mahimo mo pamangkuton ang estudyante kon ano ang iya masiling sa laragway sa publikasyon nga inyo ginatun-an. Dayon pamangkuta sia sing espesipiko nga mga pamangkot agod mabuligan sia nga mahangpan ang ginatudlo sang laragway. Basaha ang mga teksto nga nagapadaku sang espesipiko nga mga punto sang laragway. Mahimo mo man gamiton ang mga laragway sa pagrepaso sa inyo natun-an. Indi kinahanglan nga madamo ang tun-an sa tagsa ka pagtuon. Ipadaku lamang ang tema kag ang panguna nga mga punto, kag indi pag-ilakip ang mga punto nga wala sing labot sa inyo ginatun-an. Basaha sing direkta sa Biblia ang teksto, kag maggamit sing mga pamangkot agod mapat-od kon bala nahangpan sang estudyante ang ginbasa nga teksto. Bangod sini, malangkag pa gid sia nga magtuon kon paano magbasa agod madamo pa sia sing matun-an nga mga kamatuoran sa Biblia.
4. Paano naton mabuligan ang aton estudyante nga mapauswag ang iya ikasarang sa pagbasa?
4 Mga Bulig Agod Mag-uswag sa Pagbasa: Ang mga tawo nga limitado ang ikasarang sa pagbasa ukon wala gani makatuon sa pagbasa mahimo madali lang makahangop kag makadumdom sang impormasyon. Mahimo mo sila palig-unon nga magpamati sa mga maayo magbasa samtang ginasundan ini sa naimprinta nga kopya, ukon ilugon ang pagbasa sa mahinay nga tingog. Makabulig ini sa isa nga mapauswag ang iya ikasarang sa pagbasa. Makabulig man sa iya ang brosyur nga Apply Yourself to Reading and Writing. Sa iban nga mga lugar, ang mga gulang nagahimo sing kahimusan sa paghiwat sang mga klase sa pagbasa sa kongregasyon. Ining praktikal nga mga panugda makabulig sa aton sa pagtudlo sa mga tawo nga limitado ang ikasarang sa pagbasa. Paagi sa sini, mahangpan nila ang “balaan nga mga sinulatan,” nga makahatag sa ila sing kaalam para sa kaluwasan.—2 Tim. 3:15.