Buligi ang mga Nabudlayan Magbasa

1. Ano nga hangkat ang imo maatubang sa mga nabudlayan magbasa?

¹ Ang mga tagbalay nga nabudlayan magbasa mahimo interesado sa espirituwal nga mga butang. Pero mahimo mangalag-ag sila kon gamiton ang Biblia kag ang iban nga libro. Mahimo indi epektibo kon gamiton naton sa umpisa ang libro nga Ginatudlo sang Biblia. Paano naton sila mabuligan sa espirituwal? Ginpamangkot namon ang eksperiensiado nga mga manugbantala gikan sa sobra 20 ka pungsod kon ano ang ila ginhimo. Mabasa sa masunod nga mga parapo ang ila mga panugda.

2. Ano nga mga publikasyon ang epektibo sa pagbulig sa mga nabudlayan magbasa?

² Kon ang estudyante nabudlayan ukon indi gid makahibalo magbasa, mahimo mo gamiton sa umpisa ang brosyur nga Listen to God ukon Pamatii ang Dios Agod Magkabuhi Ka sing Walay Katapusan. Ginapakita sang isa ka payunir nga taga-Estados Unidos sa tagbalay ang duha ka brosyur kag ginapamangkot kon diin ang gusto niya. Ang sanga talatapan sa Kenya nagsiling nga ini nga mga brosyur epektibo gid sa mga Aprikano kay naanad sila nga ginatudluan paagi sa pagpamati sa istorya sa baylo sa pamangkot-kag-sabat. Mahimo maluyagan sang isa ka edukado nga tawo nga magbasa kag pamangkuton sia. Pero mahimo indi ini maluyagan sang isa nga manubo sing tinun-an. Kon ang estudyante makahibalo magbasa, ginagamit sang iban nga manugbantala ang mga brosyur nga Maayong Balita Halin sa Dios!, Mahimo Ikaw Mangin Abyan Sang Dios!, ukon ang libro nga Ang Akon Libro sang mga Sugilanon sa Biblia.

3. Ano ang dapat naton himuon para mabuligan sing epektibo ang mga indi makahibalo magbasa?

³ Maghatag sing Komendasyon: Ang mga indi makahibalo magbasa mahimo mahuluy-on kag manubo ang pagtamod sa kaugalingon. Sa masami ang una nga tikang nga matudluan sila sing kamatuoran amo ang pagbulig sa ila nga indi matahap. Ang kalabanan nga indi makahibalo magbasa maalam kag mahapos tudluan. Pakig-anguti sila nga may pagtahod kag dignidad. (1 Ped. 3:15) Mapalig-on sila nga magpadayon sa pagtuon kon nagabenepisyo sila kag nagauswag sa espirituwal. Gani hatagi sila pirme sing komendasyon.

4. Paano naton palig-unon ang mga nabudlayan magbasa sa paghanda sa pagtuon?

⁴ Bisan pa ang estudyante nabudlayan magbasa, palig-una sia nga handaan ang inyo pagtuon. Ang iban nga manugbantala sa Bagatnan nga Aprika nagapalig-on sa mga estudyante nga magpatudlo sa ila pamilya ukon abyan sa pagbasa. Ang isa ka manugbantala sa Britanya nagapalig-on sa iya mga estudyante nga maghanda paagi sa pagpahulam sang iya libro samtang ginabinagbinag ang pila ka parapo para matudluan sila nga mas mahapos makita ang mga sabat kon may kurit ini. Ang isa naman ka brother sa India nagapalig-on sa iya mga estudyante nga tan-awon ang mga laragway sa masunod nga leksion kag pamalandungan ini sing abanse.

5. Paano naton mapakita ang pagkamapinasensiahon kon nagadumala sing pagtuon?

⁵ Mangin Mapinasensiahon: Ano man nga publikasyon ang imo gamiton, magkonsentrar sa panguna nga mga punto, kag buligi ang imo estudyante nga mahangpan ini. Sa umpisa, maayo nga 10 asta 15 minutos lang anay ang pagtuon, ayhan ginatuptupan ang pila lang ka parapo sa kada sesyon. Mangin mapinasensiahon kon mahinay magbasa ang estudyante. Mapalig-on sia nga pauswagon ang iya ikasarang sa pagbasa samtang nagatubo ang iya apresasyon kay Jehova. Para mahimo niya ini, sa umpisa pa lang maayo nga imbitahon na sia sa mga miting.

6. Paano naton mabuligan ang isa nga makatuon sa pagbasa?

⁶ Madasig mag-uswag sa espirituwal ang mga estudyante sa Biblia kon makahibalo sila magbasa. (Sal. 1:1-3) Madamo ang nabuligan sang publikasyon nga Apply Yourself to Reading and Writing sang ginbinagbinag ini sa ila sa sulod sang pila ka minutos sa tapos sang kada pagtuon. Kon maluyahan ang estudyante, mahimo mo ipatalupangod sa iya ang mga pag-uswag nga iya nahimo. Pasaliga sia nga pakamaayuhon ni Jehova ang iya mga panikasog, kag palig-una sia nga mangayo sing bulig paagi sa pangamuyo. (Hulu. 16:3; 1 Juan 5:14, 15) Ang iban nga manugbantala sa Britanya nagapalig-on sa ila mga estudyante nga magpahamtang sing rasonable nga mga tulumuron—ayhan kabisaduhon ang alpabeto, pangitaon kag basahon ang pila ka teksto, dayon basahon ang simplified nga publikasyon pasad sa Biblia. Sa masami, para mapalig-on ang mga tawo sa pagbasa, indi lang bastante nga tudluan sila kundi dapat mapalambo nila ang handum sa pagbasa.

7. Ngaa indi kita magpangalag-ag sa pagpaambit sang kamatuoran sa mga nabudlayan magbasa?

⁷ Wala ginapakanubo ni Jehova ang mga tawo nga diutay sing tinun-an. (Job 34:19) Ang importante sa iya amo ang ara sa sulod sang tagipusuon. (1 Cron. 28:9) Gani indi magpangalag-ag sa pagpaambit sang kamatuoran sa mga nabudlayan magbasa. Madamo sing publikasyon nga makabulig sa imo. Sa ulihi, mahimo mo maliton ang pagtuon sa libro nga Ginatudlo sang Biblia para mahangpan niya sing maayo ang Kasulatan.