Pamangkot

◼ Ano ang dapat mo himuon kon pauntaton ka sa pagbantala?

May pila ka kahimtangan nga ginpalapitan sang pulis ang mga manugbantala nga nagapakigbahin sa pila ka sahi sang pagministeryo kag ginsilingan sila nga ginlapas nila ang kasuguan kag ginpauntat sila sa ila hilikuton. Kon amo sini ang matabo, dapat ka maghalin gilayon sa teritoryo sing matinahuron. (Mat. 5:41; Fil. 4:5) Indi pagtinguhai nga solbaron sa imo kaugalingon ini nga butang paagi sa pagpaathag sa aton legal nga mga kinamatarong. Kon mahimo, kuhaa sing mataktikanhon ang numero sang tsapa kag presinto sang pulis. Pagkatapos, pahibalua gilayon ang mga gulang, nga amo ang magapahibalo sa sanga talatapan tuhoy sa kahimtangan. Sing kaanggid, kon pangabayon sang nagadumala ukon sang bisan sin-o nga gintangdo sang nagadumala sang apartment ukon pasilidad nga maghalin ka, dapat ka magtuman sa gilayon kag ipahibalo ini sa mga gulang. Makabulig sing daku ang malulo kag mapainubuson nga pagpakig-angot sa may awtoridad agod indi na maglala ang kahimtangan.—Hulu. 15:1; Roma 12:18.