Mga Saksi Kita sa Tanan nga Tion
1. Ano ang matun-an naton sa kasaysayan parte sa pagpanaksi ni Jesus sa babayi sa bubon?
1 Inoras na nga nagalakat si Jesus. Kapoy gid sia kag ginauhaw. Sang naglakat ang iya mga disipulo agod magbakal sing pagkaon, nagpungko sia sa isa ka bubon sa gua sang siudad sang Samaria para magpahuway. Wala nagkadto si Jesus sa Samaria agod magbantala; nag-agi lang sia diri pakadto sa Galilea agod padayunon ang iya pagministeryo didto. Apang, ginhingalitan niya ang kahigayunan nga panaksihan ang babayi nga magasag-ub sing tubig. (Juan 4:5-14) Ngaa? Wala nag-untat si Jesus subong “ang matutom kag matuod nga saksi” ni Jehova. (Bug. 3:14) Ginailog naton si Jesus paagi sa pagpakita nga mga Saksi kita ni Jehova sa tanan nga tion.—1 Ped. 2:21.
2. Paano kita mangin handa sa pagpanaksi sing di-pormal?
2 Mangin Handa: Mangin handa kita sa pagpanaksi sing di-pormal paagi sa pagdala sing mga literatura. Madamo nga manugbantala ang nagadala sing mga tract kag ginapahamtang ini sa mga nagabantay sang tiendahan, gasolinahan, kag sa iban pa nga masugilanon nila sa bilog nga adlaw. (Man. 11:6) Nagadala pirme sing pocket-size nga Biblia kag Ginatudlo Sang Biblia nga libro ang isa ka utod nga babayi nga pirme nagabiyahe, kag ginasugilanon niya ang iya tupad sa pulungkuan.
3. Paano naton mahimo sugdan ang paghambalanay?
3 Pagsugod sa Paghambalanay: Kon nagapanaksi sing di-pormal, indi kinahanglan nga sugdan naton gilayon ang paghambalanay paagi sa isa ka topiko sa Biblia. Wala ginsugdan ni Jesus ang pagpakighambal sa babayi sa bubon paagi sa pagpakilala sang iya kaugalingon subong ang Mesias. Nangayo lang sia sing tubig, nga nagresulta sa pagpangusisa sang babayi. (Juan 4:7-9) Ini nga pamaagi nakabulig sa isa ka utod nga babayi nga masugdan ang paghambalanay sang ginpamangkot sia kon nalipay man sia sa pagselebrar sang kapiestahan. Sa baylo nga magsabat nga wala sia nagapakigbahin bangod isa sia ka Saksi ni Jehova, sia nagsabat, “Wala ako nagaselebrar.” Kinaandan nga matingala ang nagapamangkot, nga nagahatag sing kahigayunan sa utod agod makapanaksi.
4. Ngaa makapalig-on sa imo ang Mateo 28:18-20?
4 Bisan pa natapos na ni Jesus ang iya makugi nga pagministeryo sa duta, padayon sia nga interesado sa pagbantala nga hilikuton karon. (Mat. 28:18-20) Kaangay sang aton Huwaran nga si Jesus, mga Saksi kita nga handa sa dayag nga pagpahayag sang aton pagtuo sa tanan nga tion.—Heb. 10:23.