Kalipikado Bala Ako sa Pagbantala?
1. Ngaa indi kita dapat magbatyag nga indi kalipikado sa pagbantala?
1 Kon nagabatyag ka nga indi ka kalipikado sa pagbantala, indi magkabalaka! Ang sekular nga edukasyon ukon pinasahi nga mga ikasarang indi amo ang kalipikasyon agod mangin manugbantala kita. Ang iban sa unang mga disipulo ginlaragway subong “wala sing tinun-an kag kinaandan lamang.” Pero, nangin epektibo sila nga mga manugbantala sang maayong balita bangod determinado nila nga ginsunod ang halimbawa ni Jesus.—Binu. 4:13; 1 Ped. 2:21.
2. Ano ang pila sang mga pamaagi ni Jesus sa pagpanudlo?
2 Kon Paano Nagpanudlo si Jesus: Simple, praktikal, kag madali mahangpan ang pamaagi ni Jesus sa pagpanudlo. Bangod sang iya mga pamangkot, mga ilustrasyon, kag simple nga mga introduksion, nakuha niya ang atension sang iya mga tagpalamati. (Mat. 6:26) Nagpakita sia sing tudok nga interes sa mga tawo. (Mat. 14:14) Dugang pa, nagpamulong si Jesus nga may kompiansa kag awtoridad, nga nakahibalo nga ginpadala sia ni Jehova kag ginhatagan sing kusog para matuman ang iya asaynment.—Luc. 4:18.
3. Paano kita ginabuligan ni Jehova nga matuman ang aton ministeryo?
3 Ginabuligan Kita ni Jehova: Paagi sa iya Pulong kag organisasyon, ang aton Dakung Instruktor nagahanas sa aton agod magmadinalag-on kita sa pagbantala sing maayong balita. (Isa. 54:13) Bangod ginhuptan ni Jehova ang rekord sang pagpanudlo ni Jesus, mahimo naton matun-an kag mailog ang iya mga pamaagi. Ginahatag sa aton ni Jehova ang iya balaan nga espiritu kag ginahanas niya kita paagi sa mga miting sa kongregasyon. (Juan 14:26) Dugang pa, ginaaman niya ang eksperiensiado nga mga manugbantala agod magbulig sa aton nga mangin mas epektibo sa pagbantala.
4. Ngaa may rason gid kita nga magbatyag nga kalipikado kita sa pagpaambit sing maayong balita sa iban?
4 May rason gid kita nga magbatyag nga kalipikado kita sa pagbantala bangod ‘ang aton pagkakalipikado nagagikan sa Dios.’ (2 Cor. 3:5) Samtang nagasalig kita kay Jehova kag matutom nga ginapanginpuslan ang iya mahigugmaon nga mga aman, ‘may ikasarang gid kita kag nasangkapan sing bug-os para sa tagsa ka maayong buhat.’—2 Tim. 3:17.