Nasangkapan sing Bug-os Subong mga Manunudlo sang Pulong sang Dios
“[Ang] Dios . . . naghimo gid sa amon nga mangin kalipikado sing nagakaigo agod mangin mga ministro.”—2 CORINTO 3:5, 6.
1, 2. Ano nga mga panikasog sa pagbantala ang ginahimo kon kaisa, apang ngaa masami ini nagakapaslawan?
ANO ang batyagon mo kon hatagan ka sing trabaho nga indi ka kalipikado sa paghimo? Handurawa lamang: Ang mga materyales nga kinahanglanon mo ginbutang sa imo atubangan, kag amo man ang mga kagamitan. Apang wala ka sing ideya kon ano ang himuon. Ang malain pa, ginadalian ining partikular nga trabaho. Ang mga tawo nagasalig sa imo. Daw ano gid ini ka makabalang-aw!
2 Ini nga problema indi gid handurawan lamang. Binagbinaga ang halimbawa. Kon kaisa, ang isa sang mga simbahan sang Cristiandad nagtinguha sa pag-organisar kag sa paghimo sing pamalaybalay nga ministeryo. Ini nga mga panikasog masunson nga nagakapaslawan, ginauntat sa sulod lamang sang senemana ukon binulan. Ngaa? Wala ginbuligan sang Cristiandad ang iya mga sumilimba nga mangin kalipikado sa trabaho. Bisan ang mga klero indi kalipikado sa sining pagbantala nga hilikuton, sa masami walay sapayan sang tinuig nga pagtuon sa sekular nga mga eskwelahan kag mga seminaryo. Ngaa masiling naton ini?
3. Sa 2 Corinto 3:5, 6, ano nga ekspresyon ang gingamit sing tatlo ka beses, kag ano ang kahulugan sini?
3 Ginapaathag sang Pulong sang Dios kon paano mangin kalipikado ang isa ka matuod nga manugbantala sang Cristianong maayong balita. Si apostol Pablo gin-inspirar sa pagsulat: “Indi nga kami kalipikado sing nagakaigo sa amon kaugalingon sa pag-isip sa bisan ano nga butang subong nga gikan sa amon kaugalingon, kundi ang amon pagkamangin kalipikado sing nagakaigo nagagikan sa Dios, nga naghimo gid sa amon nga mangin kalipikado sing nagakaigo agod mangin mga ministro.” (2 Corinto 3:5, 6) Talupangda ang ekspresyon nga gingamit diri sing tatlo ka beses—“kalipikado sing nagakaigo.” Ano ang kahulugan sini? Ang Vine’s Expository Dictionary of Biblical Words nagsiling: “Kon nagapatuhoy sa mga butang [ang orihinal nga Griegong tinaga] nagakahulugan sing ‘igo’ . . . ; kon nagapatuhoy sa mga tawo, nagakahulugan ini sing ‘sangkol,’ ‘takus.’ ” Sa amo, ang isa nga “kalipikado sing nagakaigo” sangkol kag takus sa paghimo sa hilikuton. Huo, ang matuod nga mga ministro sang maayong balita kalipikado sa paghimo sini nga hilikuton. Sangkol sila, nagakabagay, ukon takus sa pagbantala.
4. (a) Paano ginapakita sang halimbawa ni Pablo nga ang kalipikasyon sa Cristianong ministeryo indi lamang para sa pila ka pinili? (b) Ano ang tatlo ka paagi nga ginahimo kita ni Jehova nga mangin kalipikado subong mga ministro?
4 Apang, diin nagahalin ini nga kalipikasyon? Sa personal bala nga mga kinaadman? Sa mataas bala nga kaalam? Sa pinasahi bala nga edukasyon sa kilala nga mga eskwelahan? Si apostol Pablo maathag nga may amo sining tanan nga butang. (Binuhatan 22:3; Filipos 3:4, 5) Apang, mapainubuson nga ginkilala niya nga ang iya mga kalipikasyon subong ministro naghalin, indi sa mga eskwelahan nga may mataas nga panudlo, kundi kay Jehova nga Dios. Ini bala nga mga kalipikasyon para lamang sa pila ka pinili? Si Pablo nagsulat sa kongregasyon sa Corinto tuhoy sa “amon pagkamangin kalipikado sing nagakaigo.” Nagapahangop gid ini nga ginapat-od ni Jehova nga ang tanan niya nga matutom nga mga alagad sangkol, nga makasarang sa paghimo sa hilikuton nga ginapahimo niya sa ila. Paano ginahimo nga kalipikado ni Jehova ang matuod nga mga Cristiano karon? Binagbinagon naton ang tatlo ka paagi nga ginagamit niya: (1) ang iya Pulong, (2) ang iya balaan nga espiritu, kag (3) ang iya dutan-on nga organisasyon.
Ang Pulong ni Jehova Nagabulig sa Aton nga Mangin Kalipikado
5, 6. Ano ang epekto sang Balaan nga Kasulatan sa matuod nga mga Cristiano?
5 Una, paano nagabulig ang Pulong sang Dios agod mangin kalipikado kita subong mga ministro? Si Pablo nagsulat: “Ang bug-os nga Kasulatan inspirado sang Dios kag mapuslanon sa pagpanudlo, sa pagsabdong, sa pagtadlong sang mga butang, sa pagdisiplina sa pagkamatarong, agod nga ang tawo sang Dios may lubos nga ikasarang, nga nasangkapan sing bug-os para sa tagsa ka maayong buhat.” (2 Timoteo 3:16, 17) Gani ang Balaan nga Kasulatan nagabulig sa aton nga mangin “may lubos nga ikasarang, nga nasangkapan sing bug-os” sa paghimo sang “maayong buhat” nga tudluan ang mga tawo sa Pulong sang Dios. Apang, kamusta naman ining tanan nga sumilimba sang mga simbahan sang Cristiandad? May matigayon ukon magamit sila nga Biblia. Paano ang isa ka libro makabulig sa iban nga tawo nga mangin sangkol nga mga ministro kag sa iban naman indi? Ang sabat nasandig sa aton panimuot sa Biblia.
6 Sing makapasubo, madamo nga nagasimba ang wala nagabaton sang mensahe sang Biblia “kon ano gid ini sa pagkamatuod, subong pulong sang Dios.” (1 Tesalonica 2:13) Ang Cristiandad nagtipon sing makahuluya nga rekord bahin sini. Pagkatapos sang tinuig nga pagtuon sa teolohiko nga mga eskwelahan, nasangkapan bala ang mga klero nga mangin manunudlo sang Pulong sang Dios? Wala gid. Aba, ang iban nga mga estudyante nagsugod sa pagtuon sa seminaryo subong mga tumuluo sang Biblia apang naggradwar subong mga mapangduhaduhaon! Pagkatapos sini, sa baylo nga ibantala ang Pulong sang Dios—nga wala na ginapatihan sang madamo sa ila—ginapatuhoy nila ang ila ministeryo sa iban nga butang, nagadampig sa mga binais sa politika, nagapauswag sang sosyal nga ebanghelyo, ukon nagapadaku sang tawhanon nga mga pilosopiya sa ila mga sermon. (2 Timoteo 4:3) Sa pagpatuhay, ginailog sang matuod nga mga Cristiano ang halimbawa ni Jesucristo.
7, 8. Paano ang panimuot ni Jesus sa Pulong sang Dios tuhay sa relihiosong mga lider sang panahon niya?
7 Wala magtugot si Jesus nga maimpluwensiahan sang relihiosong mga lider sang panahon niya ang iya hunahuna. Nagatudlo man sa isa ka diutay nga grupo, subong sang iya mga apostoles, ukon sa daku nga kadam-an, gingamit ni Jesus pirme ang balaan nga kasulatan. (Mateo 13:10-17; 15:1-11) Ini nga buhat naghimo sa iya nga tuhay sa relihiosong mga lider sang panahon niya. Ginpalas-ay gid nila ang mga tawo sa pag-usisa sa madalom nga mga butang sang Dios. Ang matuod, kinaandan sadto para sa isa ka manunudlo nga magpati nga ang pila ka teksto sa Biblia mabudlay gid mahangpan kag mahimo lamang hambalan upod sa iya paborito nga estudyante—kag bisan sadto pa, ginahimo ini sa mahinay lamang nga tingog kag may tabon sa ulo. Ang relihiosong mga lider mapinatihon gid sa disparatis tuhoy sa pagbinagbinag sa pila ka bahin sang Biblia kag sa pagmitlang nila sa ngalan sang Dios!
8 Indi amo sina si Cristo. Nagpati sia nga kinahanglan binagbinagon indi lamang sang pila ka pinili kundi sang katawhan sa kabug-usan ang “tagsa ka pulong nga nagaguwa sa baba ni Jehova.” Indi interesado si Jesus nga pinili nga grupo lamang sang mga iskolar ang makahangop sang Kasulatan. Nagsiling sia sa iya mga disipulo: “Ang ginasiling ko sa inyo sa kadudulman, ipamulong ninyo sa masanag; kag ang nabatian ninyo nga ginahutik, ibantala ninyo gikan sa mga atop sang balay.” (Mateo 4:4; 10:27) Luyag gid ni Jesus ipaambit ang ihibalo sang Dios sa madamo nga tawo kon posible.
9. Paano ginagamit sang matuod nga mga Cristiano ang Biblia?
9 Ang aton panudlo dapat nakasentro sa Pulong sang Dios. Halimbawa, kon maghatag kita sing pamulongpulong sa Kingdom Hall sang mga Saksi ni Jehova, sa masami indi tuman nga basahon lamang ang pinili nga mga bersikulo gikan sa Biblia. Mahimo kinahanglan naton ipaathag, iilustrar, kag iaplikar ang isa ka kasulatan sa konteksto. Ang aton tulumuron amo ang paghimo nga buhi sang mensahe sang Biblia kag ang pagpatudok sini sa tagipusuon sang aton mga tagpalamati. (Nehemias 8:8, 12) Kon kinahanglan, dapat man gamiton ang Biblia kon nagalaygay ukon nagahatag sing nagatadlong nga disiplina. Bisan pa ang katawhan ni Jehova nagapamulong sing nagkalainlain nga mga hambal kag may nanuhaytuhay nga ginhalinan, ginatahod nila tanan ang Libro sang mga libro—ang Biblia.
10. Ano ang epekto sang inspirado nga mensahe sang Biblia sa aton?
10 Kon ginagamit nga may amo sini nga pagtahod, ang mensahe sang Biblia may gahom. (Hebreo 4:12) Nagapahulag ini sa mga tawo sa paghimo sing mga pagbalhin sa ila kabuhi, subong sang pagtalikod sa di-makasulatanhon nga mga buhat sang pakighilawas, panghilahi, idolatriya, pagpahubog, kag pagpangawat. Nagbulig ini sa madamo nga ubahon ang daan nga personalidad kag isuklob ang bag-o nga personalidad. (Efeso 4:20-24) Huo, kon ginatahod naton ini labaw sa bisan anong tawhanon nga opinyon ukon tradisyon kag ginagamit ini sing matutom, ang Biblia makabulig sa aton nga mangin sangkol, nasangkapan sing bug-os subong mga manunudlo sang Pulong sang Dios.
Ang Espiritu ni Jehova Nagabulig sa Aton nga Mangin Kalipikado
11. Ngaa ang balaan nga espiritu ni Jehova nagakaigo nga mapatuhuyan subong “mananabang”?
11 Ikaduha, binagbinagon naton ang papel sang balaan nga espiritu, ukon aktibo nga kusog, ni Jehova sa pagbulig sa aton nga masangkapan sing bug-os. Indi gid naton dapat pagkalimtan nga ang espiritu ni Jehova amo ang pinakamakusog nga puwersa. Ginhatagan ni Jehova sing gahom ang iya hinigugma nga Anak nga gamiton ining makapulunaw nga puwersa para sa tanan nga matuod nga mga Cristiano. Nagakaigo nga ginpatuhuyan ni Jesus ang balaan nga espiritu subong “mananabang.” (Juan 16:7) Ginlaygayan niya ang iya mga sumulunod nga pangayuon kay Jehova ini nga espiritu, nagapasalig sa ila nga ihatag ini ni Jehova sing bugana.—Lucas 11:10-13; Santiago 1:17.
12, 13. (a) Ngaa importante nga mangamuyo kita nga buligan kita sang balaan nga espiritu sa aton ministeryo? (b) Paano ginpakita sang mga Fariseo nga ang balaan nga espiritu wala nagapanghikot sa ila?
12 Dapat kita mangamuyo sing balaan nga espiritu adlaw-adlaw, ilabi na agod buligan kita sa aton ministeryo. Ano ang epekto sining aktibo nga kusog sa aton? Makaimpluwensia ini sa aton hunahuna kag tagipusuon, nagabulig sa aton sa pagbag-o, sa pagtubo, kag sa pag-ilis sa daan nga personalidad sing bag-o. (Colosas 3:9, 10) Makabulig ini sa aton sa pagpalambo sing hamili kag tulad-Cristo nga mga kinaiya. Masaulo sang madamo sa aton ang Galacia 5:22, 23. Ginalista sining mga bersikulo ang mga bunga sang espiritu sang Dios. Ang una amo ang gugma. Ini nga kinaiya kinahanglanon gid sa aton ministeryo. Ngaa?
13 Ang gugma amo ang daku nga manugpahulag. Ang gugma kay Jehova kag sa aton isigkatawo nagapahulag sa matuod nga mga Cristiano nga ipaambit ang maayong balita. (Marcos 12:28-31) Kon wala ini nga gugma, indi gid kita mangin kalipikado subong mga manunudlo sang Pulong sang Dios. Talupangda ang kinatuhayan ni Jesus kag sang mga Fariseo. Ang Mateo 9:36 nagasiling tuhoy kay Jesus: “Sang nakita niya ang kadam-an naluoy sia sa ila, kay ginpanitan sila kag nag-alaplaag kaangay sang mga karnero nga wala sing manugbantay.” Ano ang ginbatyag sang mga Fariseo sa ordinaryo nga katawhan? Nagsiling sila: “Ining kadam-an nga wala makahibalo sang Kasuguan mga tawo nga ginpakamalaut.” (Juan 7:49) Ining mga Fariseo wala sing gugma sa mga tawo kundi puno sing pagtamay. Maathag nga ang espiritu ni Jehova wala nagapanghikot sa ila.
14. Paano dapat magpahulag sa aton ang halimbawa ni Jesus sa pagpakita sing gugma sa iya ministeryo?
14 Nahanuklog si Jesus sa mga tawo. Nakahibalo sia sang ila kasakit. Nakahibalo sia nga gin-abusuhan sila, ginpanitan, kag ginpaalaplaag kaangay sang mga karnero nga wala sing manugbantay. Ang Juan 2:25 nagasugid sa aton nga si Jesus “nakahibalo kon ano ang yara sa tawo.” Subong Batid nga Manugpangabudlay ni Jehova sa tion sang pagpanuga, si Jesus may madalom nga paghangop sa tawhanon nga kinaugali. (Hulubaton 8:30, 31) Ini nga paghangop nagpatudok sang iya gugma. Kabay nga ini nga gugma pirme mangin nagapahulag nga puwersa sa likod sang aton hilikuton sa pagbantala! Kon sa banta naton mahimo kita mag-uswag sa sini nga bahin, mangamuyo kita sing balaan nga espiritu ni Jehova kag nian magpanghikot suno sa aton mga pangamuyo. Si Jehova magasabat sa aton. Ipadala niya ining di-mapamatukan nga kusog agod buligan kita nga labi pa nga mangin kaangay kay Cristo, nga kalipikado gid sa pagbantala sing maayong balita.
15. Paano ang mga pulong sang Isaias 61:1-3 naaplikar kay Jesus kag nagbuyagyag man sa mga escriba kag mga Fariseo?
15 Diin naghalin ang mga kalipikasyon ni Jesus? “Ang espiritu ni Jehova yari sa akon,” siling niya. (Lucas 4:17-21) Huo, si Jehova mismo ang nagtangdo kay Jesus paagi sa balaan nga espiritu. Indi na kinahanglan ni Jesus ang dugang pa nga kredensiyal. Gintangdo bala sang balaan nga espiritu ang relihiosong mga lider sang panahon niya? Wala. Wala man sila masangkapan sa pagtuman sa Isaias 61:1-3, nga ginbasa sing mabaskog ni Jesus kag gin-aplikar sa iya kaugalingon. Palihug basaha ining mga bersikulo, kag tan-awa mismo sa imo kaugalingon nga ang salimpapaw nga mga escriba kag mga Fariseo wala sing nagakaigo nga kalipikasyon. Wala sila sing maayong balita nga ibantala sa mga imol. Kag paano sila makabantala sing paghilway sa mga bihag kag sing pagpasag-uli sing panulok sa mga bulag? Sa espirituwal nga kahulugan, sila mismo mga bulag kag naulipon sa himo-tawo nga mga tradisyon! Indi kaangay sining mga tawo, kalipikado bala kita sa pagtudlo sa mga tawo?
16. Ano nga pagsalig ang mahimo ginabatyag sang katawhan ni Jehova karon tuhoy sa ila kalipikasyon subong mga ministro?
16 Matuod, wala kita magtuon sa mataas nga mga eskwelahan sang Cristiandad. Wala kita ginpili subong mga manunudlo gikan sa teolohiko nga seminaryo. Kon amo, kulang bala kita sing kalipikasyon? Indi gid! Ang pagpili sa aton subong mga Saksi niya naghalin kay Jehova. (Isaias 43:10-12) Kon mangamuyo kita sang iya espiritu kag magpanghikot nahisanto sa aton pangamuyo, may yara kita pinakamataas nga kalipikasyon. Sa pagkamatuod, di-himpit kita kag indi makasunod sing himpit sa halimbawa nga ginpahamtang sang Daku nga Manunudlo, si Jesus. Apang, wala bala kita nagapasalamat nga ginagamit ni Jehova ang iya espiritu agod buligan kita nga mangin kalipikado kag nasangkapan subong mga manunudlo sang iya Pulong?
Ang Organisasyon ni Jehova Nagabulig sa Aton nga Mangin Kalipikado
17-19. Paano ang lima ka semanal nga mga miting nga ginaaman sang organisasyon ni Jehova nagabulig sa aton nga mangin kalipikado subong mga ministro?
17 Binagbinagon naton karon ang ikatlo nga paagi nga ginasangkapan kita ni Jehova subong mga manunudlo sang iya Pulong—ang iya dutan-on nga kongregasyon, ukon organisasyon, nga nagahanas sa aton nga mangin mga ministro. Paano? Hunahunaa lamang ang programa sang pagtudlo nga matigayon naton! Sa kinaandan nga semana, nagatambong kita sa lima ka Cristianong mga miting. (Hebreo 10:24, 25) Nagatipon kita sa magagmay nga mga grupo sa Pagtinuon Sang Kongregasyon sa Libro agod tun-an sing maid-id ang Biblia paagi sa tulun-an nga libro nga ginaaman sang organisasyon ni Jehova. Paagi sa pagpamati kag sa pagkomento, nagatuon kag nagapalig-unay kita sa isa kag isa. Nagabaton man kita sing personal nga pagtudlo kag igtalupangod gikan sa manugdumala sa pagtinuon sa libro. Sa Miting Publiko kag Pagtinuon sa Lalantawan, nagakuha kita sing dugang pa nga espirituwal nga pagkaon.
18 Ang aton Teokratikong Eskwelahan Para sa Ministeryo gindesinyo agod tudluan kita kon paano magtudlo. Paagi sa paghanda sa mga bahin sang mga estudyante, matun-an naton kon paano gamiton ang Pulong sang Dios sa pagtudlo sa madamo nga topiko. (1 Pedro 3:15) Nahatagan ka na bala sing bahin tuhoy sa isa ka tema nga daw nahibaluan mo na, apang natukiban mo nga may bag-o ka gali nga matun-an sa sini? Kinaandan na ina nga eksperiensia. Ang aton ihibalo sa isa ka tema nagauswag kon ginatudlo naton ini sa iban. Bisan pa wala kita gintangdo sa paghatag sing presentasyon, makatuon gihapon kita nga mangin mas maayo nga mga manunudlo. Sa tagsa ka estudyante, makita naton ang maayo nga mga kinaiya, kag makahunahuna kita kon paano ilugon ini nga mga kinaiya.
19 Ang Miting sa Serbisyo gindesinyo man agod sangkapan kita subong mga manunudlo sang Pulong sang Dios. Kada semana, nagapamati kita sa mapagsik nga mga pamulongpulong, mga paghambalanay, kag mga demonstrasyon nga gindesinyo para sa aton ministeryo. Ano nga presentasyon ang gamiton naton? Paano naton atubangon ang pinasahi nga mga hangkat sa aton publiko nga ministeryo? Ano nga mga paagi sa pagbantala nga bukas sa aton ang mahimo naton tilawan sing labi pa? Ano ang magabulig sa aton nga mangin mas epektibo nga mga manunudlo kon nagaduaw liwat kita kag nagadumala sing mga pagtuon sa Biblia? (1 Corinto 9:19-22) Ini nga mga pamangkot ginasabat kag ginabinagbinag sing detalyado sa Miting sa Serbisyo. Madamong bahin sa miting ang napasad sa mga artikulo sa Ang Aton Ministeryo sa Ginharian, ang isa pa ka kasangkapan nga gin-aman agod sangkapan kita para sa aton importante nga hilikuton.
20. Paano kita makabenepisyo sing bug-os gikan sa mga miting kag mga asambleya?
20 Paagi sa paghanda kag sa pagtambong sa aton mga miting kag nian sa pag-aplikar sang aton natun-an sa aton hilikuton subong mga manunudlo, nagabaton kita sing tul-id nga paghanas. Apang may dugang pa nga paghanas. May yara man kita mas dalagku nga mga miting—mga asambleya kag mga kombension—nga gindesinyo agod sangkapan kita subong mga manunudlo sang Pulong sang Dios. Kag nalangkag gid kita sa pagpamati sing maayo kag sa pag-aplikar sining mga laygay!—Lucas 8:18.
21. Ano nga ebidensia ang nagapakita nga ang aton paghanas epektibo, kag sin-o ang mapadunggan sa sini?
21 Ang paghanas bala nga gin-aman ni Jehova epektibo? Usisaon naton ang ebidensia. Kada tuig, ginatos ka libo ka tawo ang ginabuligan nga magtuon sang sadsaran nga mga doktrina sang Biblia kag magkabuhi nahisanto sa ginapatuman sang Dios sa ila. Nagadamo pa kita, apang wala sing isa sa aton ang personal nga mapadunggan tungod sini. Dapat naton tamdon ang mga butang sing realistiko, subong sang ginhimo ni Jesus. Nagsiling sia: “Wala sing tawo nga makakari sa akon luwas kon buyukon sia sang Amay, nga nagpadala sa akon.” Kaangay sang mga apostoles sang una, ang kalabanan sa aton wala sing tinun-an kag ordinaryo lamang. (Juan 6:44; Binuhatan 4:13) Ang aton kadalag-an nasandig kay Jehova, nga nagabuyok sa bunayag-sing-tagipusuon nga mga tawo sa kamatuoran. Nagakaigo ini nga ginpabutyag ni Pablo: “Ako ang nagtanom, si Apolos ang nagbunyag, apang ang Dios ang nagapatubo sini.”—1 Corinto 3:6.
22. Ngaa indi gid kita dapat maluyahan sing buot sa pagpakigbahin sing bug-os sa Cristianong ministeryo?
22 Huo, si Jehova nga Dios aktibo nga nadalahig sa aton hilikuton subong mga manunudlo sang iya Pulong. Mahimo nga wala kita pirme nagabatyag nga kalipikado subong mga manunudlo. Apang tandai, si Jehova amo ang nagabuyok sa mga tawo sa iya kag sa iya Anak. Si Jehova amo ang nagabulig sa aton nga mangin kalipikado sa pag-alagad sa sining mga bag-uhan paagi sa iya Pulong, sa iya balaan nga espiritu, kag sa iya dutan-on nga organisasyon. Maghulag kita sa paghanas ni Jehova paagi sa pag-aplikar sa maayong mga butang nga ginaaman niya karon agod masangkapan kita sing bug-os subong mga manunudlo sang Pulong sang Dios!
Paano Mo Sabton?
• Paano kita ginasangkapan sang Biblia para sa pagbantala nga hilikuton?
• Ano ang papel sang balaan nga espiritu sa pagbulig sa aton nga mangin kalipikado subong mga ministro?
• Sa anong mga paagi ginabuligan ka sang dutan-on nga organisasyon ni Jehova nga mangin kalipikado subong manugbantala sang maayong balita?
• Ngaa makasalig kita kon nagapakigbahin sa ministeryo?
[Retrato sa pahina 25]
Subong manunudlo sang Pulong sang Dios, ginpakita ni Jesus ang gugma sa mga tawo