Sin-o ang Kalipikado sa Pagbantala?
1 Nahanungod sa ministeryo, nabatyagan mo bala ang kaangay sang ginbatyag ni Moises? Sia nagsiling: “Pasayluha ako, Jehova, apang indi ako madagmit maghambal, bisan kutob kahapon ukon bisan antes sina ukon kutob sang pagpamulong mo sa imo alagad.” (Ex. 4:10) Kon amo sina ang imo balatyagon, ayhan mahuyog ikaw sa pag-isol. Apang, si Jesus “nagsugo sa [aton] sa pagbantala sa mga tawo kag sa paghatag sing maid-id nga panaksi.” (Binu. 10:42) Gani paano kita mangin kalipikado nga mga manugbantala?
2 Ang aton sekular nga edukasyon wala nagakalipikar sa aton para sa ministeryo. Si Pablo nagsiling nga “indi madamo nga maalam sa undanon nga paagi ang gintawag.” (1 Cor. 1:26) Ginpili ni Jesus ang iya mga apostoles sa tunga sang mga mamumugon—ang apat mga mangingisda. Gintamod sila sang bugalon nga relihiosong mga lider subong “mga tawo nga walay tinun-an kag kinaandan.” Ginhukman paagi sa kalibutanon nga mga talaksan, ang mga apostoles indi kalipikado sa pagbantala. Apang, ang sampaton nga diskurso nga ginhatag ni Pedro sang adlaw sang Pentecostes nagpahulag sa 3,000 nga magpabawtismo!—Binu. 2:14, 37-41; 4:13.
3 Si Jehova Nagakalipikar sa Aton sa Pagbantala: Si Pablo nagpahayag: “Ang amon bug-os nga pagkakalipikado naggikan sa Dios.” (2 Cor. 3:5) Gintudluan ni Jehova ang minilyon sa pagbantala sang kamatuoran sang Ginharian sa iban. (Isa. 54:13) Ang pagkaepektibo sining hilikuton sarang makita sa 338,491 nga nagpabawtismo sang nagligad nga tuig subong buhi nga “mga sulat sang rekomendasyon.”—2 Cor. 3:1-3.
4 Ang organisasyon sang Dios nagtukod sing isa ka internasyonal nga programa sang paghanas para sa mga ministro. Paagi sa Kasulatan kag sa madamong bulig sa pagtuon sa Biblia, ginhanas kita nga mangin “bug-os nga may ikasarang, bug-os nga nasangkapan” sa pagbantala. (2 Tim. 3:16, 17) Madamo ang nagdayaw sa ihibalo nga masapwan sa mga publikasyon sang Sosiedad. Halimbawa, ang isa ka peryudiko sa Sweden nagsiling: “Sa likod sang pagtuo nga ginabantala sang mga Saksi ni Jehova yara ang makahayanghag nga mataas-sing-klase kag makawiwili sa madamong pungsod nga siensia sa Biblia.”
5 Paagi sa panuytoy nga ginahatag sa aton lima ka semanal nga mga miting, sa aton programa para sa pagbasa kag pagtuon sang Biblia, sa paglaygay sang Teokratikong Eskwelahan sa Pagministro, sa personal nga pagbulig sang iban nga mga eksperiensiado nga ministro, kag labaw sa tanan, sa pagsakdag sang balaan nga espiritu ni Jehova, makasalig kita nga ginatamod kita ni Jehova subong bug-os nga kalipikado sa pagbantala.—2 Cor. 2:17.
6 Kon himuslan naton sing bug-os ang paghanas nga ginaaman paagi sa organisasyon sang Dios, wala kita sing rason sa pag-isol. Malipayon kita nga makabantala sa iban, nagasalig nga pakamaayuhon ni Jehova ang aton mga panikasog.—1 Cor. 3:6.