Pamangkot

◼ Dapat bala ipanagtag sang mga Saksi ni Jehova ang mga rekording ukon mga nota sang mga pamulongpulong?

Napabakod kag napalig-on kita sang mga diskurso sa Biblia. (Binu. 15:32) Gani, kinaandan lang nga gusto naton ini ipaambit sa mga wala nakapamati. Bangod sa moderno nga mga kagamitan sa pagrekord, mahapos lang nga marekord kag mapanagtag ang isa ka pamulongpulong. Ang pila nagakolekta sang narekord nga mga pamulongpulong, lakip na ang madugay na nga mga ginpamulongpulong, kag bangod sang ila maayo nga tuyo, ginapahulam ukon ginakopya nila ini para sa ila mga abyan. Ang pila naghimo sang Web site kag nagbutang sang mga pamulongpulong para ma-download sang iban.

Wala man ginadilian ang pagrekord sang mga pamulongpulong para sa aton ukon para sa miembro sang aton pamilya. Dugang pa, nagarekord ang mga gulang para sa mga nagabalatian nga miembro sang kongregasyon nga indi makatambong sa mga miting. Pero, may maayo kita nga rason kon ngaa indi dapat pag-ipanagtag ang mga nota ukon mga rekording sang mga pamulongpulong.

Bangod ang pamulongpulong masami nga ginapahisuno sa lokal nga mga kinahanglanon, mahimo nga indi naton mahangpan sing maayo ang mga punto gikan sa ginpanagtag nga mga rekording bangod wala naton nahibaluan ang kahimtangan sa tion nga ginhatag ang pamulongpulong. Isa pa, mabudlayan kita sa pagkilala kon sin-o ang namulongpulong kag kon san-o ini ginhatag, gani indi naton mapat-od kon ang impormasyon sibu kag suno pa sa tion. (Luc. 1:1-4) Dugang pa, ang pagpanagtag sang nota ukon rekording sang mga pamulongpulong mahimo nga magpahulag sa iban nga hatagan ukon batunon ang indi nagakaigo nga atension kag dungog.—1 Cor. 3:5-7.

Nagapangabudlay ang matutom kag mainandamon nga ulipon sa pag-aman sing espirituwal nga pagkaon sing “bastante” kag “sa nagakaigo nga tion.” (Luc. 12:42) Nagalakip ini sa kahimusan sa pamulongpulong nga ginahatag sa kongregasyon sang mga Saksi ni Jehova kag sang audio rekording nga ma-download sa Web site nga www.jw.org. Makasalig kita nga ang matutom kag mainandamon nga ulipon kag ang Nagadumala nga Hubon sini magaaman sang aton kinahanglanon para mangin mabakod kita sa pagtuo.—Binu. 16:4, 5.