Mga Instruksion Para sa mga May Bahin sa Miting sa Serbisyo
Sugod sa sini nga gua sang Ang Aton Ministeryo sa Ginharian, pasimplehon ang mga iskedyul para sa Miting sa Serbisyo. Ang masunod nga mga instruksion kag mga pahanumdom magapaathag pa gid sa ginsiling sang artikulo nga “Kon Paano Maghanda Para sa Miting sa Serbisyo,” sa Mayo 2009 nga Ang Aton Ministeryo sa Ginharian.
◼ Pamulongpulong: Isa ini ka diskurso pasad sa gin-asayn nga materyal nga wala sing pagpakigbahin sang tumalambong. Dapat ipadaku sang humalambal kon ano ang makabulig gid sa kongregasyon.
◼ Pamangkot kag Sabat: Halos kaanggid ini sa Pagtinuon sa Ang Lalantawan, may malip-ot ini nga introduksion kag konklusion, kag dapat ipautwas ang tanan nga pamangkot sa mga parapo. Dapat likawan sang nagadumala ang pirme nga pagkomento. Mahimo basahon ang yabi nga mga teksto kon ginatugot sang tion. Indi dapat pagbasahon ang mga parapo, luwas lang kon nabutang ini sa instruksion.
◼ Paghinun-anon: Pamulongpulong ini nga nagalakip sang pila ka pagpakigbahin sang tumalambong. Indi lamang ini puro pamulongpulong, kag indi puro pamangkot kag sabat.
◼ Pasundayag kag Interbyu: Ang instruksion nga ipasundayag nagapahangop nga ang utod nga may bahin dapat maghimos sing pasundayag; indi man kinahanglan nga sia ang magapasundayag. Dapat kalipikado kag huwaran ang iya pilion sa pagpasundayag, kag dapat niya ini ihatag sa ila sing abanse. Labing maayo kon indi maggamit sing mga bag-uhan kag di-eksperiensiado nga manugbantala sa pagpasundayag para lang mahatagan sila sing kahigayunan nga makasaka sa plataporma, bisan pa mahimo magamit ang pila sa ila subong tagbalay. Dapat maatubang sa tumalambong ang mga manugbantala nga nagapasundayag. Ang mga interbyuhon dapat magsaka sa plataporma imbes nga sa pulungkuan lang maghatag sang ila mga komento. Dapat i-rehearse ang mga pasundayag kag interbyu. Kon magsobra sa oras ang miting kag kinahanglan palip-uton sang utod ang iya bahin, indi niya dapat pagdulaon ang pasundayag ukon interbyu. Ang mga ministeryal nga alagad dapat mamangkot sa koordenitor sang hubon sang mga gulang ukon sa iban nga gulang antes magpili sang ila mga partisipante.
Kon ang bahin may pinasahi nga mga instruksion, dapat gid ini sundon sing maayo. Paagi sa paghatag sang mga bahin sa Miting sa Serbisyo suno sa sini nga mga instruksion, makaamot ang mga utod para mangin “disente kag suno sa kahimusan” ang Miting sa Serbisyo.—1 Cor. 14:40.