Audio nga mga Rekording—Kon Paano Ini Gamiton

1. Magluwas sa aton naimprinta nga mga publikasyon, ano pa ang gin-aman sa aton?

¹ Madamo ang nanamian magbasa sang matahom kag sibu nga mga pulong sang kamatuoran sa jw.org/hil. (Man. 12:10) Pero, nakapamati ka na bala sa audio nga mga rekording? Gin-aman ini para mapamatian mo ang pila ka impormasyon sa aton website. Ano ang mabenepisyo naton sa audio nga mga rekording?

2. Paano naton gamiton ang audio nga mga rekording sa aton personal ukon pangpamilya nga pagtuon?

² Para sa Aton Personal ukon Pangpamilya nga Pagtuon: Paagi sa pagpamati sa audio nga mga rekording sang Biblia, magasin, ukon sang isa ka publikasyon samtang nagabiyahe ukon ano man ang aton ginahimo, magamit naton sing maayo ang aton tion. (Efe. 5:15, 16) Mahimo man kita mamati sa rekording kag sundan ang pagbasa sini sa publikasyon sa tion sang aton pangpamilya nga pagsimba. Makabulig man sa aton ang pagpamati sa audio nga mga rekording sa aton personal nga pagtuon ilabi na kon luyag naton pauswagon ang aton pagbasa ukon nagatuon kita sang bag-o nga lenguahe.

3. Sin-o sa aton teritoryo ang makabenepisyo sa audio nga mga rekording?

³ Para sa Ministeryo: Ang mga tawo sa aton teritoryo nga masako kag daw wala na tion sa pagbasa, mahimo manamian mamati sa audio nga mga rekording. Mahimo may maistorya man kita nga tuhay sing lenguahe kag ayhan mangin interesado sila kon mabatian nila ang mensahe sang Ginharian sa ila “namat-an nga lenguahe.” (Binu. 2:6-8) Sa iban nga lugar, bahin na sang ila kultura ang pagpamati. Halimbawa, tradisyon sang mga Hmong nga isugid sa masunod nga kaliwatan ang ila kasaysayan kag maayo gid ang ila memorya. Ang mga Aprikano naman nanamian sa pagtuon paagi sa pagpamati sa istorya.

4. Ano ang mahimo naton ipamangkot sa aton kaugalingon parte sa pagbulig sa mga tawo sa aton teritoryo?

⁴ Sa inyo teritoryo, mas maayo bala ang resulta kon ipabati naton sa tagbalay ang audio nga mga rekording sa iya lenguahe? May kilala ka bala nga makabenepisyo sa audio nga rekording kon padal-an mo sia sa iya e-mail? Puede ka bala maka-download sang audio nga rekording kag kopyahon ini sa CD kag ihatag sa interesado, ayhan lakip ang naimprinta nga kopya sini? Ang kompleto nga elektroniko nga kopya sang libro, brosyur, magasin, ukon tract nga mahatag naton sa ministeryo puede ireport. Gindesinyo ang audio nga mga rekording para gamiton naton sa aton personal nga pagtuon kag pagtanom sang binhi sang kamatuoran sang Ginharian.—1 Cor. 3:6.